(ភ្នំពេញ)៖ ទីប្រឹក្សាផ្ទាល់សម្តេចតេជោ ហ៊ុន សែន បានថ្លែងលើកទឹកចិត្តកីឡាករទូកថា លទ្ធផលចាញ់ឈ្នះ មិនជាបញ្ហាទេ សំខាន់ញាំងឱ្យព្រះរាជពិធីបុណ្យអុំទូកសប្បាយរីករាយ ។ ឯកឧត្តម ឧត្តមសេនីយ៍ឯក គឹម រស្មី អគ្គលេខាធិការរងក្រសួងការពារជាតិ និងជាអនុប្រធានក្រុមការងារជួយមូលដ្ឋានសង្កាត់ព្រែកថ្មី ខណ្ឌច្បារអំពៅ រាជធានីភ្មំពេញ បានថ្លែងក្នុងនាមតំណាងនាយឧត្តមសេនីយ៍ ហ៊ុយ ពិសិដ្ឋ រដ្ឋលេខាធិការក្រសួងការពារជាតិ ប្រចាំការអចិន្រ្តៃយ៍នៅបញ្ជាការដ្ឋានអង្គរក្ស អនុប្រធានក្រុមការងារជួយមូលដ្ឋានខណ្ឌច្បារអំពៅ និងជាប្រធានក្រុមការងារជួយមូលដ្ឋានសង្កាត់ព្រែកថ្មី ក្នុងពិធីក្រុងពាលីចុះទូក “ង” ឈ្មោះ “ពិសិដ្ឋមរកតអម្ពវ័នតេជោសែនជ័យ” ដែលស្ថិតនៅក្នុងវត្តអម្ពវ័ន សង្កាត់ព្រែកថ្មី ខណ្ឌច្បារអំពៅ ទៅទឹកទន្លេ ដើម្បីហ្វឹកហាត់ត្រៀមចូលរួមអុំប្រណាំង ទូក ង នៅខេត្តកណ្តាល នាថ្ងៃទី១៧-១៨ ខែតុលា ឆ្នាំ២០២៤ នឹងរៀបចំថែរក្សាប្រពៃណីលើកស្ទួយវិស័យកីឡាអុំទូក និងបង្កបរិយាកាសសប្បាយរីករាយរបស់បងប្អូនប្រជាជន ក្រោមម្លប់សន្តិភាព ។

ឯកឧត្តម គឹម រស្មី បានបញ្ជាក់ថា ដើម្បីលើកទឹកចិត្តដល់កីឡាករប្រណាំងទូក «ង» សម្រាប់ចូលរួមប្រកួតរយៈពេល២ថ្ងៃ ឯកឧត្តមបាននាំយកអំណោយជាស្បៀងអាហារ និងថវិកាឧបត្ថម្ភដល់គណៈកម្មការ និងកីឡាករនៅក្នុងខណ្ឌច្បារអំពៅ ដែលមានចំណុះទូក និងគណៈកម្មការទូក ចំនួន ៩៥នាក់ ។

ឯកឧត្តម មានប្រសាសន៍ថា ដើម្បីអបអរសាទរពិធីបុណ្យអុំទូកដែលប្រព្រឹត្តទៅនៅថ្ងៃទី១៧-១៨ ខែតុលា ឆ្នាំ២០២៤ រដ្ឋបាលខេត្តកណ្តាល រៀបចំឱ្យអធិកអធមជាងមុន ជាមួយនឹងការត្រៀមកងកម្លាំងការពារសន្តិសុខ សណ្តាប់ធ្នាប់ និងសុវត្ថិភាពជូនប្រជាពលរដ្ឋ ខណៈពិធីដ៏អធិកអធមនេះ រដ្ឋបាលខេត្ត គ្រោងនឹងរៀបចំឱ្យមានការបាញ់កាំជ្រួច បណ្ដែតប្រទីបស្អាតៗ រៀបចំស្តង់លក់ដូរលក់ម្ហូបអាហារនំចំណី វត្ថុអនុស្សាវរីយ៍ជាច្រើន ជាមួយនឹងការប្រគុំតន្ត្រីកន្ត្រាក់អារម្មណ៍ដែលមានតារាល្បីៗនឹងចូលរួមច្រៀងកម្សាន្តជូនបងប្អូនប្រជាពលរដ្ឋផងដែរ។

ដើម្បីឱ្យគណៈកម្មការទូកចូលរួមប្រណាំងក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកនាឆ្នាំនេះ ឯកឧត្តម គឹម រស្មី បានលើកទឹកចិត្តដល់ក្រុមកីឡាករទាំងអស់ចៀសវាងការប្រើគ្រឿងស្រវឹង ថែរក្សាកម្លាំង ដើម្បីខិតខំប្រឹងប្រៀងហ្វឹកហាត់ត្រៀមអុំដណ្តើមយកជ័យជំនះ ជូនខណ្ឌជ្រោយចង្វារ និងក្រុមគ្រួសារយើង។ បើទោះបីលទ្ធផលចាញ់ឈ្នះក៏ដោយក៏មិនជាបញ្ហាទេ ព្រោះកីឡាតែងមានចាញ់ មានឈ្នះ ប៉ុន្តែយើងចូលរួមអុំទូកនេះ គឺដើម្បីអបអរព្រះរាជពិធីបុណ្យ ញាំងឲ្យព្រះរាជពិធីបុណ្យសប្បាយរីករាយ ។

ក្នុងឱកាសនេះ ឯកឧត្តម ក៏បានទទូចដល់កីឡាករ គណៈគ្រប់គ្រងទូក ណែនាំដល់កីឡាករទូក ត្រូវរួមសាមគ្គីគ្នាជាកម្លាំងតែមួយលើកស្ទួយកិត្តិយសជូនជាតិ ពិសេសដណ្តើមយកជ័យជំនះ មកជូនក្រុមយើង និងខណ្ឌច្បារអំពៅទាំងមូល ពិសេសក្រុមកីឡាករទូក ត្រូវរស់នៅប្រកបដោយអនាម័យ ហូបស្អាត ចៀសវាងការកើតមាននូវការរាគរូស ធ្វើឲ្យបាក់កម្លាំងខកខានមិនចូលរួមប្រកួតជាដើម។

ឯកឧត្តម ឧត្តមសេនីយ៍ឯក ក៏បាននាំយកអំណោយឧបត្ថម្ភរួមមាន៖ អង្ករ ២០០គីឡូក្រាម ទឹកសុទ្ធ ៣០កេស ខោអាវមួកចំនួន៣០០ និងថវិកា ៣លានរៀល ក្នុងនោះ ឯកឧត្តម និងសប្បុរសជន បានបរិច្ចាកថវិកា ជួសជុលទូក ង , ទិញច្រវ៉ា , លាបថ្នាំទូក , ទិញម៉ាស៊ីនសណ្តោងទូក ង , បោះពុម្ពខោអាវមួក សរុបថវិកាចំនួន ៦២០០ដុល្លារ ៕

ដោយ ៖ វណ្ណលុក