បាត់ដំបង៖ពិធីបុណ្យអុំទូកនិងបណ្ដែតប្រទីបខេត្តបាត់ដំបង រយៈពេល ២ថ្ងៃ ចាប់ពីថ្ងៃទី១៦-១៧ ខែតុលា ឆ្នាំ២០២៤​បានបិទ​បញ្ចប់ ប្រកបទៅដោយភាពដ៏អស្ចារ្យនិងជោគជ័យក្រោមបរិយាកាសសប្បាយរីករាយ។តាមរយៈព្រឹត្តិការណ៍ជាទំនៀមទម្លាប់​ប្រពៃណី ប្រចាំឆ្នាំនេះ ​ខេត្តបាត់ដំបងទាក់ទាញទេសចរជាតិ អន្តរជាតិបានជាងមួយលាននាក់​មកទស្សនា និងដើរកម្សាន្ត។

បន្ទាប់ពីបិទបញ្ចប់ពិធីបុណ្យអុំទូកដ៏សែនសប្បាយរីករាយ លោក ហម អរុណ អនុប្រធានមន្ទីរនិងជាអ្នកនាំ​ពាក្យមន្ទីរ​ទេសចរណ៍ខេត្ត​បាត់ដំបង​​បានបញ្ជាក់ថា ​ពិធីបុណ្យអុំទូក​ពីរថ្ងៃឆ្នាំនេះ ខេត្តបាត់ដំបង ទាក់ទាញប្រជាពលរដ្ឋជិតឆ្ងាយ ភ្ញៀវទេសចរ​ជាតិ និងអន្តរជាតិ​ប្រមាណ​១លាន ១៧ម៉ឺននាក់។ ក្នុងនោះភ្ញៀវទេស​ចរអន្តរជាតិ​ជិត៥០០នាក់។

ប្រជាពលរដ្ឋដែលបានមកចូលរួមមកទស្សនា និងកម្សាន្តក្នុង​បុណ្យអុំទូកបានសរសើរ អុំទូកឆ្នាំខេត្តបាត់ដំបងធ្វើបានល្អ។ បរិយា​កាស សប្បាយរីករាយនិងប្លែកភ្នែកគួរឱ្យគយគន់។ប្រជាពលរដ្ឋក៏​បានថ្លែងអំណរគុណដល់រដ្ឋបាល​ខេត្ត ដែលរៀបចំ​ឱ្យមានពិធី​បុណ្យ​អុំទូកពីមួយឆ្នាំទៅមួយឆ្នាំកាន់តែល្អ កាន់តែសប្បាយរីករាយ។

សូមបញ្ជាក់ថាឆ្នាំ២០២៤នេះ រដ្ឋបាលខេត្តបាត់ដំបង បានរៀប​ចំពិធីបុណ្យអុំទូក និងបណ្ដែតប្រទីបខ្នាតធំ ប្រទីបដូនតា រយៈពេល​២​ថ្ងៃ ចាប់ពីថ្ងៃទី១៦-១៧ខែតុលានៅតាមបណ្ដោយដងស្ទឹងសង្កែ ក្រុងបាត់ដំបង។ពេលរាត្រីមានកម្មវិធី​​​មួយចំនួន ដូចជា​ការដាក់​តាំងបណ្ដែតប្រទីប ការបង្ហោះគោម បាញ់កាំជ្រួច ការតាំងពិព័រណ៍​ផលិតផលនិងការប្រគំតន្ត្រីជាដើម​នៅរាត្រីថ្ងៃ​បញ្ចប់​ពិធីបុណ្យ​អុំទូក ក៏មានក្បួនដង្ហែប្រទីបដូនតា ធ្វើពីដើមចេក ស្លឹកចេក និងកន្ទោងប្រទីប ដើម្បីជាការបង្ហាញ​និងបង្កើតភាពទាក់ទាញ​ដល់ភ្ញៀវ​ទេសចរជាតិ អន្តរជាតិ និងប្រជាពលរដ្ឋពីគ្រប់មជ្ឈដ្ឋានដែលមកកម្សាន្ត៕
( អត្ថបទ-រូបភាព៖ អ៊ុក សំអាន បប.)