ឯកឧត្តមរដ្ឋមន្ត្រី ជា វ៉ាន់ដេត ប្រកាសសមាសភាពក្រុមការងារចុះមូលដ្ឋានស្រុកទ្រាំងខេត្តតាកែវ
(តាកែវ)៖ ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ នៅព្រឹកថ្ងៃទី២៦ ខែតុលា ឆ្នាំ២០២៤ បានអញ្ជើញប្រកាសតែងតាំងសមាសភាពក្រុមការងាររាជរដ្ឋាភិបាលចុះមូលដ្ឋានស្រុកទ្រាំង ដែល ឯកឧត្តម សុខ ផេង និង ឯកឧត្តម សុខ ពុទ្ធិវុធ ជាសហប្រធានក្រុមការងារ។
ឯកឧត្តមបណ្ឌិត ជា វ៉ាន់ដេត ថ្លែងថា ក្នុងរយៈពេល ១ឆ្នាំហើយ រាជរដ្ឋាភិបាលអាណត្តិទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត បានធ្វើឱ្យប្រទេសកម្ពុជាយើង មានការរីកចម្រើនច្រើន ។ គោលដៅរបស់រាជរដ្ឋាភិបាល នីតិកាលទី៧នេះ គឺបន្តអ្វីដែលរដ្ឋាភិបាលចាស់បានបន្សល់ទុក ហើយនឹងធ្វើឲ្យកាន់តែប្រសើរឡើងថែមទៀត ។ ឧទាហរណ៍៖ លើការងារអប់រំ ៖ ការ ប្រឡងសញ្ញាបត្រមធ្យមសិក្សាទុតិយភូមិ គឺអ្នកចេះគឺជាប់។
សម្តេចបវរធិបតី បានធ្វើការកែទម្រង់ចាប់ពីបឋមសិក្សា ដោយបានចាប់ផ្តើមជ្រើសរើសសាលាបឋមសិក្សាចំនួន ៤២សាលានៅទូទាំងប្រទេស។ ដោយធ្វើការកែទម្រង់ឥរិយាបទរបស់កូនសិស្ស កែទម្រង់របៀបរបបគ្រប់គ្រងនៅក្នុងសាលា កែទម្រង់ឥរិយាបទ និងវិធីសាស្ត្រនៃការបង្រៀនរបស់លោកគ្រូ អ្នកគ្រូ ។
ដោយឡែកលើការងារកំណែរទម្រង់មន្ត្រីរាជការ ដោយបច្ចុប្បន្ននេះការជ្រើសរើសមន្ត្រីរាជការ គឺត្រូវឆ្លងកាត់ការប្រឡងប្រកបដោយភាពយុត្តិធម៌។ និងក្នុងវិស័យសុខាភិបាល ក៏បានធ្វើកំណែទម្រង់ ចាប់ពីថ្នាក់ជាតិ ដល់មូលដ្ឋាន ដើម្បីផ្តល់ការពិនិត្យព្យាបាលជូនប្រជាពលរដ្ឋ ឲ្យបានទាន់ពេលវេលា ប្រកបដោយវិជ្ជាជីវៈ។
ឯកឧត្តមរដ្ឋមន្ត្រី ក៏បានគូសបញ្ជាក់ពីលទ្ធផលការងាររបស់ក្រសួងប្រៃសណីយ៍ និងទូរគមនាគមន៍ ដែលអនុវត្តសម្រេចបាន និងទិសដៅការងារថ្មីៗ ដែលត្រូវអនុវត្តជាបន្តបន្ទាប់ទៀត និងបានកោតសរសើរដល់អាជ្ញាធរដែនដី និងអង្គភាពពាក់ព័ន្ធនានា ដែលបានសហការគ្នាបានយ៉ាល្អប្រសើរក្នុងការផ្តល់សេវាសាធារណជូនប្រជាពលរដ្ឋបានទាន់ពេលវេលា ជាពិសេសលើបញ្ហាគ្រឿងញៀននៅក្នុងមូលដ្ឋានបានយ៉ាងល្អប្រសើរ៕
អត្ថបទ ៖ ង៉ាន់ ទិត្យ
រូបភាព ៖ រិន រចនា
