(ភ្នំពេញ)៖ ក្រសួងកិច្ចការផ្ទៃក្នុងនិងទំនាក់ទំនងនៃប្រទេសជប៉ុន និងបណ្ឌិត្យ​សភា​បច្ចេកវិទ្យាឌីជីថលកម្ពុជា នៃក្រសួងប្រៃសណីយ៍ និងទូរគមនាគមន៍ នៅព្រឹកថ្ងៃទី​២៨ ខែតុលា ឆ្នាំ២០២៤នេះ បានសហការគ្នា សិក្ខាសាលា ដើម្បីពង្រឹងការអភិវឌ្ឍ​ធន​ធានមនុស្ស ផ្នែកបច្ចេកវិទ្យាទូរគមនាគមន៍ និងឌីជីថលនៅកម្ពុជា (Emerging Digital Technology powered by JAPAN—Current State of Open RAN and Cybersecurity )។

សិក្ខសាលានេះ ធ្វើឡើងក្រោមអធិបតីភាព ឯកឧត្តម ជា វ៉ាន់ដេត រដ្ឋមន្រ្តីក្រសួង​ប្រៃសណីយ៍ និងទូរគមនាគមន៍ និងតំណាងស្ថានទូតជប៉ុនប្រចាំកម្ពុជា តំណាង​ក្រសួងកិច្ចការផ្ទៃក្នុងនិងទំនាក់ទំនងនៃប្រទេសជប៉ុន គ្រឹះស្ថានសិក្សា និងវិស័យ​ឯកជន​សរុបប្រមាណ ១៥០ រូប នៅបណ្ឌិត្យសភាបច្ចេកវិទ្យាឌីជីថលកម្ពុជា។

ឯកឧត្តម ជា វ៉ាន់ដេត បានមានប្រសាសន៍ថា សិក្ខាសាលានេះ រៀបចំឡើងក្នុងគោល​បំណងចែករំលែក និងពង្រឹងការអភិវឌ្ឍធនធានមនុស្សផ្នែកបច្ចេកវិទ្យា​ទូរគមនា​គមន៍ និងឌីជីថលនៅកម្ពុជា តាមរយៈការចាប់យកបច្ចេកវិទ្យាឌីជីថលថ្មី។

ប្រធានបទសំខាន់ៗ ធ្វើឡើងដោយអ្នកជំនាញមកពីក្រសួងទាំងពីរ និង​តំណាង​ទីភ្នាក់​ងារសហប្រតិបត្តិការអន្តរជាតិជប៉ុន (JICA) ក្នុងសិក្ខាសាលានេះរួមមាន ទិដ្ឋភាព​ការគំរាមកំហែងតាមប្រព័ន្ធសាយប័រ និងតួអង្គការពារសាយប័រ, សក្តានុពល​នៃបច្ចេកវិទ្យា Open RAN, ក្នុងការអភិវឌ្ឍវិស័យទូរគមនាគមន៍នៅកម្ពុជា និងគំនិត​ផ្តួចផ្តើមនិងចូលរួមចំណែករបស់ JICA ក្នុងការអភិវឌ្ឍ និងសន្តិសុខតាមអ៊ីន​ធឺណិត​នៅកម្ពុជា។

ឯកឧត្តមរដ្ឋមន្ត្រី ជា វ៉ាន់ដេត បានមានប្រសាសន៍បញ្ជាក់ថា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត រាជរដ្ឋាភិបាល បានដាក់ចេញយុទ្ធសាស្ត្រ​បញ្ចកោណដំណាក់កាលទី១ ដែល បានចង្អុលបង្ហាញនូវភាពចាំបាច់ក្នុងការ​គ្រប់​គ្រង​ឱ្យបានលើហានិភ័យក្នុងលំហសាយប័រ និងការចាប់យកកាលានុវត្តភាព​ពីការរីក​ចម្រើន​​យ៉ាងឆាប់រហ័សនៃបច្ចេកវិទ្យាឌីជីថល ដើម្បីលើកកម្ពស់ភាពប្រកួត​ប្រជែង​ជាតិ បង្កើនផលិតភាព ជំរុញពិពិធកម្ម បង្កើតនិងលើកកម្ពស់គុណភាពការងារ៕

ដោយ ៖ ង៉ាន់ ទិត្យ
រូបភាព ៖ រិន រចនា