ភ្នំពេញ៖ ក្រោយនាំភាពជោគជ័យជាច្រើន ទាំងនៅលើឆាកជាតិ នឹងឆាកអន្តរជាតិ វីរៈកីឡាករម៉ូតូទឹកកម្ពុជា សាលី អូមើត បានបង្ហើបពីបំណង ចង់សម្រាកពីអាជីពជាកីឡាករ បន្ទាប់ពីយុវជនបន្តវេនបំបែកកំណត់ត្រាថ្មីដ៏អស្ចារ្យជូនជាតិ។ ការបញ្ជាក់ខាងលើបានធ្វើឡើង ក្នុងឱកាសដែលដឹកនាំក្រុមកីឡាករជម្រើសជាតិម៉ូតូទឹកកម្ពុជា ត្រឡប់មកដល់កម្ពុជា បន្ទាប់ពីដណ្តើមបានមេដាយសរុប ១០គ្រឿង ពីការប្រកួត WGP1 World Series 2024 ជុំទី២ នៅសហរដ្ឋអាម៉េរិក នាអាកាសយាន្តដ្ឋានអន្តរជាតិ ភ្នំពេញ ។

វីរៈកីឡាករ សាលី អូមើត បានបង្ហាញអារម្មណ៍សប្បាយរីករាយ បន្ទាប់ពីអត្តពលិកវ័យក្មេងម៉ូតូទឹកកម្ពុជា បានបំបែកកំណត់ត្រាថ្មីជូនជាតិ ធ្វើប្រទេសមហាអំណាច ប្រទេសធំមកពីតំបន់អ៉ឺរ៉ុប និងប្រទេសខ្លាំងៗនៅតំបន់អាស៊ី កោតសរសើរថា កីឡាករកម្ពុជាពិតជាខ្លាំងមិនអាចមើលស្រាលបាន។

ប្រធានក្រុមជម្រើសជាតិម៉ូតូទឹកកម្ពុជា រូបនេះបន្ថែមថា ចំណុចពិសេសដែលធ្វើអោយក្រុមកីឡាករម៉ូតូទឹកកម្ពុជា ធ្វើបានលទ្ធផលខាងលើ ក៏ព្រោះតែការតាំងចិត្តដ៏មុះមុត ប្តេជ្ញាខំប្រឹងអស់សមត្ថភាព ទាំងការហ្វឹកហាត់ រហូតឈានដល់ពេលប្រកួត ជាពិសេសការដឹកនាំប្រកបដោយការគិតគូបានត្រឹមត្រូវ ក្នុងការជ្រើសរើសយកវិញ្ញាសារណា ដែលអាចស្វែងរកលទ្ធផលជូនជាតិ ។ អូមើត បន្ថែមថា សម្រាប់ការដណ្តើមមេដាយបំបែកកំណត់ត្រាថ្មីនេះ សបញ្ជាក់ថាកម្ពុជាមានធនធានបន្តវេនពោរពេញដោយសក្តានុពល អាចចូលរួមប្រកួតជាលក្ខណអន្តរជាតិបន្តពីខ្ញុំបាន។

ទន្ទឹមនោះ អូមើត ក៏បង្ហើបពីបំណង់ចង់លាឈប់ ពីកីឡាករ មកធ្វើជាគ្រូបង្វឹក ឬក៏អ្នកដឹកនាំវិញម្តង នាថ្ងៃខាងមុខ ដើម្បីទុកឱកាសអោយយុវជនជំនាន់ក្រោយបានបញ្ចេញសមត្ថភាពស្វែងរកមេដាយជូនជាតិ ។ ម្ចាស់មេដាយមាសម៉ូតូទឹកកម្ពុជា រូបនេះ ក៏បានបង្ហាញការជឿជាក់ថា ធនធានយុវជនជំនាន់ក្រោយរបស់កម្ពុជា មានសព្វគ្រប់អស់ហើយ អ្វីដែលនៅខ្វះនោះ គឺការចូលរួមជួយឧបត្ថមគាំទ្រតែប៉ុណ្ណោះ ។

ជោគជ័យនេះ ត្រូវបានលោក មាស ម៉ាប់ អគ្គលេខាធិការងសហព័ន្ធកីឡាម៉ូតូទឹកម្ពុជា តំណាងឯកឧត្តម ណុះ ស្លេះ ប្រធានសហព័ន្ធកីឡាម៉ូតូទឹកកម្ពុជា បានបង្ហាញអារម្មណ៍រីករាយ និងកោតសរសើរចំពោះការខិតខំប្រឹងប្រែងរបស់អត្តពលិកម៉ូតូទឹកម្ពុជាក្រោមការដឹកនាំរបស់វីរៈកីឡាករ សាលីអូមើត និងការជ្រោមជ្រែងផ្ទាល់ពីម្ចាស់ក្លឹបម៉ូតូទឹក Flamingo លោក Henri Klauf។ សម្រាប់ World Series 2024 ជុំចុងក្រោយ អគ្គលេខាធិការរងសហព័ន្ធរូបនេះ បានដាក់ក្តីរំពឹងខ្ពស់ថា អត្តពលិកម៉ូតូទឹកកម្ពុជា នឹងបង្ហាញភាពខ្លាំងបន្តទៀតនាទីក្រុងប៉ាតាយ៉ា ប្រទេសថៃចុងឆ្នាំនេះ បន្ទាប់ពីជោគជ័យខ្លាំងនៅអាមេរិក។

ជម្រាបជូនថា សម្រាប់មេដាយសរុប ដែលក្រុមកីឡាម៉ូតូទឹកកម្ពុជាដណ្តើមបាន ពីការប្រកួត WGP1 World Series 2024 ជុំទី២ នៅប្រទេសអាម៉េរិក រួមមាន មេដាយមាស ៦, ប្រាក់ ៣ និងសំរិទ្ធ ១។ ចំណែកឯជុំចុងក្រោយ នឹងប្រព្រឹត្តការណ៍នាខែធ្នូ នៅទីក្រុងប៉ាតាយា ប្រទេសថៃ៕

អត្ថបទ-រូបភាព លោក ចាន់ វិចិត្រ ងីម ឆាយហួត