(ភ្នំពេញ)៖ កម្ពុជា នឹងរៀបចំព្រឹត្តិការណ៍ដ៏អស្ចារ្យ មានតែមួយគត់ក្នុងប្រទេស គឺពិព័រណ៍យន្តហោះ និងបច្ចេកវិទ្យា ប្រចំាឆ្នាំ២០២៤ ដែលនឹងប្រព្រឹត្តទៅនៅខែធ្នូ ចុងឆ្នាំនេះ ។ យោងតាមការផ្សាយនៅទំពំហ្វេសប៊ុកផ្លូវការ Air & Tech Show -ពិព័រណ៍យន្តហោះ និង បច្ចេកវិទ្យា បានបញ្ជាក់ថា ព្រឹត្តិការណ៍ពិព័រណ៍យន្តហោះ និងបច្ចេកវិទ្យា លើកទី៤នេះ នឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី ១៣ ដល់ថ្ងៃទី ១៥ ខែធ្នូ ឆ្នាំ២០២៤ នៅមូលដ្ឋានទ័ពអាកាសពោធិចិនតុង ។

ការដាក់តាំងពិព័រណ៍នេះ នឹងបើកឲ្យសាធារណៈជនទូទៅ ទាំងភ្ញៀវជាតិ និង​អន្តរជាតិ បានចូលទស្សនាដោយសេរី ស្តង់ដែលដាក់តាំងបង្ហាញប្រភេទ​យន្តហោះផ្សេងៗជាច្រើនគ្រឿង រួមមានទាំងយន្តហោះក្នុងប្រទេស និងមកពី​ក្រៅប្រទេស និងឧបករណ៍បច្ចេកវិទ្យាប្លែកៗ ដែលកើតចេញគំនិតច្នៃប្រឌិតឥត​ដែនកំណត់របស់យុវជនកម្ពុជា ។ នៅក្នុងរយៈពេល ៣ថ្ងៃនៃព្រឹត្តិការណ៍នេះ ក៏នៅ​មាន ការធ្វើបទបង្ហាញចែករំលែកចំណេះដឹងផ្សេងៗ ពីសំណាក់សហគ្រិនមកពី​បណ្ដា​ក្រុម​ហ៊ុនផ្សេងៗដែលពាក់ព័ន្ធនឹងវិស័យបច្ចេកវិទ្យាផងដែរ។

សេចក្តីរាយការណ៍បានបញ្ជាក់ថា នៅក្នុងពិធីនោះ ក្រៅពីពិព័រណ៍យន្តហោះ និង បច្ចេកវិទ្យា លើកទី៤ ក៏មានរៀបចំនូវការប្រកួតប្រជែងស្នាដៃបច្ចេកវិទ្យា ដែលបង្កើត ឡើងដោយយុវជនកម្ពុជា មកពីគ្រប់មជ្ឈដ្ឋាន លើវិញ្ញាសាចំនួន៤ ដែលរួមមាន ការ ប្រកួត មនុស្សយន្ត ការប្រកួតយន្តហោះបញ្ជា ការប្រកួតរ៉ូបូតចម្បាំង និងការប្រកួត ប្រណាំងដ្រូន។

សូមជម្រាបជូនថា កម្ពុជាធ្លាប់បានរៀបចំព្រឹត្តិការណ៍ពិព័រណ៍យន្តហោះ និងបច្ចេក វិទ្យា (Air & Tech Show) ចំនួន៣លើករួចមកហើយ ដោយចាប់ផ្តើមដំបូងនៅក្នុង ឆ្នាំ២០១៨, បន្ទាប់មក នៅឆ្នាំ២០១៩ និងឆ្នាំ២០២១ ដែលការណោះកម្មវិធី​ដ៏អស្ចារ្យ​នេះបានប្រព្រឹត្តទៅប្រកបដោយភាពជោគជ័យ និងទទួលបានសន្ទុះគាំទ្រ​យ៉ាង​ខ្លាំងខ្លាពីសាធារណជននៅក្នុងប្រទេសផងដែរ ៕

អត្ថបទ ៖ គង់ សុផុល