បរទេស៖ តុលាការ ប្រទេសប៉េរូ កាលពីថ្ងៃចន្ទ បានកាត់ទោសអតីតប្រធានាធិបតី លោក Alejandro Toledo ឱ្យជាប់ពន្ធនាគារ ជាង២០ឆ្នាំ ពីបទទទួលសំណូករាប់លានដុល្លារ ពីក្រុមហ៊ុនសំណង់មួយ នៅប្រទេសប្រេស៊ីល ដែលមានរឿងអាស្រូវ។

តុលាការបានប្រកាស នៅក្នុងសវនាការ ​ដែលមានទាំងវត្តមាន បុរសវ័យ៧៨ឆ្នាំ រូបនេះ ចូលរួម ផងដែរ។ លោក Toledo បានដឹកនាំប្រទេស ស្ថិតនៅតំបន់អាមេរិកខាងត្បូង មួយនេះ ចន្លោះពីឆ្នាំ២០០១ ដល់ឆ្នាំ២០០៦។

លោក Toledo និយាយថា លោកមានជំងឺមហារីក និងបញ្ហាបេះដូង ហើយហាក់ដូចជាស្ងប់ស្ងាត់ ខណៈដែលត្រូវបានគេរកឃើញថា មានពិរុទ្ធ ពីបទឃុបឃិតគ្នា និងការលាងលុយ ជុំវិញការទទួលយកប្រាក់ ៣៥លានដុល្លារ ពីក្រុមហ៊ុន Odebrecht ។

តុលាការបានរកឃើញថា លោក Toledo បានទទួលយកសំណូក ជាថ្នូរនឹងការដេញថ្លៃ សាងសង់ផ្លូវហាយវេអន្តរជាតិ ភ្ជាប់រវាងឆ្នេរ ប៉េរូ និងឆ្នេរ ប្រទេសប្រេស៊ីល។

កាលពីឆ្នាំមុន លោក Toledo ត្រូវបានធ្វើបត្យាប័ន ពីសហរដ្ឋអាមេរិក ជាកន្លែងដែលលោកបានរស់នៅ អស់ជាច្រើនឆ្នាំ មុនពេលមកទទួលទោស៕

ប្រភពពី AFP ប្រែសម្រួល៖ សារ៉ាត