បន្ទាយមានជ័យ៖ភូមិចំនួន១០ នៅឃុំភ្នំលៀប​ ស្រុកព្រះនេត្រព្រះ ខេត្តបន្ទាយមានជ័យត្រូវបានប្រកាសកំណត់តំបន់ ធ្វើការវិនិច្ឆ័យ​លើការចុះបញ្ជីដីធ្លីមានលក្ខណៈប្រព័ន្ធ ក្រោមវត្តមាន លោក ប្រាក់ ប៉ូលី អភិបាលរងខេត្តបន្ទាយមានជ័យ ។ពិធីបានប្រព្រឹត្តទៅ​នៅបរិវេណ វត្តប្រាសាទជលសាអូរសំរោង ហៅវត្តរំដួល ភូមិរំដួល ឃុំភ្នំលៀប កាលពីថ្ងៃទី៣០ ខែតុលា ឆ្នាំ ២០២៤។

លោក ពិន សុវណ្ណារិទ្ធិ តំណាងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានបញ្ជាក់និងណែនាំដល់ ពលរដ្ឋជា​ម្ចាស់ដីត្រូវត្រៀមឯកសារចាំបាច់សម្រាប់ម្ចាស់ដីត្រូវមានក្នុងការចុះបញ្ជីដីធ្លីមានលក្ខណជាប្រព័ន្ធ រួមមាន ៖ សំបុត្រកំណើត ឬសំបុត្រ​បញ្ជាក់កំណើត, អត្តសញ្ញាណប័ណ្ណសញ្ជាតិខ្មែរ ឬសៀវភៅ​គ្រួសារ ឬសៀវភៅស្នាក់នៅ, សំបុត្រអាពាហ៍ពិពាហ៍ (ប្រសិនបើជាទ្រព្យរួម​ប្តីប្រពន្ធ), សំបុត្រមរណភាព (ប្រសិនបើជាប្តីឬប្រពន្ធស្លាប់ម្នាក់), ឯកសារពាក់ព័ន្ធដីធ្លី (លិខិតលក់ទិញ ឬអំណោយ ឬបញ្ជាក់ប្រវត្តិ​ដី), បណ្តាំមរតក(ប្រសិនបើមានលិខិតបណ្តាំ ពីជនដែលស្លាប់​ទៅ), សាលក្រមតុលាការ (ប្រសិនបើប្តឹងឈ្នះតាមផ្លូវតុលាការ), ប័ណ្ណសំគាល់សិទ្ធិកាន់កាប់ប្រើប្រាស់ដីធ្លី (បណ្ណស្លាបមាន់ ឬប្លង់​រឹង ពីមុនមក)។

ក្នុងឱកាសនេះលោក ប្រាក់ ប៉លី អភិបាលរងខេត្តបានថ្លែងថា រាជរដ្ឋាភិបាលអាណត្តិទី៧ ដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញនូវយុទ្ធសាស្ត្រ​បញ្ចកោណ ដំណាក់កាលទី១ មានចំណុចអាទិភាព ៥ចំណុច ពាក់ព័ន្ធនឹងវិស័យរៀបចំដែនដី នគរូបនីយកម្ម និងសំណង់ (បញ្ចកោណទី៤ មុំទី៤) នៅក្នុងនោះមានចំណុចអាទិភាពទី១ គឺបន្តដំណើរការកែទម្រង់ដីធ្លី ដោយជំរុញការចុះបញ្ជី និងកា​រ​ដោះស្រាយវិវាទដីធ្លីនៅក្រៅប្រព័ន្ធ និងការកសាង​ផែនការ​រៀបចំដែនដី និងនគរូបនីយកម្មទាំងថ្នាក់ជាតិ និងថ្នាក់ក្រោមជាតិ ក្នុងគោលដៅគ្រប់គ្រង និងអភិវឌ្ឍវិស័យដីធ្លី ឱ្យបានត្រឹមត្រូវ និងឱ្យកាន់តែមានប្រសិទ្ធភាព៕

ដោយ៖ឃិន គន្ធា