អភិបាលខេត្ត៖ អុំទូកខេត្តបាត់ដំបងឆ្នាំ២០២៤ ឆ្លុះបញ្ចាំងពីសមិទ្ធផលថ្មី និងការអភិវឌ្ឍរបស់ខេត្ត
បាត់ដំបង៖រដ្ឋបាលខេត្តបាត់ដំបង បានប្រារព្ធបើកពិធីប្រណាំងទូក និងបណ្ដែតប្រទីបជាផ្លូវការកាលពីរសៀលថ្ងៃទី១៦ ខែតុលា ឆ្នាំ២០២៤ នៅតាមដងស្ទឹងសង្កែ ក្រុងបាត់ដំបងដែលមាន ទូកចូលរួមប្រកួតប្រជែងចំនួន៤២ទូក និងកីឡាករ-កីឡាការិនីចំនួន ១ ៤៩០នាក់។ពិធីនេះប្រព្រឹត្តទៅរយៈពេល២ថ្ងៃចាប់ពីថ្ងៃទី១៦-១៧ ខែតុលាក្រោមអធិបតីភាពឯកឧត្តម អ៊ុយ រី ប្រធានក្រុមប្រឹក្សាខេត្ត និង ឯកឧត្តម សុខ លូ អភិបាលខេត្តបាត់ដំបង។
ក្នុងពិធីបើកឯកឧត្តម សុខ លូ អភិបាលខេត្តបាត់ដំបង មានប្រសាសន៍ថា ក្នុងព្រឹត្តិការណ៍បុណ្យអុំទូក បណ្ដែតប្រទីបឆ្នាំនេះដែរ គណៈកម្មការខេត្តបានរៀបចំនូវកម្មវិធីមួយចំនួនមាន ការប្រណាំងទូក បណ្ដែតប្រទីប បង្ហោះគោម បាញ់កាំជ្រួច ការតាំងពិព័រណ៍ផលិតផល និងការប្រគំតន្ត្រី ។ឯកឧត្តមបន្តថា ការរៀបចំព្រឹត្តិការណ៍នេះពុំត្រឹមតែជាការថែរក្សា អភិរក្សទំនៀមទម្លាប់ប្រពៃណីពីដូនតានិយាយជារួម និងនិយាយដោយឡែកសម្រាប់ខេត្តបាត់ដំបងប៉ុណ្ណោះទេ តែក៏ដើម្បីបង្កើតបរិយាកកាសសប្បាយរីករាយជូនប្រជាជននៅក្នុងខេត្តផង និងដើម្បីទាក់ទាញភ្ញៀវទេសចរជាតិ អន្តរជាតិ និងប្រជាពលរដ្ឋពីទីជិតឆ្ងាយបានមកទស្សនាកម្សាន្ត និងបានឃើញសមិទ្ធផលនានា នៅក្នុងក្រុងបាត់ដំបង ខេត្តបាត់ដំបង ដែលកំពុងមានការអភិវឌ្ឍ។
ឯកឧត្តមអភិបាលខេត្តបាត់ដំបង បានរំលេចពីសមិទ្ធផលនានាថា ដូចជាទីធ្លាសួនច្បារសាធារណៈជាច្រើនកន្លែងសម្រាប់ដើរហាត់ប្រាណ ,សួនសម្តេចក្រឡាហោម ,វិមានឯករាជ្យ ,សួនធ្នង់៥៣វិមានឯករាជ្យ ,ការរៀបចំសោភណភាពច្រាំងស្ទឹងសង្កែ ,ការស្តារប្រព័ន្ធលូដែលជាគម្រោងរបស់ធនាគារអភិវឌ្ឍន៍អាស៊ី,ការក្រាលកៅស៊ូផ្លូវក្នុងក្រុង ,ការរៀបចំសួនច្បារ ,ការដាក់បង្គោលភ្លើងចរាចរណ៍ ,ការរៀបបចំភ្លើងបំភ្លឺសាធារណៈនៅតាមដងផ្លូវនិងតាមសួនសាធារណៈត្រើយខាងលិចស្ទឹងសង្កែ ,ការសង់បន្ទប់ទឹកអនាម័យ ,ការកែលម្អការពង្រីកនូវបណ្តាញអគ្គិសនីនិងទឹកស្អាតជាដើម។ការអភិវឌ្ឍនេះ បានបង្កបរិយាកាសដល់ការវិនិយោគ ឱ្យកាន់តែប្រសើរឡើងនិងដើម្បីចូលរួមចលនាប្រឡងប្រណាំងទីក្រុងស្អាត ដែលខេត្តបាត់ដំបងតែងបានទទួលពានរង្វាន់និងជ័យលាភីជាបន្តបន្ទាប់។
ឯកឧត្តម សុខ លូ គូសបញ្ជាក់ថា កត្តាដែលធ្វើឱ្យខេត្តបាត់ដំបងមានការរីកចម្រើនជាបន្តបន្ទាប់ និងមានឱកាសរៀបចំពិធីបុណ្យផ្សេងៗគឺអាស្រ័យដោយប្រទេសជាតិមានសុខសន្តិភាពពេញលេញ ក្រោមការដឹកនាំដ៏ឈ្លាសវៃប្រកបគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលបាននាំមកនូវសុខសុវត្ថិភាព សន្តិភាព ស្ថិរភាពនយោបាយល្អនិងបានផ្ដល់ឱកាសដល់ការអភិវឌ្ឍ៕
អត្ថបទ-រូបភាព៖ អ៊ុក សំអាន បប.
