(ភ្នំពេញ)៖ ឯកឧត្តម តែ ឡូរិន ប្រធានសហព័ន្ធកីឡាគុនដាវកម្ពុជាបានជំរុញលើក​ទឹកចិត្ត​ដល់ក្រសួង រាជធានីខេត្ត និងកីឡាករ កីឡាការិនីគុនដាវទាំងអស់ប្តេជ្ញា​ប្រឹងប្រែងរួមគ្នា ដើម្បីសម្រេចគោលដៅដណ្តើមឱ្យបានមេដាយមាស ក្នុងការប្រកួត​កីឡាគុនដាវអន្តរជាតិនានា នាពេលខាងមុខ ខណៈការប្រកួតអន្តរជាតិកន្លងមក វិស័យកីឡាគុនកម្ពុជាដណ្តើមបានត្រឹមមេដាយសំរឹទ្ធ។

នេះជាការលើកឡើងរបស់ឯកឧត្តមប្រធាន ក្នុងឱកាសបិទការប្រកួតកីឡាគុនដាវ នៃព្រឹត្តិការណ៍កីឡាជាតិ លើកទី៤ និងកីឡាជាតិជនពិការ លើកទី២ ឆ្នាំ២០២៤ កាលពីយប់ថ្ងៃទី០៧ ខែវិច្ឆិកា ឆ្នាំ២០២៤ នៅផ្សារទំនើប ដឺភីក (The Peak)ជាការកត់សម្គាល់ ឯកឧត្តម តែ ឡូរិន គូសបញ្ជាក់ថា បច្ចុប្បន្ន ប្រភេទកីឡាគុនដាវកម្ពុជាមានការរីកចម្រើនគួរឱ្យកត់សម្គាល់ ខណៈចំនួនរបស់ស្ថាប័នក្រសួង រាជធានីខេត្តបានចូលរួមប្រកួតកីឡាគុនដាវ នៃព្រឹត្តិការណ៍កីឡាជាតិ លើកទី៤ និងកីឡាជាតិជនពិការ លើកទី២ ឆ្នាំ២០២៤នេះបានកើនឡើងជិត១៥ ក្រសួងរាជធានីខេត្ត ដោយកាលពីពេលមុនៗ មានតែ ២-៣ក្លឹបស្ថិតក្នុងរាជធានីភ្នំពេញប៉ុណ្ណោះ។

ឯកឧត្តម តែ ឡូរិន សង្កត់ធ្ងន់ថា ៖«ខ្ញុំសង្ឃឹមថា នៅថ្ងៃខាងមុខ ប្រភេទកីឡាគុនដាវកម្ពុជានឹងអាចស្វែងរកមេដាយមាសជូនប្រទេសជាតិជាក់ជាមិនខាន។ សូមទាំងអស់គ្នាប្តេជ្ញាតស៊ូប្រឹងប្រែងដណ្តើមឱ្យបានមេដាយមាស ក្នុងការប្រកួតអន្តរជាតិ នៅថ្ងៃខាងមុខ។ សូមថ្លែងអំណរគុណចំពោះក្រសួងអប់រំ យុវជន និងកីឡា ដែលតែងតែផ្តល់ការគាំទ្រទាំងស្មារតី សម្ភារ និងថវិកា។ ក្នុងឱកាសនេះ ខ្ញុំសូមអំពាវនាវដល់សប្បុរសជនទាំងឡាយជួយឧបត្ថម្ភគាំទ្រដល់​ការអភិវឌ្ឍវិស័យកីឡាគុនដាវនេះដើរទៅមុខដោយរលូន និងរីកចម្រើនបន្ថែមទៀត»។

ក្នុងពិធីបិទការប្រកួតទទួលបានការអញ្ជើញបំពាក់មេដាយជូនដល់ជ័យលាភីពី លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡានៃ​ក្រសួង​អប់រំ យុវជន និងកីឡាផងដែ។ ជាមួយគ្នានេះ មានការអញ្ជើញចូលរួមជាភ្ញៀវកិត្តិ​យស​ពីលោក Calvin TSE តំណាង ក្រុមហ៊ុន Worldbridge International លោកស្រី Suntheary DE MONTAIGNE មកពី Oxley Worldbridge និងលោកស្រី Emmanuelle Mace តំណាងក្រុមហ៊ុន Luxury Business Groupផងដែរ។ ផ្សារទំនើប ដឺភីក បានជួយលើកកម្ពស់ដល់កីឡាជាតិ និងបើក​សម្រាប់ការធ្វើកីឡាជាតិលើកក្រោយៗទៀត ខណៈ ដឺភីក បានជួយផ្សពផ្សាយ​ពីកីឡា​ជាតិផងដែរ។ ជាមួយគ្នានេះ តំណាងផ្សារទំនើប ដឺភីក បានបង្ហាញពីការ​ប្តេជ្ញាចិត្តខ្ពស់ ក្នុងការគាំទ្រដល់វិស័យកីឡាគុនដាវកម្ពុជា និងប្រភេទកីឡាដទៃទៀត ក្នុងន័យរួមចំណែកជាមួយកីឡាកម្ពុជាកាន់តែរីកចម្រើនបន្ថែមទៀត រួមទាំងកីឡា​គុនដាវ ស្របតាមចក្ខុវិស័យឆ្ពោះទៅរកមេដាយមាសរបស់ឯកឧត្តម តែ ឡូរិន ទៀតផង។

ក្រោយពេលបិទកម្មវិធីកីឡាជាតិគុនដាវ ដឺភីក បានបើកព្រឹត្តការណ៍បន្តបន្ទាប់​ទៀតចាប់ពីថ្ងៃទី៨ខែវិច្ឆិកានេះតទៅ ក្រោមប្រធានបទ Sustainable Fashion Week ហើយថ្ងៃ៩ ខែវិច្ឆិកា ព្រឹត្តការណ៍សំខាន់បន្តទៀត គឺចាប់ពីម៉ោង៦ល្ងាច និងមានការសម្តែងក្បាច់គុន ដូចជា តេក្វាន់ដូ ដែលមកពីសហព័ន្ធតេក្វាន់ដូ និង​ការសម្តែងក្បាច់គុនវូស៊ូ ដែលមកពីសហព័ន្ធកីឡាវូស៊ូកម្ពុជា ក៏ដូចជាបិទកម្មវិធី​ដោយ ការដើរម៉ូតសម្តែងពីកីឡាករនីផ្នែកល្បុក្កតោជាច្រើន ដែលការដើរម៉ូតនេះមាន​ការ​គាំទ្រពីខាង REMADE in Cambodia និងក្លឹបកីឡា Cambodian Top Team ហើយការដើរម៉ូតនេះមានឈ្មោះថា REMADE Tribute to Khmer Martial Arts៕

ថតដោយ ៖ ងីម ឆៃហួត
អត្ថបទ ៖ ជាវ ចន្ធូ