បរទេស៖ ក្រោយដឹងថា លោក Trump បានឈ្នះការបោះឆ្នោត ក្លាយជាប្រធានាធិបតីអាមេរិក ប្រធានាធិបតីប្រទេសអ៊ុយក្រែន លោក Zelensky បានថ្លែងផង និងបង្ហោះលើបណ្តាញសង្គមផង អបអរសាទរដល់លោក Trump ដោយកត់សម្គាល់ការប្តេជ្ញាចិត្តចំពោះវិធីសាស្រ្ត «សន្តិភាព» របស់ លោក Trump នឹងអាចនាំឲ្យអ៊ុយក្រែនមានសន្តិភាព ឆាប់ៗនេះ។

ប្រធានាធិបតីអ៊ុយក្រែន លោក Volodymyr Zelensky និយាយថា «សូមអបអរសាទរចំពោះ @realDonaldTrump ចំពោះជ័យជម្នះការបោះឆ្នោតដ៏គួរឱ្យចាប់អារម្មណ៍របស់គាត់! ខ្ញុំនឹកចាំពីជំនួបដ៏អស្ចារ្យរបស់យើងជាមួយលោកប្រធានាធិបតី Trump កាលពីខែកញ្ញា នៅពេលដែលយើងបានពិភាក្សាលម្អិតអំពីអ៊ុយក្រែន-សហរដ្ឋអាមេរិក។ ភាពជាដៃគូយុទ្ធសាស្ត្រ ផែនការជ័យជំនះ និងវិធីដើម្បីបញ្ចប់ការឈ្លានពានរបស់រុស្ស៊ីប្រឆាំងនឹងអ៊ុយក្រែន» នេះជាអ្វីដែលលោក Zelensky បានសរសេរនៅក្នុងការបង្ហោះនៅលើវេទិកាសង្គម X ។

លោកបានបន្ថែមថា លោកសូមកោតសរសើរចំពោះ «ការប្តេជ្ញាចិត្តរបស់លោក Trump ចំពោះវិធីសាស្រ្ត សន្តិភាពដ៏មានឥទ្ធិពល នៅក្នុងកិច្ចការ ពិភពលោក។ មេដឹកនាំអ៊ុយក្រែនរូបនេះបានបន្តថា «នេះជាគោលការណ៍ដែលអាចអនុវត្តបានសន្តិភាពនៅអ៊ុយក្រែន កាន់តែឆាប់»។

គួររម្លឹកថា លោក Trump បានជួបជាមួយ Zelensky កាលពីខែមុន ចំពេលមានសង្រ្គាមជិតបីឆ្នាំ។ លោក Trump បានគូសបញ្ជាក់ពីទំនាក់ទំនងរបស់លោក ជាមួយប្រធានាធិបតីរុស្ស៊ី ហើយបានបង្កប់ន័យថា លោកអាចធ្វើកិច្ចព្រមព្រៀងបញ្ចប់សង្គ្រាម «យ៉ាងឆាប់រហ័ស»៕

ប្រភពពី AFP ប្រែសម្រួល៖ សារ៉ាត