ក្រចេះ៖ បេក្ខជនចុះឈ្មោះប្រឡងសញ្ញាបត្រមធ្យមសិក្សាទុតិយភូមិ​សម័យប្រឡង៖៨ តុលាឆ្នាំ២០២៤ ក្នុងខេត្តក្រចេះចំនួន២ ៤០ ៥នាក់(ស្រី ១ ៣៤៣នាក់) ក្នុងនេះ បេក្ខជនស្វៃរិន ៣៥៨នាក់ (ស្រី ១៦៨នាក់ )បានត្រៀមខ្លួនរួចជាស្រេចហើយ​ចូលរួមប្រឡង ក្នុងរយៈពេលពីរថ្ងៃ គឺនៅថ្ងៃអង្គារទី៨ និងថ្ងៃពុធទី៩ ខែតុលា ។

លោក ឡាយ បូរ៉ា ប្រធានមន្ទីរអប់រំ យុវជន និងកីឡាខេត្តក្រចេះបាន​ឱ្យដឹងថា ខេត្តក្រចេះមានមណ្ឌលប្រឡង ចំនួន ៥មណ្ឌល ក្នុងនោះ មណ្ឌលវិទ្យាសាស្ត្រមានចំនួន២ និងមណ្ឌលវិទ្យាសាស្ត្រសង្គមចំនួន ៣ ស្មើនឹង ៩៧បន្ទប់ ។ រីឯគណៈមេប្រយោគ មានចំនួនសរុប ៣២៤នាក់ (ស្រី ១២៥នាក់) ។

លោកប្រធានមន្ទីរឱ្យដឹងទៀតថា បេក្ខជនដែលចូលរួមប្រឡងសញ្ញា​បត្រ​មធ្យមសិក្សាទុតិយភូមិឆ្នាំ២០២៤បើធៀបទៅនឹងឆ្នាំ ២០២៣​ឃើញថាមានការកើនឡើង ៦១នាក់ ។

ដោយឡែកក្នុងសកម្មភាពពិនិត្យបញ្ជីឈ្មោះនៅថ្ងៃទី៧ ខែតុលា បេក្ខជន បានអះអាងថា ពួកគេបានត្រៀមលក្ខណៈរួចជាស្រេច ដើម្បីបំពេញវិញ្ញាសារប្រឡងនៅថ្ងៃស្អែក ហើយក៏សង្ឃឹមថា ការប្រឡងរយៈពេល ២ថ្ងៃនេះ ពួកគេនឹងទទួលបាន​លទ្ធផល ជាក់ជាពុំខានឡើយ។

ក្រសួងអប់រំ យុវជន និងកីឡាបានបញ្ជាក់ថា ដំណើរការប្រឡងសញ្ញា​បត្រ​មធ្យមសិក្សាទុតិយភូមិ សម័យប្រឡង៖ ០៨ តុលា ២០២៤ នឹងត្រូវប្រព្រឹត្តទៅដោយគោរពតាម គោលការណ៍ទាំង៤ នៃការប្រឡង គឺគោលការណ៍ច្បាប់ យុត្តិធម៌ តម្លាភាព និងលទ្ធផល ទទួលយកបាន ពោលគឺ «អ្នកចេះជាប់»៕
ដោយ៖ឡុង សំបូរ