ហាណូយ៖ ផ្អែកតាមសេចក្តីព្រាងក្រឹត្យថ្មី របស់ក្រសួងសន្តិសុខសាធារណៈវៀតណាម នឹងមានការបង្កើនទំហំផាកពិន័យ ដល់អ្នកបើកឡានដែលបំពានភ្លើងក្រហម ចំនួន៦ដង មានរហូតដល់៤៣០លានដុល្លារអាមេរិក ខណៈដែលអ្នកជិះម៉ូតូវិញ អាចផាកដល់ជាង២៣០ដុល្លារ នេះបើតាមកាសែត VNexpress។

យោងតាមនាយកដ្ឋាននគរបាលចរាចរណ៍របស់ក្រសួង បានបង្ហាញថា ការបើកបរបំពានភ្លើងក្រហម គឺជាបទល្មើស ដែលកើតមានញឹកញាប់ ជាពិសេស នៅទីក្រុងហាណូយ និងតំបន់ផ្សេងទៀត។ នាយកដ្ឋានបានកត់សម្គាល់ថា អាកប្បកិរិយានេះច្រើនកើតឡើង នៅពេលព្រឹកព្រលឹម និងយប់នៅតាមដងផ្លូវ ដែលមិនមានប៉ូលិសចរាចរណ៍។

សេចក្តីព្រាងក្រឹត្យថ្មី តម្រូវឲ្យផាកអ្នកបើកបររថយន្តបំពាន ចន្លោះពី ៩លានដុង ឬ ជាង៣៥០ដុល្លារ ទៅដល់ ១១លានដុង ឬ ជាង៤៣០ដុល្លារអាមេរិក។ អ្នកជិះម៉ូតូដែលបើកភ្លើងឆ្លងភ្លើងក្រហម អាចប្រឈមនឹងការផាកពិន័យរហូតដល់ទៅ ៦លានដុង ឬ ២៣៦ ដុល្លារ សុទ្ធតែកើនឡើង ៦ដង ទាំងម៉ូតូ និងឡាន បើធៀបនឹងការផាកពិន័យ បច្ចុប្បន្ន។

ជាងនេះទៅទៀត ក្រសួងក៏ស្នើឲ្យចាប់ឃាត់ម៉ូតូ ពីអ្នកបើកបរ ដែលជិះប្រលែងដៃ ឬអត់កាន់ចង្កូតឡានជាដើម។ ម៉ូតូដែលត្រូវបានគេរកឃើញថា មានការកែប្រែមិនត្រឹមត្រូវ ក៏ត្រូវរឹបអូស ដូចអ្នកប្រើប្រាស់ប័ណ្ណក្លែងក្លាយផងដែរ នេះបើតាមកាសែត VNexpress៕

ប្រភព៖ VNexpress ប្រែសម្រួល៖ សារ៉ាត