បណ្តុះបណ្តាល “ស្តីពីបរិយាបន្នពិការភាព និងបង្ការទប់ស្កាត់ ការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ” ដល់សាខាកាកបាទក្រហមខេត្តចំនួន៧
បាត់ដំបង៖មន្រ្តីពាក់ព័ន្ធ យុវជនស្ម័គ្រចិត្តសាខាកាកបាទក្រហមកម្ពុជានៃខេត្តចំនួន៧ បានមកទទួលការបណ្តុះបណ្តាល “ស្តីពី៖បរិយាបន្នពិការភាព និងបង្ការទប់ស្កាត់ការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ” រយៈពេលពីរថ្ងៃ ពីថ្ងៃទី៧-៨ ខែវិច្ឆិកាឆ្នាំ២០២៤នៅទីស្នាក់ការសាខាកាកបាទក្រហមកម្ពុជា ខេត្តបាត់ដំបង។
វគ្គបណ្តុះបណ្តាលនេះ ក្នុងគោលបំណង ដើម្បីពង្រឹង នូវសមត្ថភាពមន្រ្តី និងយុវជនឱ្យបានយល់ដឹងពីបរិយាបន្នពិការភាព និងក្សាស្វែងយល់នូវវិធីសាស្ត្រទប់ស្កាត់ ពីការកេងប្រវ័ញ្ច និងការរាយការណ៍ពីបទល្មើសលើកុមារតាមអនឡាញ។ ជាពិសេស វិធីសាស្ត្រងការទប់ស្កាត់ឱ្យបានទាន់ពេលវេលា ពីការកេងប្រវ័ញ្ចផ្លូវភេទលើកុមារតាមអនឡាញ ។
ក្នុងឱកាសអញ្ជើញបើកវគ្គបណ្តុះបណ្តាលនេះលោកជំទាវ ម៉ែន នារីសោភ័គ អគ្គលេខាធិការរងទី១កាកបាទក្រហមកម្ពុជា បានលើកឡើងថា ការយកបញ្ហាកេងប្រវ័ញ្ចតាមផ្លូវភេទកុមារតាមអនឡាញមកធ្វើជាប្រធានបទក្នុងវគ្គបណ្តុះបណ្តាលនេះដោយសារតែជាផ្នែកយនៃសកម្មភាពការងាររបស់កាកបាទក្រហមកម្ពុជា ដែលបានដាក់ចេញនៅក្នុងយុទ្ធសាស្ត្រឆ្នាំ២០២១-២០៣០ និងស្របពេលច្ចុប្បន្នដែលក្រសួងកិច្ចការនារី តែងតែមានយុទ្ធនាការបូរពណ៌សក្នុងការលើកកម្ពស់សិទ្ធិស្ត្រីនិងកុមារ។
លោក ផេង សិទ្ធី អភិបាលរងខេត្ត និងជាសមាជិកគណៈកម្មាធិការសាខាកាកបាទក្រហមកម្ពុជាខេត្តបាត់ដំបងបានលើកឡើងថា ជនមានពិការភាពគឺជាតួអង្គមួយយ៉ាងសំខាន់ក្នុងការចូលរួមអភិវឌ្ឍគ្រួសារ សហគមន៍ និងសង្គមជាតិ ខណៈបច្ចុប្បន្នរាជរដ្ឋាភិបាលនបេសកកម្ម និងចក្ខុវិស័យច្បាស់លាស់ ដោយបានគិតគូរយកចិត្តទុកដាក់ដល់ជនមានពិការភាព និងក្រុមគ្រួសាររបស់ពួកគេ ដោយយ៉ាងណាជួយបង្កលក្ខណៈឱ្យពួកគេមានឱកាសស្មើគ្នាក្នុងការបញ្ចេញនូវសក្តានុពលសមត្ថភាពនិងភាពប៉ិនប្រសប់របស់ខ្លួនដើម្បីឱ្យគុណភាពជីវិតបានល្អប្រសើរ។
សូមជម្រាប មន្រ្តីសាខាកាកបាទក្រហមកម្ពុជាទាំងប្រាំពីរខេត្តដែលមកទទួលការបណ្តុះបណ្តាលមានខេត្តសៀមរាប ឧត្តរមានជ័យ កំពង់ឆ្នាំង ប៉ៃលិន ពោធិ៍សាត់និងខេត្តបន្ទាយមានជ័យ ៕
អត្ថបទនិងរូបភាព៖អ៊ុក សំអាន
