ពិធីរត់ភ្លើងគប់ការប្រកួតកីឡាជាតិលើកទី៤ និងកីឡាជាតិជនពិការលើកទី២ បានទៅដល់ខេត្តកំពង់ឆ្នាំង
កំពង់ឆ្នាំង៖ពិធីរត់ភ្លើងគប់ការប្រកួតកីឡាជាតិលើកទី៤និងកីឡាជាតិជនពិការលើកទី២ក្រោមប្រធានបទ”កីឡាជាតិដើម្បី ព្រែកជីកហ្វូណនតេជោ” បានរៀបចំធ្វើឡើងនៅលើទឹកដីខេត្តកំពង់ឆ្នាំងព្រឹកថ្ងៃទី១៩ ខែតុលា ឆ្នាំ២០២៤ ដោយមានការ អញ្ជើញចូលរួមពីឯកឧត្តម ប៊ូ ជុំសេរី រដ្ឋលេខាធិការក្រសួងអប់រំយុវជននិងកីឡា ឯកឧត្តម ស៊ីវ រុន ប្រធានក្រុមប្រឹក្សា ខេត្តកំពង់ឆ្នាំង ឯកឧត្តម ស៊ុន សុវណ្ណារិទ្ធិ អភិបាលខេត្ត ព្រមទាំងប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបី កីឡាករកីឡាការិនី សិស្សានុសិស្ស កាកបាទក្រហម អង្គការ សមាគមនានា និងប្រជាពលរដ្ឋយ៉ាងច្រើនកុះករ។
ការប្រកួតកីឡាជាតិលើកទី៤និងកីឡាជាតិជនពិការលើកទី២ មានកីឡាករចួលរួមសរុបចំនួន ៥ ៣៣៩ នាក់មកពីបណ្ដា ២៥រាជធានី ខេត្ត និង២ក្រសួង ។ឯកឧត្តម ប៊ូ ជុំសេរី បញ្ជាក់ថា មុនឈានដល់ថ្ងៃបើកការប្រកួតក្រសួងបានជ្រើសខេត្ត ចំនួន៥ ឱ្យធ្វើជាម្ចាស់ផ្ទះ ក្នុងពិធិរត់ភ្លើងគប់កីឡា ក្នុងនោះមាន រាជធានីភ្នំពេញ ខេត្តកែប ខេត្តស្វាយរៀង ខេត្តកំពង់ឆ្នាំង និងខេត្តព្រះសីហនុ ក្នុងគោលបំណងផ្សព្វផ្សាយបំផុសចលនាកីឡាជាតិ ស្របតាមយុទ្ធនាការនៃការអប់រំ កីឡារស់ក្នុងសន្តិភាព និងកីឡាជាតិដើម្បីព្រែកជីកហ្វូណនតេជោ។ ការរៀបប្រកួតកីឡាថ្នាក់ជាតិនេះគឺការស្ទាបស្ទង់កម្រិតកីឡាករ និងទទួលបទពិសោធន៍បន្ថែមទៀត តាមស្តង់ដា ដើម្បីត្រៀមធ្វើជាម្ចាស់ផ្ទះក្នុងការប្រកួតកីឡា យុវជន អាស៊ីលើកទី ៥ ។
សូមបញ្ជាក់ថា ពិធី រត់ភ្លើងគប់ការប្រកួតកីឡាជាតិលើកទី៤និងកីឡាជាតិជនពិការលើកទី២ បានរៀបចំប្រគល់ទទួលភ្លើងគប់ នៅសួនដំរី ស ក្នុងភូមិទួលក្រឡាញ់ ហើយកាន់រត់មកកាន់វេទិកានៅខាងមុខបញ្ជាការកងរាជអាវុធហត្ថខេត្ត មានចម្ងាយជាង២គីឡូម៉ែត្រ ដោយមានការចូលរួមគាំទ្រពីប្រជាពលរដ្ឋតាមដងផ្លូវយ៉ាងច្រើនកុះករ៕
ដោយ៖សុខ គឹមសៀន
