ភ្នំពេញ៖ អាជ្ញាធរជាតិអប្សរាបានឱ្យដឹងថា នៅបរិវេណខាងកើត​ប្រាសាទ​បន្ទាយប្រីនៃរមណីយដ្ឋានអង្គរកាលពីថ្ងៃទី២ ខែវិច្ឆិកា ឆ្នាំ២០២៤ មានប្រារព្ធពិធី​ប្រគល់កិច្ច​ព្រម​ព្រៀង និងសម្ពោធ​គម្រោង«ឧទ្យានអង្គរ-ស៊ីអាយអិមប៊ី» ព្រមទាំងពិធីដើមឈើ រួមគ្នាចំនួន២ ០០០ដើម ជានិមិត្តរូប បង្ហាញឱ្យឃើញពីស្មារតី​ចូលរួមគាំពារ និងថែរក្សា អភិរក្សបរិស្ថានរវាងអាជ្ញាធរជាតិអប្សរា និងធនាគា ស៊ីអាយអិមប៊ី ភីអិលស៊ី (CIMB)។

ពិធីនេះប្រព្រឹត្តិទៅក្រោមអធិបតីភាព ឯកឧត្តម សាហារ៉ូឌិន អន( Shaharuddin On) ឯកអគ្គរាជ​ទូតម៉ាឡេស៊ីប្រចាំកម្ពុជា ឯកឧត្តម​បណ្ឌិត ហង់ ពៅ អគ្គនាយកអាជ្ញាធរជាតិអប្សរា លោកប៊ុន យីន ប្រធាននាយក​ប្រតិបត្តិធនាគា ស៊ីអាយអិមប៊ី ភីអិលស៊ី ថ្នាក់ដឹកនាំ មន្ត្រី បុគ្គលិកអាជ្ញាធរ និងបុគ្គលិកធនាគាស៊ីអាយអិមប៊ី យ៉ាងច្រើនកុះករ។

មានប្រសាន៍ក្នុងឱកាសនេះ ឯកឧត្តមបណ្ឌិត ហង់ ពៅ អគ្គនាយក​អាជ្ញា​ធរជាតិអប្សរាបានស្វាគមន៍ចំពោះវិស័យឯកជននានា ដែលមាន​បំណងចង់​ចូលរួមជាមួយអាជ្ញាធរជាតិអប្សរា ក្នុងសកម្មភាពដាំដើម​ឈើឡើងវិញ ដើម្បីបរិស្ថាន និងការពារប្រាសាទ​បុរាណ។ ឯកឧត្តម​បានបញ្ជាក់អំពីសារៈសំខាន់មួយចំនួននៃដើមឈើចំពោះបរិស្ថាន សុខភាពមនុស្សនិងសត្វ ក្រៅពីនោះដើមឈើ​ដែលមានវត្តមាន​នៅរមណីយដ្ឋានអង្គរ ក៏បានដើរតួនាទីសំខាន់ក្នុងការការពារទៅ​ដល់ប្រាសាទបុរាណ ឱ្យចៀសផុតពីហានិភ័យ​នានា។ ហេតុដូច្នេះ ចាប់តាំងពី២០០៤មក អាជ្ញាធរជាតិអប្សរា បានយកចិត្តទុកដាក់ និងរៀបចំផែនការដាំដុះដើមឈើវិញ​ជាបន្ត​បន្ទាប់ រហូត​ទទួល​បានជោគជ័យដូចសព្វថ្ងៃនេះ។

លោក ប៊ុន យីន ប្រធាននាយកប្រតិបត្តិធនាគា ស៊ីអាយអិមប៊ី ភីអិលស៊ី បានបញ្ជាក់ថា ធនាគាស៊ីអាយអិមប៊ី ពិតជា​មានសេចក្តី​សោមនស្ស​រីករាយ ដែលបានចូលរួម ជាអាជ្ញាធរជាតិអប្សរា ក្នុងសកម្មភាព ការពារ អភិរក្ស និងថែរក្សាបរិស្ថាន។ លោកថា គិតចាប់ពីឆ្នាំ២០២០មក នេះជាលើកទី៣ហើយ ដែលធនាគាស៊ីអាយអិមប៊ី បានសហការ​ជាមួយអាជ្ញាធរជាតិអប្សរា ដាំកូនឈើឡើងវិញក្នុងរមណីយអង្គរ ព្រមទំាងបង្កើតឱ្យមានគម្រោង«ឧទ្យានអង្គរ-ស៊ីអាយអិមប៊ី» ដែលបានឆ្លុះបញ្ចាំងពី​ការប្តេជ្ញា​ចិត្ត និងកិច្ចខិតខំប្រឹងប្រែង លើការដាំ និងថែរក្សាដើមឈើ រយៈពេលយូរអង្វែង៕
ដោយ៖ម៉ា ដេប៉ូ