បរទេស ៖ មេដឹកនាំក្រុមឧទ្ទាម Huthi នៅប្រទេសយេម៉ែន កាលពីថ្ងៃព្រហស្បតិ៍ បានរិះគន់លោក Donald Trump សម្រាប់ការគាំទ្រអ៊ីស្រាអែល ដោយនិយាយថា ប្រធានាធិបតីជាប់ឆ្នោតរបស់សហរដ្ឋអាមេរិករូបនេះ នឹងបរាជ័យក្នុងការបញ្ចប់ជម្លោះមជ្ឈិមបូព៌ា អំឡុងអាណត្តិទីពីរ របស់លោក។

លោក Abdul Malik al-Huthi ដែលក្រុមរបស់លោកមានសម្ព័ន្ធភាព ជាមួយប្រទេសអ៊ីរ៉ង់ បាននិយាយថា កិច្ចព្រមព្រៀងធ្វើឱ្យមានលក្ខណៈធម្មតាៗ រវាងប្រទេសអារ៉ាប់ និងអ៊ីស្រាអែល ដែលគ្រប់គ្រងដោយរដ្ឋបាលរបស់លោក Trump ក្នុងអំឡុងពេលអាណត្តិដំបូងរបស់គាត់ នឹងមិនអាចជួយធ្វើឱ្យជម្លោះ កាន់តែខិតជិតដល់ទីបញ្ចប់ នោះទេ។

បេក្ខជនមកពីគណបក្សសាធារណរដ្ឋ លោក Trump បានយកឈ្នះលើអនុប្រធានាធិបតីប្រជាធិបតេយ្យ Kamala Harris ក្នុងការបោះឆ្នោត កាលពីថ្ងៃអង្គារ ហើយគ្រោងនឹងចូលកាន់តំណែងក្នុងខែមករា ដោយត្រលប់ទៅការិយាល័យ Oval Office វិញបន្ទាប់ពីរយៈពេល ៤ ឆ្នាំ។

ជ័យជម្នះរបស់លោកបានកើតឡើងជាមួយនឹងមជ្ឈិមបូព៌ា ស្ថិតក្នុងភាពចលាចល បន្ទាប់ពីការផ្ទុះសង្រ្គាមហ្គាហ្សា ក្នុងខែតុលា ឆ្នាំ២០២៣ ដែលបង្កឡើងដោយការវាយប្រហារមិនធ្លាប់មានពីមុនមក បង្កឡើងដោយក្រុមសកម្មប្រយុទ្ធប៉ាឡេស្ទីនដែលគាំទ្រដោយអ៊ីរ៉ង់ គឺ ក្រុម Hamas ទៅលើអ៊ីស្រាអែល។

ពួក Huthis ដែលបានគ្រប់គ្រងរដ្ឋធានី Sanaa នៅប្រទេសយេម៉ែន តាំងពីឆ្នាំ២០១៤ បានវាយប្រហារលើនាវាពាណិជ្ជករ នៅសមុទ្រក្រហម និងឈូងសមុទ្រ Aden បញ្ជាក់អំពីសាមគ្គីភាព ជាមួយក្រុមហាម៉ាស៕

ប្រភពពី AFP ប្រែសម្រួល៖ សារ៉ាត