កំពង់ឆ្នាំង៖ទូកង ឈ្មោះ ទេពធីតាសែនជ័យ បារមីជំទាវទេព ត្រូវបាន​ធ្វើពិធីក្រុងពាលីរំកិលចុះទឹកនៅថ្ងៃទី៥ ខែវិច្ឆិកា ឆ្នាំ២០២៤ ​ដើម្បីឱ្យ​ក្រុមកីឡាហ្វឹកហាត់ត្រៀមចូលរួមប្រកួតក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ នៅរាជធានី​ភ្នំពេញ​ក្នុងពេលខាងមុខ។ពិធីបានប្រព្រឹត្តទៅបរិវេណវត្តទេពធីតារាម ហៅវត្តយាយទេព ។

លោក យិន សាវេន អភិបាលរងខេត្តកំពង់ឆ្នាំង បានឱ្យដឹងពីប្រវត្តិទូកង ទេពធីតាសែនជ័យបារមីជំទាវទេព ។ទូកនេះបានសុំពីវត្ត ពោធិ៍អណ្ដែត​នៃស្រុកកំពង់លែងនាឆ្នាំ២០១៥  ។កាលណោះទូកមានចំណុះជើង​ចែវ​៥៦នាក់ ។ក្រោយពេលជួសជុលរួច​បាន​ដាក់ឈ្មោះ ថា ទេពធីតាសែន​ជ័យបារមីជំទាវទេព ហើយបានយកទៅចូលរួមប្រកួតទទួលបាន​ចំណាត់ថ្នាក់លេខ១ នៅឆ្នាំ ២០១៧   ។ដោយសារទូកមានសភាពទ្រុឌ​ទ្រោមខ្លាំង ក៏បានឯកភាពជួសជុល និងកាត់ទូកឱ្យខ្លីនៅសល់ត្រឹម៤៦​ជើង​ចែវ ។

លោកអភិបាលខេត្តរងខេត្តបន្តឱ្យដឹងទៀតថា នៅពេលជួស​ជុល​កាលណោះបានឱ្យ ជាងទៅសិក្សា និងយកគំរូពីទូកឈ្មោះ “ប្រពៃស្រប” និងទូកឈ្មោះ “ហនុមាន” ដែលជាទូកមានល្បឿនលឿន ។ហេតុដូច្នេះហើយ ទើបទូកនេះ មួយកំណាត់ក្រោយរាងដូច ហនុមាន និងផ្នែកខាងមុខរាងដូច ទូកប្រពៃស្រប។ក្រោយពីជួសជុលកែលម្អ​រួចថា ទូកទេពធីតាសែនជ័យបារមីជំទាវទេព មាន​សោភណភាពស្រស់ ហើយសង្ឃឹមថា ឆ្នាំនេះទូកនឹងទទួលបានចំណាត់ថ្នាក់លេខ ១ដូច​បណ្ដាឆ្នាំមុនៗដែរ។

លោក ហ៊ីង ភ័ព្វមីនា អភិបាលក្រុងកំពង់ឆ្នាំងបានបន្ថែមថា ទូកង ទេពធីតាសែនជ័យបារមីជំទាវទេព មានប្រវែង២៩,៧៣ ម៉ែត្រ។ មានចំណុះជើងចែវ ៤៦នាក់ ។ធ្លាប់បានចូលរួមប្រកួតថ្នាក់ជាតិចំនួន៥​ប្រកួតដោយទទួលបានចំណាត់ថ្នាក់លេខ១ ចំនួន២ប្រកួត និងចំណាត់​ថ្នាក់​លេខ២ ចំនួន៣ប្រកួត។

ក្នុងឱកាសនេះដែរលោកឧត្តមសេនីយ៍ត្រី អ៊ុំ សុភា មេបញ្ជាការតំបន់​ប្រតិបត្តិការសឹករង​កំពង់​ឆ្នាំង បានផ្ដាំផ្ញើដល់ក្រុម​កីឡាករទាំង​អស់ថា ដើម្បីយកយកជ័យជម្នះកីឡាករ  ត្រូវមានវិន័យនិងស្តាប់អ្នកគ្រប់គ្រង។ត្រូវខំហ្វឹកហាត់។លោកក៏បាននាំយក​អំណោយ​ជាស្បៀង និងថវិកា​របស់​​សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាឧបត្ថម្ភ​កីឡាករទូកទៀតផង។
ចំណែកលោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ បានក៏បានឧបត្ថម្ភថវិកាចំនួ ៣លានរៀលជួយឧបត្ថម្ភ
ដល់កីឡាករ ផងដែរ ៕
ដោយ៖សុខ គឹមសៀន