បន្ទាយមានជ័យ៖រដ្ឋបាលខេត្តបន្ទាយមានជ័យ នៅចុងសប្ដាហ៍នេះ​បាន​រៀបចំសិក្ខាសាលា”ផ្សព្វផ្សាយច្បាប់ស្តីពីការ​គ្រប់គ្រងទឹក​ស្អាត”​ដោយមានការចូលរួមពីប្រតិបត្តិករ និងអាជ្ញាធរមូលដ្ឋានទូទាំងខេត្ត ក្រោមអធិបតីភាពឯកឧត្តម អ៊ុំ សុថា រដ្ឋលេខាធិការ​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ។

បើតាមឯកឧត្តម អ៊ុំ សុថា រដ្ឋលេខាធិការក្រសួងឧស្សាហកម្ម បញ្ជាក់​ថា នេះ​ជាសិក្ខាសាលាលើក ដំបូងសម្រាប់ខេត្តបន្ទាយមានជ័យ។សិក្ខា
សាលាមាន​គោលបំណង​ដើម្បីជួបជុំជាមួយភាគីពាក់ព័ន្ធ ហើយ​ផ្សព្វផ្សាយ​​និងបញ្ជ្រាបការយល់ដឹងអំពីច្បាប់ស្តីពីការគ្រប់​គ្រង​ទឹក​ស្អាត។ឯកឧត្តមបន្តថា កន្លងមកបានផ្សព្វផ្សាយជាមួយប្រតិបត្តិករ​ជាទ្រង់ទ្រាយធំចំនួនពីរលើក។គឺនៅខែឧសភា ឆ្នាំ២០២៣ និងនៅ​ខែកក្កដា ឆ្នាំ២០២៤នារាជធានីភ្នំពេញ ។ចំណែកការផ្សព្វផ្សាយ​លើកនេះ គឺនៅថ្នាក់ក្រោមជាតិ ដែលចាប់ផ្តើមចេញ​ពី​ខេត្តបន្ទាយ​មានជ័យ។ការផ្សព្វផ្សាយនេះ ដើម្បីឱ្យអាជ្ញាធរឃុំ សង្កាត់ ស្រុក ក្រុង មន្ទីរជំនាញ អង្គភាពពាក់ព័ន្ធ និងប្រតិបត្តិករ​ទឹកស្អាត ដែលមានមូល​ដ្ឋានអាជីវកម្មផ្គត់ផ្គង់ទឹកស្អាតនៅក្នុងខេត្តបន្ទាយមានជ័យយល់ដឹងកាន់តែច្បាស់បន្ថែមទៀតអំពីសមត្ថកិច្ច, សិទ្ធិ និងកាតព្វកិច្ចទទួលខុស​ត្រូវរបស់ភាគីពាក់ព័ន្ធទាំងអស់, រួមទាំងការដោះស្រាយវិវាទ និងទោសប្បញ្ញត្តិដែល​ត្រូវបាន​កំណត់​ដោយច្បាប់។

នៅខេត្តបន្ទាយមានជ័យ មានក្រុមហ៊ុនផលិត និងផ្គត់ផ្គង់ទឹក​ស្អាតចំនួន ៣០ កន្លែង ។នេះបើតាមការឱ្យដឹងពីលោក ញិល ប៊ុនធឿន ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្ត។លោកបានបន្តថា ឆ្នាំ២០២៤ ការផ្គត់ផ្គង់ទឹកស្អាត​បាន​ប្រព្រឹត្ត​ទៅតាមប្រព័ន្ធបណ្តាញទុយោនៅ៥៩ឃុំ សង្កាត់ ស្មើនឹង៥២៣ ភូមិ។ប្រជាពលរដ្ឋ បានប្រើប្រាស់ទឹកស្អាត​មានចំនួន​៦៧.៥៩៧​នាឡិកា។បរិមាណទឹកផលិតបានជាង ១,៦លានម៉ែត្រគូបក្នុងមួយខែជាមួយនឹង​បរិមាណទឹកលក់បានជាង១,៣លានម៉ែត្រគូប ក្នុងមួយខែ។ការផ្គត់ផ្គង់​ទឹកមានមកពីប្រភពផ្សេងៗ ដូចជាគម្រោងអភិវឌ្ឍន៍ជនបទ និងដៃគូ​អភិវឌ្ឍន៍។

ដោយផ្អែកលើ់មូលដ្ឋានច្បាប់ដែលបានផ្សព្វផ្សាយ លោក លី សុវណ្ណារិទ្ធ អភិបាលរខេត្តបន្ទាយមានជ័យ បានណែនាំបន្ថែម ដល់​អាជ្ញាធរមូលដ្ឋាន និងប្រតិបត្តិករទឹកស្អាតត្រូវសហការគ្នាលើការកំណត់​ទីតាំងធ្វើអាជីវកម្មបានច្បាស់លាស់ ។ ក្រុមហ៊ុនទឹក​ស្អាត​នីមួយៗត្រូវ​បន្ត​បំពេញបែបបទច្បាប់ និងការផលិតទឹកស្អាតប្រកបដោយស្តង់​ដារ​បច្ចេកទេស ធានាបាននូវទឹក​ប្រើប្រាស់គ្រប់គ្រាន់​មិនប៉ះពាល់សុខុមាល​ភាពអ្នកបានប្រើប្រាស់ទឹក៕
ដោយ៖ គៀន ច័ន្ទហ៊ីន