បាងកក៖ នាយករដ្ឋមន្ត្រីថៃ លោកស្រី Paetongtarn Shinawatra បាននិយាយថា លោកស្រីមិនព្រួយបារម្ភអំពីគណៈកម្មាធិការជាតិ រៀបចំការបោះឆ្នោត ហៅកាត់ EC ស៊ើបអង្កេតគណបក្សភឿថៃ និងដៃគូចម្រុះ ចំនួន៦ របស់ខ្លួន ជុំវិញការចោទប្រកាន់ដែលថា ឪពុករបស់លោកស្រី «គ្រប់គ្រង» រដ្ឋាភិបាល នេះបើតាមកាសែត The Nation កាលពីថ្ងៃចន្ទ។

លោកស្រី ​Paetongtarn គឺជាមេដឹកនាំគណបក្សភឿថៃ និងជាកូនស្រីរបស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់។ លោកស្រីបានបាននិយាយ ពេលដែលមានការសួរសំណួរ អំពីការស៊ើបអង្កេតដែលមិនទាន់សម្រេចថា «នាងខ្ញុំមិនបារម្ភទេ» នេះបើតាមប្រភពពី The Nation ដដែល។

កាលពីថ្ងៃសុក្រ ស្ថាប័ន EC បានសម្រេចចិត្ត បង្កើតគណៈកម្មាធិការស៊ើបអង្កេតមួយ បន្ទាប់ពីខ្លួនបានពិនិត្យញត្តិចំនួន ៦ ដែលស្វែងរកការរំលាយគណបក្សភឿថៃ និង ដៃគូចម្រុះរបស់ភឿថៃ ជុំវិញការចោទប្រកាន់ ដែលលើកឡើងថា មានការអនុញ្ញាតឱ្យលោក ថាក់ស៊ីន ណែនាំ និងមានឥទ្ធិពល លើការសម្រេចចិត្ត របស់ពួកគេ នៅក្នុងរដ្ឋាភិបាល៕

ប្រភពពី The Nation ប្រែសម្រួល៖ សារ៉ាត