ភ្នំពេញ៖ កីឡាករ កីឡាការិនីមកពីសហព័ន្ធកីឡាជាតិកម្ពុជាជាច្រើនប្រភេទកីឡា ដូចជា​តេក្វាន់ដូ WT វូស៊ូ គុនល្បុក្កតោ ប្រដាល់គុនខ្មែរជាដើម បានបង្ហាញក្តី​រីករាយ​ជាខ្លាំង ក្នុងការចូលរួមបង្ហាញក្បាច់សម្តែងពិសេសៗយ៉ាងជក់ចិត្តជាច្រើន​ឈុតជូន​ដល់ប្រិយមិត្តទស្សនិកជនជាតិ និងអន្តរជាតិ ក្នុងកម្មវិធី The Peak Prelude នៅផ្សារទំនើប ដឺភីក ។

ក្រុមជម្រើសជាតិកីឡាវូស៊ូកម្ពុជាដែលបានដឹកនាំដោយលោក ម៉ៅ ចន្ថាវុធ អគ្គលេខា​ធិការ សហព័ន្ធកីឡាវូស៊ូកម្ពុជា និងអ្នកគ្រូជំនាញរបស់សហព័ន្ធបានឱ្យដឹងថា ក្នុង​កម្ម​វិធី​នេះ អ្នកគ្រូបានដឹកនាំកីឡាករ កីឡាការិនីជម្រើសជាតិចំនួន ៨នាក់មកចូល​រួមសម្តែងក្បាច់គុនពិសេសៗបង្ហាញជូនមហាជន និងភ្ញៀវជាតិ និងអន្តរជាតិ ក្នុងកម្មវិធីនេះ ក្រោមការរៀបចំ និងគាំទ្រយ៉ាងពេញទំហឹងពីកម្មវិធី The Peak Prelude។ គ្រូជំនាញសហព័ន្ធបានបង្ហាញក្តីរីករាយ ដែលផ្សារទំនើប ដឺភីក បានគាំទ្រនិងបានអញ្ជើញកីឡាករ កីឡាការិនីចូលរួមបង្ហាញក្នុងកម្មវិធីនេះ ដើម្បីបំផុសស្មារតីឱ្យមហាជនកាន់តែស្គាល់ និងស្រឡាញ់កីឡាវូស៊ូកម្ពុជា។ ជាមួយគ្នានេះ កីឡាការិនីគុនល្បុក្កតោ សំ ថារ័ត្ន បានលើកឡើងក្រោយ​បញ្ចប់ការសម្តែងនេះថា ការដាក់ក្បាច់គុនក្នុងការដើរបង្ហាញម៉ូតនេះ ខ្ញុំមានអារម្មណ៍ថា ប្លែកមែនទែន។

មុនដំបូង ខ្ញុំគិតថា អត់ធ្លាប់អាចនឹងឆ្គង ប៉ុន្តែតែនៅពេលយើងដាក់ក្បាច់គុន​រួមបញ្ចូល​ទៅក្នុងការបង្ហាញម៉ូតហ្នឹង ប្រៀបដូចជាការបន្ថែមនូវសហសម័យមួយទៀត ដល់យើង​ថែមសម័យចូលជាមួយបុរាណ ហើយក៏ផ្ដល់នូវទស្សនីយភាពប្លែកដល់​មិត្ដៗបរទេស ដែលគាត់ចូលចិត្តវិស័យបង្ហាញម៉ូត ទាញចំណាប់អារម្មណ៍ពួកគាត់​ឱ្យស្គាល់ក្បាច់គុនបុរាណខ្មែររបស់យើង ក៏ដូចជាបង្ហាញដល់មិត្ដៗនារីឃើញថា នារីដែលតែងខ្លួនស្អាតៗ ទោះបីក្នុងកាលៈទេសៈបែបណា ក៏អាចការពារខ្លួនបាន។ ចឹងក្បាច់គុន គឺផ្លាស់ប្ដូរជីវិតគ្រប់ៗគ្នា នៅពេលពួកគាត់បានសិក្សាពីក្បាច់គុន​ចូលក្នុងខ្លួនគាត់។ សប្បាយចិត្ត ដែលទស្សនិកជន ពិសេសបរទេសស្រឡាញ់ ចាប់អារម្មណ៍ និងចូលចិត្ត ចំពោះការបង្ហាញនូវក្បាច់គុនបុរាណខ្មែរ»។

កីឡាការិនីដ៏ឆ្នើមរបស់កម្ពុជារូបនេះជឿថា បើសិនជាការបង្ហាញនេះឱ្យកាន់តែច្រើន មិនថានៅបងប្អូននៅស្រុកខ្មែរយើងទេ ជាក់ស្ដែងទស្សនិកជនបរទេសគាត់​ចូលរួម​ច្រើន ដូច្នេះអាចជំរុញឱ្យពួកគាត់ស្គាល់ក្បាច់គុនខ្មែរយើងកាន់តែច្រើនថា នៅខ្មែរ​យើងមានធនធានក្បាច់គុនច្រើន ដែលជាសិល្បៈក្បាច់គុនខ្មែរបុរាណ។ យើងបាន​បង្ហាញកាន់តែច្បាស់ឱ្យបរទេស ហើយបរទេសបានឃើញគុណភាពបែបនេះ គាត់​នឹងនិយាយតៗទៅទៀត ដើម្បីផ្សព្វផ្សាយទៅដល់គ្នាគាត់ ដែលជួយជំរុញ​ដល់ការ​ទាក់ទាញភ្ញៀវទេសចរមកលេងស្រុកយើងកាន់តែច្រើនដែរ។

បើតាមការបញ្ជាក់ពីតំណាងផ្សារទំនើប ដឺភីក បានឱ្យដឹងថា នេះជាការបើកដំណើរ​ការសាកល្បងជាមួយនឹងការរួមចំណែកដល់សិល្បៈក្បាច់គុណខ្មែរ និងការដើរម៉ូត​សំលៀកបំពាក់កែច្នៃឡើងវិញ ដោយផ្សារទំនើប ដឺភីក បានបន្តនាំមកនូវភាពរស់រវើក និងភាពរំភើបរីករាយ តាមរយៈកម្មវិធី The Peak Prelude ដែលជាស៊េរីព្រឹត្តិ​ការ​ណ៍​ក្នុងដំណាក់កាលការបើកដំណើរការសាកល្បង ដែលរួមបញ្ចូលគ្នានូវសិល្បៈ កីឡា អាហារ និងការតាំងពិពណ៌ជាច្រើន។

ចាប់តាំងពីថ្ងៃ​ទី០៨ ខែវិច្ឆិកា ឆ្នាំ២០២៤មក ផ្សារទំនើប ដឺភីក បាននាំមកនូវ​កម្មវិធី​ដ៏មានភាពទាក់ទាញមួយមានឈ្មោះថា Sustainable Fashion Week ដែលជា​សប្តាហ៍លើកតម្កើងពីការបង្ហាញនូវហាងលក់សម្លៀក​បំពាក់បែបនិរន្តរភាព workshop កែច្នៃឡើងវិញ និងហាងលក់ម្ហូបអាហារជាច្រើន និងមានការ​តាំង​បង្ហាញ​ពីហាង​ Bodia Apothecary ជាមួយនឹងបទពិសោធន៍ថ្មីនៃការថតវីដេអូ ៣៦០ដ៏ពេញនិយម៕

ថតដោយ ៖ ជីម ភារ៉ា
អត្ថបទ ៖ ជាវ ចន្ធូ