(ភ្នំពេញ)៖ ឯកឧត្តម ឈួន វ៉ន់ បានជំរុញទៅដល់បងប្អូន អ្នកប្រកបរបរដឹកជញ្ជូន​គ្រប់​ប្រភេទពិសេស អ្នករត់កង់បី បញ្ចប់នូវពាក្យរិះគន់ពីសំណាក់បងប្អូនប្រជាពលរដ្ឋ ទៅលើការតាមដងផ្លូវ ដែលមានការលើកឡើងនាពេលកន្លងមក ក្នុងនោះមានការ​បើកបរ​ដោយមិនគោពគន្លងផ្លូវ ការវ៉ាជែងក្នុងស្ថានភាពគ្រោះថ្នាក់ និងបំពានភ្លើងស្តុប និងផ្លាកសញ្ញាជាដើម។

ការលើកឡើងរបស់ ឯកឧត្តម ឈួន វ៉ន់ អគ្គនាយកនៃអគ្គនាយកដ្ឋាន​ដឹកជញ្ជូន​ផ្លូវគោក នៃក្រសួងសារធារណៈការនិងដឹកជញ្ជូន នៅព្រឹកថ្ងៃទី១១ ខែតុលា ឆ្នាំ២០២៤នេះ ក្នុងឱកាសអញ្ជើញជាអធិបតីភាព ពិធីបិទ “យុទ្ធនាការ​បណ្តុះ​បណ្តាល និងប្រឡងយកបណ្ណបើកបរយានយន្ត” ដល់អ្នកបើកបរម៉ូតូកង់បី ដែលជាសមាជិកដៃគូបើកបររបស់ក្រុមហ៊ុនហ្គ្រេប (ខេមបូឌា) ។

ឯកឧត្តម បន្តថា តាមរយៈកម្មវិធីបណ្តុះបណ្តាលផ្សព្វផ្សាយនេះ នឹងបានជាប្រយោជ​ន៍​ក្នុងការ​ផ្តល់​នូវពុទ្ធិ ឆន្ទៈ ស្មារតី និងការយល់ដឹងឱ្យកាន់តែស៊ីជម្រៅបន្ថែមទៀតអំពី​ការ​អនុវត្ត​ច្បាប់​ស្តីពីចរាចរណ៍ផ្លូវគោក និងវិធានដែលអ្នកប្រើប្រាស់ផ្លូវ និងអ្នកបើកបរ​គ្រប់រូបត្រូវប្រកាន់ខ្ជាប់ប្រកបដោយស្មារតីម្ចាស់ការ និងការទទួលខុសត្រូវខ្ពស់ ដើម្បី​រក្សា​ឱ្យបាននូវសុវត្ថិភាពក្នុងការធ្វើដំណើរនៅលើដងផ្លូវ និងស្នាមញញឹមរបស់​ប្រជា​ពល​រដ្ឋគ្រប់រូប។

លោក ហុក សុគន្ធ ប្រកបរបររត់កង់បីចាប់តាំងពីឆ្នាំ២០១៦ បានលើកឡើងថា បន្ទាប់ពីទទួលបានការបណ្តុះបណ្តាលច្បាប់ចរាចរណ៍ពីក្រសួងសារធារណៈការ និងដឹកជញ្ជូន ធ្វើឱ្យលោកដឹងច្បាស់ពីគន្លងផ្លូវរបស់ខ្លួនដែលត្រូវបើកបរ ខណៈពីមុន​មកការបើកបរមិនច្បាស់គន្លងផ្លូវ។ ជាមួយគ្នានេះលោក ក៏បានអំពាវនាវដល់អ្នកប្រើ​ប្រាស់​ដងផ្លូវពិសេសអ្នកប្រករបររត់កង់បីសូមគោរពច្បាប់ ក៏ដូចជាគន្លងចរាចរណ៍ និងការវ៉ាជែង ផ្តេសផ្តាស់ ដែលបណ្តាលឱ្យមានគ្រោះថ្នាក់កើតឡើង និងបង្ករកាកកស្ទះចរាចណ៍ផងដែរ។

លោក កង សុវណ្ណរ៉ូត នាយកគ្រប់គ្រងប្រចាំនៅកម្ពុជារបស់ក្រុមហ៊ុន Grab លើក​ឡើង​ថា ក្រុមហ៊ុន បានធ្វើការយ៉ាងជិតស្និតជាមួយក្រសួងដើម្បីរៀបចំវគ្គ​បណ្តុះ​បណ្តាល​សរុបចំនួន ១០វគ្គ សម្រាប់ដៃគូបើកបរ តាំងពីខែមេសា ឆ្នាំ២០២៤ នេះ​កន្លង​មក ដោយ ដៃគូបើកបរ បានចូលរួមយ៉ាងសកម្មទាំងក្នុងវគ្គបណ្តុះបណ្តាល និងការប្រឡងយកប័ណ្ណបើកបរ។

លោកបន្ថែមថា បន្ថែមពីការរៀនបើកបរដល់អ្នកបើកបរដែលបានសហការជាមួយ ក្រុមហ៊ុនGrab ក៏មានមេរៀននៅលើអែប ក៏ដូចជាក្រើនរំលឹកដល់អ្នកបើកបន្ថែម ដល់អ្នកបើក ជាភ្នាក់ងាសមាជិក្រុមហ៊ុនផងដែរ។

សូមបញ្ជាក់ថា យុទ្ធនាការបណ្តុះបណ្តាល និងប្រឡងយកបណ្ណបើកបរយានយន្ត​នេះ គឺជាការផ្តួចផ្តើមឡើងដោយក្រសួងសាធារណការ និងដឹកជញ្ជូន សហការជា​មួយ ក្រុមហ៊ុនហ្គ្រេប (ខេមបូឌា) ឯ.ក​​ ក្នុងគោលបំណងដើម្បីលើកកម្ពស់ការយល់​ដឹង​អំពី​ច្បាប់ស្តីពីចរាចរណ៍ផ្លូវគោក បច្ចេកទេសបើកបរយានយន្ត និងមាន​សមត្ថភាព​គ្រប់គ្រាន់ដើម្បីប្រលងជាប់យកបណ្ណបើកបរម៉ូតូកង់បីឱ្យបានគ្រប់ៗគ្នា។

វគ្គបណ្តុះបណ្តាលនេះ មានចំនួន ១០វគ្គ និងមានអ្នកសិក្ខាកាមចូលរួមសរុបចំនួន ៨១១នាក់ ហើយបានរៀបចំប្រឡងយកបណ្ណបើកបរយានយន្តចំនួន ១១លើក ក្នុងនោះអ្នកចូលរួមប្រឡងទ្រឹស្តីសរុបចំនួន ៣៤៧នាក់(ប្រឡងឡើងវិញ១២៦នាក់) ជាប់១១៥នាក់ ស្មើនឹង៣៤% ធ្លាក់១៩៧នាក់ ស្នើនឹង៥៧% និងអវត្តមាន ២៩នាក់ ស្នើនឹង៩%។ អ្នកប្រឡងដៃចង្កូតសរុបចំនួន ១៣៧នាក់ (ប្រឡងឡើងវិញ ២២នាក់) ជាប់១០៧ ស្នើនឹង៧៨% ធ្លាក់ ៣០នាក់ ស្មើ២២%៕

ដោយ ៖ ង៉ាន់ ទិត្យ
រូបភាព ៖ រិន រចនា