សៀមរាប៖ពិធីផ្សព្វផ្សាយស្តីពីការលុបបំបាត់ និងបញ្ចប់​អំពើការជួញដូរមនុស្សលើកទី៣ឆ្នាំ២០២៤ត្រូវបានប្រារព្ធនៅសួន ជ្រឹង មុខព្រះរាជដំណាក់ក្រុងសៀមរាប ដោយមានមន្រ្តីថ្នាក់ដឹកនាំ មន្រ្តីរាជការមកអង្គភាព មន្ទីរ ស្ថាប័ន និងភ្ញៀវជាតិ អន្តរជាតិ បណ្តាអង្គការដៃគូររបស់​រាជរដ្ឋាភិបាល សិស្ស លោកគ្រូ-អ្នកគ្រូ យុវជនស.ស.យ​.ក យុវជនកាយរិទ្ធីយ៉ាងច្រើនកុះករ។

ពិធីដែលបានប្រព្រឹត្តទៅដើរដង្ហែជាក្បួនកាលពីថ្ងៃទី១៩ ខែតុលា​ដឹកនាំដោយលោកជំទាវ ជូ ប៊ុនអេង រដ្ឋលេខា​ធិការក្រសួងមហាផ្ទៃនិងជាអនុប្រធាន អចិន្រ្តៃយ៍ គណៈ​កម្មាធិការប្រយុទ្ធប្រឆាំងអំពើជួញដូរមនុស្ស(គ.ជ.ប.ជ ) អមដោយលោកស្រី ម៉ន នីរង្សីអភិបាលរងខេត្ត អនុ​ប្រធានអចិន្រ្តៃយ៍ គ.ខ.ប.ជ ខេត្តសៀមរាប និងលោក លោកស្រីតំណាងស្ថានទូតប្រចាំកម្ពុជា ដូចជា អាមេរិក អូស្រ្តាលី ថៃ ហ្វីលីពីន វៀតណាម និងឡាវ ។

ពិធីនេះដើម្បីផ្សព្វផ្សាយ និងលើកកម្ពស់ការយល់​ដឹងទៅដល់ប្រជាពលរដ្ឋ សិស្សានុសិស្ស មន្ត្រីរាជការ និងសាធារណជន អំពីអំពើជួញដូរមនុស្ស ក្នុងគោលបំណង ចូលរួមប្តេជ្ញាចិត្តជាមួយគ្នាក្នុង​ការប្រយុទ្ធប្រឆាំងអំពើជួញដូរមនុស្ស ។នេះជាអ្វី
ដែលលោកស្រីអភិបាលរងខេត្តសៀមរាបបានលើកឡើង ។

បើតាមការលើកឡើងរបស់លោកស្រី ម៉ន នីរង្សី ខេត្តសៀមរាបជាខេត្តសម្រាប់ឆ្លងកាត់ការនាំចេញមនុស្សដោយខុសច្បាប់ និងកន្លែងសម្រាប់ប្រព្រឹត្តបទល្មើស​ផងដែរពីជនទុច្ចរិត។អាជ្ញាធរនិងអង្គការដៃគូរបានប្រឹង​ប្រែង​រិះរកគ្រប់វិធានការរួមគ្នាដោះស្រាយលើបញ្ហានេះ ឈានទៅសម្រេចឱ្យបាននូវការលុបបំបាត់គ្រប់ទម្រង់នៃអំពើជួញដូរមនុស្សព្រមទាំងបានរៀបចំនូវ យន្តការ​ការពារចំពោះប្រជាពលរដ្ឋទូទៅ ពលករ ធុរកិច្ចជន ភ្ញៀវជាតិ និងអន្តរជាតិទាំងអស់ដោយមិនប្រកាន់នូវ​ជាតិសាសន៍ អ្វីទាំងអស់។

លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ បានមានប្រសាសន៍ យើងទាំងអស់គ្នានៅក្នុងពិធីនេះ​តំណាងឱ្យមនុស្ស ទូទាំងប្រទេសកម្ពុជា ។យើងបោះ​ជំហានឆ្ពោះទៅមុខ ដើម្បីប្រយុទ្ធប្រឆាំងអំពើជួញ​ដូរមនុស្ស ។យើងដឹងហើយថាមានមនុស្ស មួយក្រុមកំពុងតែព្យាយាមបំផ្លាញពិភពលោក។លោកជំទាវបន្តថា មនុស្សមួយក្រុមកំពុងតែរិះរកមធ្យោ​បាយដើម្បីបំផ្លាញ មនុស្សទៅតាមគ្រប់ទម្រង់នៃ​បទល្មើស ជាពិសេសគឺអំពើជួញដូរមនុស្ស។ក្រុមទាំងនេះមិនបានលើកលែងចំពោះមនុស្ស គ្រប់វ័យ គ្រប់សញ្ជាតិ គ្រប់ពណ៌សម្បុរ គ្រប់ឋានៈតួនាទី ដោយអំពើឃោរឃៅគិតតែពីផលចំណេញ លើមនុស្សដូចគ្នា ប៉ុន្តែមានមនុស្សជាច្រើនកំពុង​តែឈរចាំជួយយើង ។កំពុងតែការពារយើង និងផ្តល់នូវសេចក្តីសុខដល់យើង។ ដូច្នេះត្រូវរួមដៃគ្នា ដើម្បីប្រយុទ្ធប្រឆាំងអំពើជួញដូរមនុស្សទាំងអស់គ្នា ៕

ដោយ៖ ប៊ុន រដ្ឋា