ប្រឡងសញ្ញាបត្រមធ្យមសិក្សាទុតិយភូមិឆ្នាំនេះ ខេត្តបន្ទាយមានជ័យមានបេក្ខជនជាង៦ពាន់នាក់
បន្ទាយមានជ័យ៖ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបសម័យប្រឡងថ្ងៃទី៨ ខែតុលាឆ្នាំ២០២៤ បានចាប់ផ្តើមដោយរលូន និងមានរបៀបរៀបរយ ។ខេត្តបន្ទាយមានជ័យបេក្ខជនចូលរួមប្រឡង ៦.២៣៥នាក់ , មាន៨ មណ្ឌលសំណេរ ស្ថិតនៅក្រុងសិរីសោភណតែមួយ។
ពិធីបើកវិញ្ញាសាប្រឡងនៅខេត្តបន្ទាយ បានអញ្ជើញចូលរួមដោយឯកឧត្ដម បណ្ឌិតកុលផេង វឌ្ឍនា អនុរដ្ឋលេខាធិការក្រសួងអប់រំ យុវជននិងកីឡា ជាប្រធានគណគណៈមេប្រយោគទូទាំងប្រទេសប្រចាំខេត្តបន្ទាយមានជ័យ ឯកឧត្ដម អ៊ុ រាត្រី អភិបាលខេត្តបន្ទាយមានជ័យ លោក ច័ន្ទ ម៉ារ៉ាដូណា ប្រធានក្រុមការងារអង្គភាពប្រឆាំងអំពើពុករលួយ ខេត្តបន្ទាយមានជ័យ លោក ឈូ ប៊ុនរឿង ប្រធានមន្ទីរអប់រំ យុវជននិងកីឡាខេត្តបន្ទាយមានជ័យ និងមន្ត្រីជំនាញ អាជ្ញាធរដែនដី កងកម្លាំង អ្នកពាក់ព័ន្ធ។
លោកប្រធានមន្ទីរអប់រំខេត្តបន្ទាយមានជ័យបានឱ្យដឹងថា ការប្រឡងសញ្ញាបត្រមធ្យមសិក្សាទុតិយភូមិសម័យប្រឡងថ្ងៃទី៨ ខែតុលាមានបេក្ខជនចុះឈ្មោះប្រឡងចំនួន ៦.២៣៥នាក់ (ស្រី ៣.៥៦៩នាក់) ។ ក្នុងនោះ បេក្ខជនចំណេះទូទៅចំនួន៥.១០៩នាក់(ស្រី៣.០៦៦នាក់), បេក្ខជនស្វៃរិនចំនួន៨៤៣នាក់(ស្រី៤៣៦នាក់ )និងបេក្ខជនបំពេញវិជ្ជាចំនួន ២៨៣នាក់(ស្រី៦១នាក់ )។មានមណ្ឌលប្រឡងចំនួន៨ ក្នុងនោះ ថ្នាក់វិទ្យាសាស្ត្រមាន៣មណ្ឌល និងថ្នាក់វិទ្យាសាស្ត្រសង្គម៥ មណ្ឌល។
សូមរំលឹកថា សម័យប្រឡងឆ្នាំ២០២៣មានបេក្ខជនចុះឈ្មោះប្រឡងឬក្នុងបញ្ជីមានចំនួន ៦.១៦៨នាក់ ( ស្រី ៣.៣៧៧នាក់) ។
ក្នុងឱកាសនេះឯកឧត្ដមបណ្ឌិត កុលផេង វឌ្ឍនា ឯកឧត្ដម អ៊ុ រាត្រី បានជូនពរដល់បេក្ខជនទាំងអស់ឱ្យប្រឡងជាប់និងទទួលបាននិទ្ទេសល្អគ្រប់គ្នា ហើយសន្យាប្រគល់ជូនកុំព្យូទ័រយួដៃ១គ្រឿង ចំពោះបេក្ខជនដែលបានប្រឡងជាប់និទ្ទេសអេ(A)៕
ដោយ៖ឃិន គន្ធា
