ការប្រកួតប៊ីយ៉ាកីឡាជាតិលើកទី៤ Lux98 Billiard គាំទ្រផ្តល់ទីតាំងប្រកួតជាការរួមចំណែកលើកស្ទួយវិស័យកីឡាជាតិ
(ភ្នំពេញ)៖ ការប្រកួតកីឡាជាតិលើកទី៤ និងកីឡាជនពិការជាតិលើកទី២ សម្រាប់ប្រភេទកីឡាប៊ីយ៉ាបានដំណើរការប្រកួតហើយ នាព្រឹកថ្ងៃទី៤ ខែ វិច្ឆិកា ឆ្នាំ២០២៤ ក្រោមកិច្ចសហការគាំទ្រផ្តល់ជូនទីតាំងប្រកួតដោយក្លឹប Lux98 Billiard មានបទពិសោធន៍លើវិស័យប៊ីយ៉ាជាង១០ឆ្នាំ។
កញ្ញា ហេង ចាង ម្ចាស់ក្លឹបប៊ីយ៉ា Lux98 Billiard បានគូសបញ្ជាក់ថា ក្នុងនាមជាក្លឹបបម្រើរការលើវិស័យកីឡាប៊ីយ៉ាពិតជាមានទោនៈភាពខ្លាំងណាស់ដែលក្លឹបត្រូវបានជ្រើសជាទីតាំងប្រកួតកីឡាជាតិដ៏ធំរៀងរាល់២ឆ្នាំម្តងនេះ។
កញ្ញា លើកឡើងទៀតថា ចូលរួមផ្តល់ទីតាំងប្រកួតជូនសហព័ន្ធរៀបចំការប្រកួតដោយមិនយកនូវប្រាក់កម្រៃ សម្រាប់ការប្រកួតកីឡាជាតិនេះ គឺជាការចូលរួមចំណែកមួយរបស់ក្លឹប ដើម្បីលើកស្ទួយអភិវឌ្ឍន៍វិស័យកីឡាប៊ីយ៉ានៅកម្ពុជាឱ្យកាន់តែរីកចម្រើនដូចបណ្តាប្រទេសនៅក្នុងតំបន់។
ម្ចាស់ក្លឹបខាងលើ បានអះអាងទៀតថា ក្រៅពីការចូលរួមចំណែកផ្តល់ជាទីតាំងក្នុងការរៀបចំការប្រកួតដល់សហព័ន្ធដើម្បីរៀបចំការប្រកួតកម្រិតជាតិនិងអន្តរជាតិផ្សេងៗក្លឹប Lux98 Billiard ក៏បានជួយផ្តល់ជូននូវការហ្វឹកហាត់សម្រាប់កីឡាករកីឡាការិនីតាមរយៈការផ្តល់ជាគ្រូបង្វឹកជួយណែនាំបង្ហាត់បង្រៀនផងដែរ។ ការចូលរួមជាមួយសកម្មភាពទាំងអស់នេះ គឺជាការចូលរួមបំផុសជួយឱ្យវិស័យកីឡាមួយនេះនៅកម្ពុជាកាន់តែមានអ្នកចូលចិត្តលេងច្រើន ដើម្បីផលិតបាននូវធនធានឆ្នើមៗនិងមានសក្កានុពលប្រកួតតំណាងកម្ពុជាប្រកួតលើឆាកអន្តរជាតិ ដណ្តើមនាំយកមេដាយជូនកម្ពុជាលើកកិតិយសកម្ពុជានៅលើឆាកអន្តរជាតិ។
កញ្ញា សូមថ្លែងអំណរគុណយ៉ាងជ្រាលជ្រៅចំពោះក្រសួងអប់រំយុវជននិងកីឡា និងសហព័ន្ធដែលបង្កើតកីឡាជាតិ ផ្តល់ឱកាសឱ្យកីឡាករកីឡាការិនីកីឡាប៊ីយ៉ាបានប្រកួតប្រែងបញ្ចេញសមត្ថភាព ដើម្បីអភិវឌ្ឍន៍សមត្ថភាពក្លាយជាកីឡាករកីឡាការិនីឆ្នើមសម្រាប់កម្ពុជា។
លោក ម៉ារ៉ា សុជាតិ អគ្គលេខាធិការ សហព័ន្ធកីឡាប៊ីយ៉ា និងស្នុកឃ័រ បានគូសបញ្ជាក់ឱ្យដឹងដែរថា ព្រឹត្តិការកីឡាជាតិលើ៤នេះ សម្រាប់កីឡាប៊ីយ៉ា បានដំណើរការប្រកួតចំនួន៥ថ្ងៃ ចាប់ពីថ្ងៃទី៤ដល់ទី៨ ខែ វិច្ឆិកា ឆ្នាំ២០២៤ ដោយមានរាជធានី ខេត្ត និងក្រសួងចូលរួមចំនួន៧ មានដូចជា ក្រសួងមហាផ្ទៃ ខេត្តស្ទឹងត្រែង ខេត្តប៉ៃលិន ខេត្តសៀមរាប ខេត្តកែប ខេត្តព្រះសីហនុ និងខេត្តត្បូងឃ្មុំ។
អគ្គលេខាធិការរូបនេះ បានលើកឡើងបន្ថែមទៀតថា សម្រាប់វិញ្ញាសាប្រកួតមានចំនួន៦ ដោយបន្ថែម លើសចំនួន១វិញ្ញសា កាលពីកីឡាជាតិលើកទី៣។ មួយវិញ្ញាសា ដែលបន្ថែមនេះមានឈ្មោះថា ហីបល ជាវិញ្ញសាប៊ីយ៉ាមួយ ដែលពិភពលោកចូលចិត្តលេង ហើយថែមទាំងបានជំរុញឱ្យអារម្មណ៍អ្នកលេងកញ្ជ្រោលចង់លេង ។ដូចនេះហើយ ការបន្ថែមវិញ្ញាសាថ្មីដែលមានប្រភពពីចិនមួយនេះ ជាការបំផុសឱ្យមានអ្នកលេងនិងហ្វឹកហាត់កាន់តែច្រើន។
លោក អះអាងថា វិញ្ញាសាថ្មីមួយនេះ និងបង្ហាញវត្តមានក្នុងព្រឹត្តិការណ៍កីឡាស៊ីហ្គេម នៅប្រទេសម៉ាឡេស៊ីក្នុងឆ្នាំ២០២៧លើកទី៣៤ ហើយក៏កំពុងបន្តដាក់ចូលទៅក្នុងកីឡាអូឡាំពិកផងដែរ៕
ថតដោយ ៖ ជីម ភារ៉ា
អត្ថបទ ៖ ជាវ ចន្ធូ
