បាត់ដំបង៖ក្រុងបាត់ដំបង ខេត្តបាត់ដំបងត្រូវបានប្រកាសទទួល​ស្គាល់ និងទទួលបានពានជ័យលាភី “ជាទីក្រុងទេសចរណ៍ គ្មាន​ផ្សែងបារី”។នេះជាសមិទ្ធផលថ្មីបន្ថែមទៀត បន្ទាប់ពី​រដ្ឋបាលខេត្ត​ជង្រុកស្រូវ និងទេសចរណ៍វប្បធម៌ អេកូទេសចរណ៍មួយនេះ​ទទួល​ជោគជ័យក្នុងការប្រារព្ធពិធីបុណ្យអុំទូកនិងបណ្ដែតប្រទីបដ៏ធំមិនធ្លាប់មានកាលពីពេលថ្មីៗនេះដែរ។

ពិធីប្រកាសទទួលស្គាល់ និងទទួលបានពានជ័យលាភី “ជាទីក្រុង​ទេសចរណ៍ គ្មានផ្សែងបារី”បាន ប្រព្រឹត្តទៅនៅសាលប្រជុំ​សាលា​ខេត្តបាត់ដំបងក្នុងសប្ដាហ៍នេះក្រោមអធិបតីភាព ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ ឯកឧត្តម សុខ លូ អភិបាល​ខេត្តបាត់ដំបង លោកស្រីបណ្ឌិត អេដា ម៉ូដស៊ីរី( Ada Moad siri)តំណាងអង្គការសុខភាពពិភពលោកនៅកម្ពុជា(WHO)​ព្រមទាំងមន្រ្តីជាន់ខ្ពស់នៃក្រសួងទេសចរណ៍ ថ្នាក់ដឹកនាំនៃមន្ទីរ អង្គភាពជុំវិញខេត្ត អាជ្ញាធរក្រុង ស្រុក សង្កាត់ ម្ចាស់អាជីវកម្ម​ទេសចរណ៍ក្នុងខេត្ត យុវជន និងសិស្សានុសិស្សយ៉ាងច្រើនកុះករ ។

ទទួលបានសេចក្តីប្រកាសនិងពាន ឯកឧត្តម សុខ លូ អភិបាល​ខេត្តបាត់ដំបង បានចាត់ទុកពានរង្វាន់ជ័យលាភីនេះនឹងកាន់ តែជួយនិងផ្តល់ឱកាសឱ្យខេត្តបាត់ដំបង។ជាពិសេសក្រុងបាត់​ដំបងកាន់តែមានមោទកៈលេចធ្លោនិងកាន់តែផ្តល់នូវភាព ទាក់​ទាញ​ភ្ញៀវទេសចរជាតិ អន្តរជាតិ ឱ្យ​កម្សាន្តខេត្តបាត់​ដំបងកាន់​តែច្រើនឡើង។

បន្ថែមទៅលើអ្វីដែលឯកឧត្តមអភិបាលខេត្តបាត់ដំបងបានលើកឡើង ឯកឧត្តម ហួត ហាក់ បានគូសរំលេចថា សមិទ្ធផល ដែល​ក្រុង​បាត់ដំបងសម្រេចបាននៅថ្ងៃនេះ វាមិនត្រឹមតែ​ជាការជំរុញ​ឱ្យមានការអនុវត្តច្បាប់ស្តីពី “ការត្រួតពិនិត្យផលិត ផលថ្នាំជក់ ” និងលិខិតបទដ្ឋានគតិនានាប៉ុណ្ណោះទេ ក៏ប៉ុន្តែវាក៏បានបង្ហាញ​ឱ្យឃើញពីការចូលរួមកាត់បន្ថយផលប៉ះពាល់ អវិជ្ជមានក្នុងវិស័យ​ទេសចរណ៍និងបង្កើនភាពជឿទុកចិត្តថែមមួយកម្រិតទៀត ក្នុងចំណោមភ្ញៀវទេសចរ ទាំងភ្ញៀវជាតិ និងភ្ញៀវអន្តរជាតិផងដែរ។

ឯកឧត្តមបានបន្តថា ក្រសួងទេសចរណ៍បានដាក់ឱ្យអនុវត្តគោល​ការណ៍ណែនាំស្តីពី “ការរៀបចំទីក្រុងទេសចរណ៍គ្មាន ផ្សែងបារី” ។គោលការណ៍នេះបានត្រួសត្រាយផ្លូវជូនដល់រដ្ឋបាលក្រុង ស្រុក ខណ្ឌដែលអាចចូលរួមដោយផ្ទាល់ ក្នុងការរៀបចំខ្លួនជាទី​ក្រុង​ទេសចរណ៍គ្មានផ្សែងបារី ៕
អត្ថបទ-រូបភាព៖ អ៊ុក សំអាន បប.