ប្រឡងបាក់ឌុបឆ្នាំនេះ មន្ទីរទេសចរណ៍ខេត្តបាត់ដំបងស្នើប្រតិបត្តិករទេសចរណ៍កុំដំឡើងថ្លៃសេវាស្នាក់នៅនិងម្ហូបអាហារ
បាត់ដំបង៖ខណៈការប្រឡងសញ្ញាបត្រមធ្យមសិក្សាទុតិយភូមិឬ បាក់ឌុបនឹងប្រព្រឹត្តទៅរយៈពេលពីរថ្ងៃនៅថ្ងៃអង្គារនិងថ្ងៃពុធក្នុងសប្ដាហ៍នេះ មន្ទីរទេសចរណ៍ខេត្តបាត់ដំបងបានអំពាវនាវដល់គ្រប់ប្រតិបត្តិករទេសចរណ៍ សូមកុំដំឡើងថ្លៃសេវាស្នាក់នៅនិងម្ហូបអាហារ នៅក្នុងអំឡុងពេលនៃការប្រឡងបាក់ឌុប នៅថ្ងៃអង្គារនេះដើម្បីសម្រួលដល់ការចំណាយរបស់បេក្ខជនប្រឡង។
អាន៖ លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង និងជាអ្នកនាំពាក្យមន្ទីរទេសចរណ៍ខេត្ត បានបញ្ជាក់ដោយអនុ
វត្តន៍តាមសេចក្ដីណែនាំ របស់ ក្រសួងទេសចរណ៍ ជាពិសេសអនុវត្តតាមការណែនាំរបស់ឯកឧត្តម សុខ លូ អភិបាលខេត្តបាត់ដំបង។ក្នុងនោះមន្ទីរបានដឹកនាំក្រុមការងារចុះផ្សព្វផ្សាយសេចក្តីជូនដំណឹងស្តីពីការរក្សាតម្លៃសេវាកម្ម អាជីវកម្មទេសចរណ៍ក្នុងរយៈពេលនៃការប្រឡងសញ្ញបត្រមធ្យមសិក្សាទុតិយភូមិឆ្នាំ២០២៤ ដែលនឹងប្រព្រឹត្តទៅ ចាប់ពីថ្ងៃទី៨ ដល់ថ្ងៃទី៩ ខែតុលា ឆ្នាំ២០២៤ ជូនដល់គ្រប់ប្រតិបត្តិករទេសចរណ៍ ក្នុងក្រុងបាត់ដំបង។
លោកអនុប្រធានមន្ទីរបន្តថា ការអនុវត្តបែបនេះគឺដើម្បីជួយសម្រួលដល់ការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី៨-៩ ខែតុលា។មន្ទីរទេសចរណ៍ខេត្តបានស្នើសុំឱ្យប្រតិបត្តិករទេសចរណ៍រក្សាតម្លៃ កុំឱ្យមានការដំឡើងថ្លៃការស្នាក់នៅ និងម្ហូបអាហារ និងជួយសម្របសម្រួលអនុញ្ញាតឱ្យសិស្សានុសិស្សស្នាក់នៅជុំគ្នាបានច្រើន ព្រមទាំងជួយពិនិត្យលទ្ធភាពក្នុងការបញ្ចុះតម្លៃជូនពួកគាត់តាមការគួរដែលអាចធ្វើទៅបាន។
លោក ហម អរុណអ្នកនាំពាក្យមន្ទីរទេសចរណ៍ខេត្តបាត់ដំបង បន្តថាមន្ទីរបានធ្វើការណែនាំដល់ម្ចាស់សណ្ឋាគារ ផ្ទះសំណាក់ និងបន្ទប់ជួលដែលនៅជិតមណ្ឌលប្រឡង ក៏ត្រូវរក្សាតម្លៃសេវាកម្មស្នាក់នៅរបស់ខ្លួន ឱ្យនៅកម្រិតអប្បបរមាបំផុត មិនត្រូវដំឡើងថ្លៃសេវាស្នាក់នៅ។លោកបានណែនាំដល់ម្ចាស់ភោជនីយដ្ឋាន អាហារដ្ឋាន តូបលក់អាហារ ក៏ត្រូវរក្សាអនាម័យចំណីអាហារបរិស្ថានជុំវិញឱ្យបានស្អាតនិងលក់ក្នុងតម្លៃសមរម្យ សុំកុំដំឡើងថ្លៃម្ហូប។
តាមរយៈការអំពាវនាវនិងសេចក្តីណែនាំខាងលើនេះមន្ទីរទេសចរណ៍សង្ឃឹមជឿជាក់លើស្មារតីចូលរួមសហការឱ្យមានប្រសិទ្ធភាពបំផុតព្រោះការចូលរួមរបស់លោក លោកស្រី ប្រតិបត្តិករទេសចរណ៍ គឺជាផ្នែកមួយក្នុងការលើកកម្ពស់មូលធនមនុស្សនៅកម្ពុជា។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិឬបាក់ឌុបឆ្នាំនេះសម័យប្រឡងថ្ងៃទី៨ ខែតុលា សម្រាប់ខេត្តបាត់ដំបង មានមណ្ឌលប្រឡងចំនួន១៤មណ្ឌលស្មើនឹង៣៨៥បន្ទប់ និងមានបេក្ខជនសរុបចំនួន៩ ៥៥០នាក់ ។ឆ្នាំនេះចំនួនបេក្ខជនពិការភាពក៏មានការកើនឡើងច្រើន ជាងឆ្នាំមុនផងដែរ៕
អត្ថបទ-រូបភាព៖ អ៊ុក សំអាន បប.
