រោងម៉ាស៊ីនកិនស្រូវមួយនៅខេត្តបាត់ដំបង មានសមត្ថភាពនាំអង្ករទៅទីផ្សារអឺរ៉ុប ចិន និងម៉ាឡេស៊ី
បាត់ដំបង៖ក្នុងចំណោមក្រុមហ៊ុនរោងម៉ាស៊ីនកិនស្រូវជាច្រើនដែលកំពុងធ្វើអាជីវកម្មនៅខេត្តបាត់ដំបង ក្រុមហ៊ុនហ្គោលដេនស្ដារ ក៏ជាក្រុមហ៊ុនលេចធ្លោមួយដែរ។ហ្គោលដេនស្ដារ អាចមានសមត្ថភាពកិននិងនាំចេញអង្ករប្រណីតប្រមាណជាង៦ម៉ឺនតោនក្នុងមួយឆ្នាំ នាំចេញទៅកាន់ទីផ្សារអឺរ៉ុប ចិន និងម៉ាឡេស៊ី ។
រោងម៉ាស៊ី់នកិនស្រូវហ្គោលដេនស្ដារស្ថិតស្រុកថ្មគោល ខេត្តបាត់ដំបង។ខណៈនេះរោងម៉ាស៊ីនកំពុងតែមមាញឹកក្នុងការប្រមូលទិញស្រូវយកមកសម្ងួត និងកែច្នៃអង្ករប្រណីត សម្រាប់នាំចេញទៅកាន់ទីផ្សារក្រៅប្រទេស។
លោក រ៉ី រដ្ឋា ម្ចាស់រោងម៉ាស៊ីនកិនស្រូវរបស់ក្រុមហ៊ុនហ្គោដេនស្តារ បានឱ្យដឹងថាក្នុងរដូវប្រមូលផលស្រូវវស្សាឆ្នាំ២០២៤នេះ រោងម៉ាស៊ីនកិនស្រូវហ្គោលដេនស្ដារកំពុងមមាញឹកក្នុងការប្រមូលទិញស្រូវនិងសម្រិតសម្រាំងសម្រាប់នាំអង្ករចេញ។លោកថាក្នុងមួយឆ្នាំៗរោងម៉ាស៊ីនខ្នាតធំស្វ័យប្រវត្តិកម្មមួយនេះ អាចមានសមត្ថភាពផលិត និងនាំចេញអង្ករប្រណិតប្រមាណជាង ៦ម៉ឺនតោនទៅកាន់ទីផ្សារអឺរ៉ុប ចិន និងម៉ាឡេស៊ី ជាដើម។
ម្ចាស់រោងម៉ាស៊ីនកិនស្រូវដដែលបន្ថែមថា រោងម៉ាស៊ីនរបស់លោកប្រមូលទិញស្រូវ ពីប្រជាកសិករក្នុងខេត្តបាត់ដំបង , ខេត្តពោធិសាត់ និងខេត្តបន្ទាយមានជ័យ។ការប្រមូលទិញប្រមាណ ១ ៥០០តោនក្នុងមួយថ្ងៃ។ស្រូវដែលរោងម៉ាស៊ីនរបស់លោកប្រមូលទិញ គឺជាប្រភេទស្រូវសែនក្រអូប និងស្រូវស្រង៉ែ ដែលជាប្រភេទស្រូវកំពុងតែមានតម្រូការទីផ្សារខ្ពស់។
ចំណែករោងម៉ាស៊ីនកិនស្រូវហ្គោលដេនស្ដារនេះទៀតសោត មានសមត្ថភាព ក្នុងការផលិត កែច្នៃ និងវេចខ្ចប់អង្ករនាំចេញប្រមាណ៥០០តោន ក្នុងមួយថ្ងៃ។លោក រដ្ឋា បន្តថា ក្រៅពីការនាំចេញទៅកាន់ទីផ្សារខាងលើដូចជា សហគមន៍អឺរ៉ុប ចិន ម៉ាឡេស៊ី និងប្រទេសជិតខាងកម្ពុជានោះ ក្រុមហ៊ុននិងរោងម៉ាស៊ីនរបស់លោកកំពុងតែពន្លឿនការរៀបចំបែបបទនីតិវិធី ដើម្បីពង្រីកទីផ្សារនាំចេញអង្ករប្រណីតទៅកាន់ទីផ្សារថ្មីនៅសហរដ្ឋអាមេរិក ផងដែរ។
លោក រ៉ី រដ្ឋា បញ្ជាក់ទៀតថា សម្រាប់រយៈពេល១០ខែឆ្នាំ២០២៤នេះ រោងម៉ាស៊ីនកិនស្រូវហ្គោលដេនស្ដារ បាននាំចេញអង្ករ ទៅកាន់ទីផ្សារក្រៅប្រទេសបានជិត៥ម៉ឺនតោន ខណៈមានផែនការពង្រីកខ្សែច្រវាក់ផលិតកម្ម និងដើម្បីបង្កើនសមត្ថភាពក្នុងការនាំចេញនៅឆ្នាំបន្តបន្ទាប់ទៀត។
រោងម៉ាស៊ីនក្រុមហ៊ុនហ្គោលដេនស្តារមិនត្រឹមតែជារួមចំណែកលើកស្ទួយការនាំចេញអង្ករប៉ុណ្ណោះទេ តែក៏បានផ្តល់ទីផ្សារការងារដល់ប្រជាពលរដ្ឋក្នុងស្រុកដែរ។ក្រោយពីពង្រីកខ្លួន ក្នុងការបង្កើនសមត្ថភាពផលិតអង្ករនាំចេញចាប់តាំងពីឆ្នាំ២០១៩មកបច្ចុប្បន្នរោងម៉ាស៊ីនកិនស្រូវបានបង្កើតនូវការងារជូនប្រជាពលរដ្ឋបានប្រមាណ ៣០០នាក់។
ម្ចាស់រោងម៉ាស៊ីនខាងលើ ក៏បានសំណូមពរដល់រាជរដ្ឋាភិបាលផងដែរ ដោយបានលើកឡើងថា ក្នុងនាមវិស័យឯកជន លោកស្នើដល់រាជរដ្ឋាភិបាលកម្ពុជា មេត្តាពិនិត្យពិចារណាបន្តបញ្ចុះតម្លៃភ្លើង ដើម្បីជំរុញក្នុងការនាំចេញអង្ករ ជាពិសេសដើម្បីផ្ដល់ឱកាសឱ្យរោងម៉ាស៊ីនបានបង្កើននូវប្រាក់ចំណូលជូនកម្មករនិងបង្កើនតម្លៃក្នុងការប្រមូលទិញស្រូវពីប្រជាកសិករ ។
សូមបញ្ជាក់ថា រោងម៉ាស៊ីនកិនស្រូវ ហ្គោលដេនស្ដារ រ៉ាយស៍មីល អេនអ៊ីមផតអិចផត មានទីតាំង ស្ថិតនៅភូមិកគោ ឃុំជ្រៃ ស្រុកថ្មគោល ខេត្តបាត់ដំបង។ រោងម៉ាស៊ីនកិនស្រូវ ហ្គោលដេនស្ដារបានកកើតឡើងតាំងពីឆ្នាំ១៩៨៥មកម៉្លេះ ។ពីមួយឆ្នាំទៅមួយឆ្នាំ រោងម៉ាស៊ីនបានខិតខំពង្រីកនូវសង្វាក់ផលិតកម្មរបស់ខ្លួនជាបន្តបន្ទាប់នៅឆ្នាំ២០១៩។ រហូតមកដល់បច្ចុប្បន្នបានក្លាយជារោងម៉ាស៊ីនកិនស្រូវខ្នាតធំមួយនៅខេត្តបាត់ដំបងដែលបាននិងកំពុងតែរួមចំណែកយ៉ាងសកម្ម លើការផលិត និងនាំចេញអង្ករប្រណីតឆ្ពោះទៅកាន់ទីផ្សារអន្តរជាតិ ស្របតាមចក្ខុវិស័យរបស់រាជរដ្ឋាភិបាលកម្ពុជា៕
អត្ថបទ-រូបភាព៖ អ៊ុក សំអាន បប.
