ហាណូយ៖ សមាគមអ្នកនាំចេញ និងផលិតអាហារសមុទ្រវៀតណាម ហៅកាត់ VASEP បានរាយការណ៍ថា ការនាំចេញជលផលរបស់វៀតណាម បានឈានដល់ ៧,១៦ពាន់លានដុល្លារ ក្នុងរយៈពេល៩ខែ កន្លងមកនេះ កើនឡើង ៨,៥% ធៀបនឹងរយៈពេលដូចគ្នា កាលពីឆ្នាំមុន នេះបើតាមកាសែត VNexpress ចុះផ្សាយថ្មីៗនេះ។

ប្រភពបន្តថា គ្រាន់តែក្នុងខែកញ្ញា ប្រទេសនេះរកចំណូលបាន ៨៦៦លានដុល្លារ ពីការនាំចេញជលផល។ បង្គា នៅតែជាទំនិញជលផល ផ្តល់ចំណូលច្រើនជាងគេ ដល់វៀតណាម មានតម្លៃប្រហែល ២.៨ពាន់លានដុល្លារ ក្នុងរយៈពេល៩ខែមកនេះ ដែលកើនឡើង ១០.៥%។ ក្រៅពីនេះ ត្រីត្រា ក៏មានកំណើនគួរកត់សម្គាល់ គឺមានតម្លៃ ១.៤៦ពាន់លានដុល្លារអាមេរិក។ រីឯការនាំចេញត្រីធូណា បានធ្លាក់ចុះទំហំនាំចេញ ចាប់តាំងពីខែសីហាមក ដោយសារកង្វះខាតវត្ថុធាតុដើម ប៉ុន្តែ នៅតែកើនឡើងតម្លៃ ១៦% ដែលមានជាង ៧០០លានដុល្លារ ចាប់ពីខែមករា ដល់ខែកញ្ញា មកនេះ។ ក្រៅពីនេះ ក៏មានក្តាម ដែលផ្តល់ចំណូល ប្រមាណ២២៧លានដុល្លារផងដែរ។

VASEP ព្យាករណ៍ថា តម្លៃនាំចេញសរុបនៃផលិតផលនេសាទ ពេញមួយឆ្នាំ២០២៤ នឹងកើនឡើងដល់ ៩.៥ពាន់លានដុល្លារ មានកំណើន ៧% បើធៀបនឹងឆ្នាំ២០២៣។

អាមេរិក ចិន និងអឺរ៉ុប គឺជាទីផ្សារសំខាន់របស់ទំនិញជលផលវៀតណាម ដែលបង្កើនតម្រូវការ។ ក្រៅពីនេះ ក៏មានជប៉ុន, កូរ៉េខាងត្បូង, អូស្ត្រាលី និង នូវែលហ្សេឡង់ ទៀតផង នេះបើតាមកាសែត VNepxress ដដែល៕

ប្រភពពី VNepxress ប្រែសម្រួល៖ សារ៉ាត