សៀមរាប ៖ អង្គការជឿជាក់លើសិស្សជនបទកម្ពុជា និងក្រុមហ៊ុនកូកា-កូឡាកម្ពុជា នៅថ្ងៃទី៨ ខែវិច្ឆិកា ឆ្នាំ២០២៤ បានសហការគ្នាដាំដើមឈើចំនួន ២៥០ដើម នៅក្រុងរុនតាឯកតេជោសែន នៃខេត្តសៀមរាប។

គម្រោងនេះ មានឈ្មោះថា គម្រោង ធី “ដើមឈើសម្រាប់ជីវិត” (Project T – Trees for life) ដែលមានបំណងរួមចំណែកកសាងភាពធន់នឹងអាកាសធាតុ នៅក្រុងរុនតាឯកតេជោសែន ដែលទើបតែបង្កើតឡើងថ្មីៗនេះ។ ជាប្រយោជន៍ពង្រីកផលវិជ្ជមានរបស់គម្រោងឲ្យកាន់តែទូលំទូលាយ ដើមឈើចំនួន ៧៥០ ដើមបន្ថែមទៀត ត្រូវបានផ្តល់ជូនដល់ប្រជាពលរដ្ឋក្នុងមូលដ្ឋាន ជាអំណោយពីមន្ទីរបរិស្ថានខេត្តសៀមរាប និងអាជ្ញាធរជាតិអប្សរា។

ជាផ្នែកមួយនៃការប្តេជ្ញាចិត្តរបស់សម្ព័ន្ធកូកា-កូឡាចំពោះសកម្មភាពអាកាសធាតុ គម្រោងដាំដើមឈើនេះដើរស្របទៅនឹងគោលដៅរួមរបស់ក្រុមហ៊ុនក្នុងការកាត់បន្ថយការបំភាយឧស្ម័ន។ តាមរយៈការដាំដើមឈើនេះ ក្រុមហ៊ុនកូកា-កូឡាកម្ពុជា និងអង្គការជឿជាក់លើសិស្សជនបទកម្ពុជា កំពុងចូលរួមកាត់បន្ថយបរិមាណកាបូន ស្ដារគុណភាពខ្យល់ និងលើកកម្ពស់ដល់ភាពបៃតងរបស់សហគមន៍ថែមមួយកម្រិតទៀត។

ក្រៅពីសមាជិកសហគមន៍ និងបុគ្គលិកអង្គការ អ្នកស្ម័គ្រចិត្តប្រមាណ80នាក់ដែលជាបុគ្គលិកក្រុមហ៊ុនកូកា-កូឡាកម្ពុជា បានចូលរួមដាំដើមឈើ បង្ហាញពីការយកចិត្តទុកដាក់ចូលរួមធ្វើការងារសង្គម និងបរិស្ថាន។ ការងារស្ម័គ្រចិត្តនេះគឺស្របតាមយុទ្ធសាស្រ្តអភិវឌ្ឍន៍ប្រកបដោយចីរភាពឆ្នាំ 2030 របស់ក្រុមហ៊ុនស្វាយអឺ កូកា-កូឡា ដែលយកចិត្តទុកដាក់ខ្ពស់ទៅលើការអភិវឌ្ឍន៍សហគមន៍ និងលើកទឹកចិត្តដល់បុគ្គលិកឲ្យធ្វើការងារស្ម័គ្រចិត្តជួយសង្គម។

លោក ឆាយ ដឹប នាយកប្រតិបត្តិនៃអង្គការជឿជាក់លើសិស្សជនបទកម្ពុជា មានប្រសាសន៍ថា៖ “យើងខ្ញុំសូមថ្លែងអំណរគុណដល់ក្រុមហ៊ុនកូកា-កូឡាកម្ពុជា ដែលបានគាំទ្រដល់គម្រោងអភិវឌ្ឍន៍សហគមន៍របស់យើង។ ក្រោមកិច្ចសហការរួមគ្នា យើងអាចធ្វើឲ្យក្រុងរុនតាឯកតេជោសែន កាន់តែបៃតង ហើយធន់នឹងអាកាសធាតុ។”
“សម្ព័ន្ធកូកា-កូឡា ប្តេជ្ញាកសាងអនាគតមួយដែលមានចីរភាពគង់វង្សយូរអង្វែងសម្រាប់មនុស្សជំនាន់ក្រោយ។

តាមរយៈភាពជាដៃគូជាមួយអង្គការនាថ្ងៃនេះ យើងអាចរួមចំណែកជួយឲ្យសហគមន៍អាចកសាងភាពធន់នឹងអាកាសធាតុបានកាន់តែល្អប្រសើរ។ កូកា-កូឡាកម្ពុជា តែងមានស្មារតីជួយអភិវឌ្ឍសហគមន៍ ហើយស្មារតីនេះគឺជាផ្នែកដ៏សំខាន់មួយនៃយុទ្ធសាស្ត្រអភិវឌ្ឍន៍ចីរភាពឆ្នាំ2030 «ជម្រើសយើង អនាគតយើង» ដែលមានដើមចមចេញពីក្រុមហ៊ុនមេរបស់យើង គឺស្វាយអឺ កូកា-កូឡា។ សហគមន៍គឺជាផ្ទះទីពីររបស់យើង ហើយយើងប្តេជ្ញាកសាងផ្ទះនេះឲ្យមានចីរភាពគង់វង្ស តទៅមុខទៀត។”

លោក អ៉ឹង សុភ័ណ អភិបាល នៃគណៈអភិបាលក្រុងរុនតាឯកតេជោសែន បានមានប្រសាសន៍ថា “យើងខ្ញុំសូមកោតសរសើរចំពោះការខិតខំប្រឹងប្រែងរបស់ក្រុមហ៊ុនកូកា-កូឡាកម្ពុជា និងអង្គការដែលរួមចំណែកដល់ការអភិវឌ្ឍក្រុងរុនតាឯកតេជោសែននាថ្ងៃនេះ។ ជាការពិតណាស់ថា ការកសាងសហគមន៍មួយឲ្យធន់នឹងការប្រែប្រួលអាកាសធាតុ ទាមទារឲ្យមានកិច្ចសហការពីគ្រប់ភាគីពាក់ព័ន្ធ។

យ៉ាងណាមិញ កម្មវិធីនាថ្ងៃនេះគឺជាការបោះជំហានមួយទៀតរបស់យើង ឆ្ពោះទៅទិសដៅដ៏ត្រឹមត្រូវ ហើយយើងសង្ឃឹមថានឹងមានដៃគូសហការដទៃទៀត មកចូលរួមអភិវឌ្ឍក្រុងរុនតាឯកតេជោសែនរបស់យើងនេះ ជាបន្តបន្ទាប់ទៅមុខទៀត។” តាមរយៈកិច្ចសហការនេះ កូកា-កូឡាកម្ពុជា និងអង្គការ សង្ឃឹមថាអាចកៀងគរប្រជាពលរដ្ឋកាន់តែច្រើនឡើង ឲ្យចូលរួមកសាងអនាគតប្រទេសជាតិនិងថែរក្សាបរិស្ថាន ឲ្យកាន់តែមានភាពបៃតង ស្រស់បំព្រង ប្រកបដោយចីរភាព៕

អត្ថបទ ÷ ឈឹម ទីណា