ក្រុមហ៊ុនជប៉ុនចំនួន១១ ចាប់អារម្មណ៍មកពិនិត្យផ្ទាល់ពីសក្ដានុពលវិនិយោគនៅកម្ពុជា បន្ទាប់ពីបទបង្ហាញដោយឯកអគ្គរាជទូតកម្ពុជាប្រចាំប្រទេសជប៉ុន និងមន្ត្រីពាណិជ្ជកម្មកម្ពុជា
ភ្នំពេញ៖ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន បានដឹកនាំសហការីចូលរួមធ្វើបទបង្ហាញនៅក្នុងសិក្ខាសាលា ស្តីអំពី “បរិយាកាសធុរកិច្ច និងកាលានុវត្តភាពវិនិយោគនៅកម្ពុជា” ដែលប្រព្រឹត្តទៅក្នុងព្រឹត្តិការណ៍ពិព័រណ៍ Overseas Investment Expo ក្នុងទីក្រុងតូក្យូ ។សិក្ខាសាលានេះ មានការអញ្ជើញចូលរួមពីប្រធានក្រុមហ៊ុន និងតំណាងក្រុមហ៊ុនជប៉ុន ប្រមាណ ៤០នាក់ ដែលប្រព្រឹត្តទៅនារសៀលថ្ងៃទី១៨ ខែតុលា ឆ្នាំ២០២៤។ដោយឡែកព្រឹត្តិការណ៍ពិព័រណ៍ Overseas Investment Expo ត្រូវបានគេរាយការណ៍ថា មានស្តង់ចំនួន ១០៥ ចូលរួមពីបណ្តាក្រុមហ៊ុន និងសហគ្រាសធំៗ មកពីប្រទេសចំនួន ១៦ ក្នុងនោះមាន ៧ប្រទេស រួមទាំងកម្ពុជាផងដែរ មកពីតំបន់អាស៊ាន ។
ក្នុងឱកាសនេះឯកឧត្តមឯកអគ្គរាជទូតកម្ពុជា បានរំលឹកអំពីទំនាក់ទំនងការទូតរវាងកម្ពុជា-ជប៉ុន ដែលរហូតមកដល់បច្ចុប្បន្ន ចំណងមិត្តភាពទ្វេភាគីកម្ពុជា និងជប៉ុន ត្រូវបានដំឡើងទៅដល់កម្រិត “ភាពជាដៃគូយុទ្ធសាស្រ្តគ្រប់ជ្រុងជ្រោយ”។
ឯកឧត្តម ទុយ រី ក៏បានលើកឡើងអំពីកិច្ចសហប្រតិបត្តិការជាមួយក្រសួង-ស្ថាប័នជប៉ុន អង្គការ ជេត្រូ (JETRO) មជ្ឈមណ្ឌលអាស៊ាន-ជប៉ុន ព្រមទាំងសមិទ្ធផល និងសកម្មភាពនានារបស់ស្ថានទូត ដែលបានរៀបចំកន្លងមក និងបានកំពុងអនុវត្តបន្តទៀត តាមយុទ្ធសាស្រ្តការទូតសេដ្ឋកិច្ចកម្ពុជា ជាពិសេសពិព័រណ៍កម្ពុជា ដែលទើបបានបញ្ចប់ដោយជោគជ័យកាលពីខែឧសភា ការរៀបចំសិក្ខាសាលាវិនិយោគ កាលពីខែសីហា ថ្មីៗនេះ ទិវាវប្បធម៌ ពិធីបុណ្យជាតិ និងពិធីសាសនាផ្សេងៗជាដើម។
ឯកអគ្គរាជទូតកម្ពុជាបានគូសបញ្ជាក់ផងដែរថា រាជរដ្ឋាភិបាលកម្ពុជា តែងតែយកចិត្តទុកដាក់បំផុត ចំពោះវិនិយោគិនជប៉ុនដែល បានកំពុងធ្វើការវិនិយោគនៅប្រទេសកម្ពុជា ដោយក្នុង ១ឆ្នាំ ២ដង រាជរដ្ឋាភិបាលកម្ពុជា ជាពិសេសក្រុមប្រឹក្សាអភិវឌ្ឍន៍កម្ពុជា តែងតែរៀបចំវេទិកា ជួបពិភាក្សា ស្តាប់សំណូមពរ និងដោះស្រាយបញ្ហាកង្វល់ជូនធុរជន និងអ្នកវិនិយោគជប៉ុន ដែលមានការចូល រួមដោយ ឯកអគ្គរដ្ឋទូតជប៉ុន ប្រចាំកម្ពុជា ធុរជន និងអ្នកវិនិយោគជប៉ុននៅទីនោះ។
ឯកឧត្តមឯកអគ្គរាជទូត ក៏បានជំរុញនិងលើកទឹកចិត្តអ្នកវិនិយោគិនជប៉ុន ឱ្យពិនិត្យលទ្ធភាពទៅដាក់ទុនវិនិយោគ និងធ្វើធុរកិច្ច ពាណិជ្ជកម្មនៅប្រទេសកម្ពុជា ក៏ដូចជាអញ្ជើញប្រជាជនជប៉ុនទៅទស្សនាកម្ពុជាឱ្យកាន់តែច្រើនឡើងថែមទៀត។
នៅក្នុងសិក្ខាសាលានោះទៀត តាមរយៈការធ្វើបទបង្ហាញរបស់ លោក ស៊ីន សារ៉ាយ អនុព័ន្ធពាណិជ្ជកម្ម អមស្ថានទូតកម្ពុជា ដែល ជាវាគ្មិនក្នុងកម្មវិធីសិក្ខាសាលានេះ បាននាំឲ្យអ្នកវិនិយោគិន និងធុរជនជប៉ុន ដែលបានចូលរួមទាំងអស់ បានជ្រាប និងកាន់ តែយល់ ច្បាស់អំពីស្ថានភាពសេដ្ឋកិច្ចពាណិជ្ជកម្មរបស់កម្ពុជា ជាពិសេសអំពីឱកាសវិនិយោគ និងសក្ដានុពល វិនិយោគនៅកម្ពុជា រួមទាំង ច្បាប់ស្ដីពីវិនិយោគនៅកម្ពុជា របបវិនិយោគដែលមានភាពទាក់ទាញនិងអនុគ្រោះ កិច្ចសម្រួលវិនិយោគ ការលើកទឹកចិត្តវិនិយោគ និងសេវាថែទាំវិនិយោគផងដែរ។
បន្ទាប់ពីបានចូលរួមស្តាប់ការធ្វើបទបង្ហាញនៅក្នុងសិក្ខាសាលានេះរួម មានក្រុមហ៊ុន ចំនួន៦ ត្រូវបានគេបញ្ជាក់ថា បានមាន ការចាប់អារម្មណ៍ខ្ពស់ អំពីសក្ដានុពលវិនិយោគនៅកម្ពុជា និងបានបញ្ជាក់ពីគម្រោងអញ្ជើញទៅប្រទេសកម្ពុជា ដើម្បីស្វែងយល់ ស្ថានភាពជាក់ស្តែងបន្ថែមទៀត ក្នុងទិសដៅពិនិត្យលទ្ធភាពវិនិយោគនៅកម្ពុជា នៅក្នុងខែខាងមុខ។ ដោយឡែកក៏នៅមាន ក្រុមហ៊ុនចំនួន ៥ ផ្សេងទៀត នឹងពិចារណាទៅទស្សនានៅកម្ពុជា ក្នុងលក្ខណៈទេសចរណ៍ផងដែរ ៕
អត្ថបទ ៖ គង់ សុផុល
