(ភ្នំពេញ)៖ នៅមុនមួយថ្ងៃ នៃការប្រឡងមធ្យមសិក្សាទុតិយភូមិ បេក្ខជនដែលត្រៀមចូលរួមប្រឡងទាំងអស់នៅទូទាំងប្រទេស ត្រូវគេឃើញបាននាំគ្នាទៅពិនិត្យបញ្ជីឈ្មោះ លេខតុ លេខបន្ទប់ និងប្លង់បន្ទប់ នៅតាមមណ្ឌលប្រឡងរៀងៗខ្លួន ។ ការប្រឡងមធ្យមសិក្សាទុតិយភូមិឆ្នាំ២០២៤ នឹងប្រព្រឹត្តិទៅ រយៈ២ថ្ងៃ គឺនៅថ្ងៃទី៨ ដល់ ថ្ងៃទី៩ ខែតុលា ឆ្នាំ២០២៤ ស្អែកនេះហើយ ។ គណៈកម្មការប្រឡងនីមួយៗ បានបិទបញ្ជីឈ្មោះ លេខតុ លេខបន្ទប់ ប្លង់បន្ទប់ និងបទប្បញ្ញតិសម្រាប់បេក្ខជនប្រឡង បុគ្គលិកអប់រំ និងបទប្បញ្ញត្តិទូទៅ ក្នុងបរិវេណមណ្ឌលប្រឡងរៀងៗខ្លួន។

ក្រសួងអប់រំ យុវជន និងកីឡា តាមរយៈបទបញ្ញាតិរបស់ខ្លួន បានអំពាវនាវដល់បេក្ខជនទាំងអស់ ត្រូវគោរពបទប្បញ្ញត្តិនៃការប្រឡងឱ្យបានត្រឹមត្រូវ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិកគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត ។ ក្រសួសងអប់រំ នូវបានព្រមានថា ក្នុងករណីរកឃើញថា បានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យ បេក្ខជននឹងត្រូវបានកំណត់ឱ្យធ្លាក់ជាស្វ័យប្រវត្តិ ។

ឧបនាយករដ្ឋមន្ត្រី ហង់ជួន ណារ៉ុន បានអំពាវនាវផងដែរដល់បេក្ខជនប្រឡងសញ្ញាបត្របាក់ឌុបនៅថ្ងៃស្អែកទាំងអស់ ត្រូវគោរពបទបញ្ញត្តិនៃការប្រឡងឱ្យបានល្អ និងមិនត្រូវយកតាមខ្លួន នូវឧបករណ៍អេឡិចត្រូនិក និងសំណៅឯកសារផ្សេងៗឡើយ ។ ឯកឧត្តមបានអំពាវនាវដល់បេក្ខជនទាំងអស់ ត្រូវថែរក្សាសុខភាពឱ្យបានល្អ ទទួលទានដំណេក និងអាហារឱ្យបានគ្រប់គ្រាន់ ជាពិសេសត្រូវគោរពច្បាប់ចរាចរណ៍ឱ្យបានល្អ ។

ដោយឡែក ចំពោះបេក្ខជនប្រឡង, អនុប្រធាន សមាជិកអប្បមាទ និងជំនួយការអប្បមាទ, អនុប្រធានមណ្ឌល, គណៈកម្មការកណ្តាល អ្នកត្រួតពិនិត្យតាមអគារ និងអនុរក្ស និងសមាជិកសន្តិសុខ និងបុគ្គលិកសុខាភិបាលប្រចាំមណ្ឌល គឺជាបុគ្គលដែលគ្មានសិទ្ធិយកចូល និងប្រើប្រាស់នូវទូស័ព្ទដៃឡើយ ។

នៅមួយថ្ងៃនៃការរៀបចំការប្រឡងនោះផងដែរ គណៈកម្មការប្រឡងនៅតាមមណ្ឌល​នៅតាមខេត្តមួយចំនួន ឬនៅតាមបូជនីយស្ថានផ្សេងៗ ត្រូវគេរាយការណ៍ថា បានរៀបចំ​ពិធីអុចធូបបួងសួង បន់ស្រន់ សូមសេចក្តីសុខផងដែរ ជាពិសេសសុំអោយដំណើរការប្រឡងប្រព្រឹត្តិទៅដោយរលូន នៅមុនការប្រឡងបានចូលមកដល់ ៕

ដោយ ៖ គង់ សុផល