ប្រកួតកីឡាពានរង្វាន់សម្តេចក្រឡាហោម ស ខេង ៖ “យុវជនម្នាក់លេងកីឡាមួយប្រភេទប្រចាំជីវិត និងចៀសឆ្ងាយពីគ្រឿងញៀន”
បាត់ដំបង៖ព្រឹត្តិការណ៍ការប្រកួតកីឡាពានរង្វាន់សម្តេចក្រឡាហោម ស ខេងឆ្នាំ២០២៤ ក្រោមប្រធានបទ៖ “យុវជនម្នាក់លេងកីឡាមួយប្រភេទប្រចាំជីវិត និងចៀសឆ្ងាយពីគ្រឿងញៀន”បានចាប់ផ្តើមនៅដើមសប្ដាហ៍នេះនៅទីលានបាល់ទាត់នៃសាកលវិទ្យាល័យជាតិបាត់ដំបង ខេត្តបាត់ដំបង ។ការប្រកួតនឹងប្រព្រឹត្តទៅតាមគោលការណ៍ប្រកួតរហូតដល់ពាក់កណ្ដាលខែធ្នូលើ៤វិញ្ញាសារួមមាន បាល់ទាត់ បាល់ទះ វាយសី និងប៉េតង់(ប៊ូល)។
ការប្រកួតកីឡាពានរង្វាន់សម្តេចក្រឡាហោម ស ខេងឆ្នាំ២០២៤ត្រូវបានរៀបចំឡើងដោយសហភាពសហព័ន្ធយុវជនកម្ពុជា(ស.ស.យ.ក.)ខេត្តបាត់ដំបង។ថ្លែងក្នុងពិធីបើកការប្រកួតជាផ្លូវការ ឯកឧត្តម ស សុខា អនុប្រធានសហភាពសហព័ន្ធយុវជនកម្ពុជាទទួលបន្ទុក ខេត្តព្រៃវែង បាត់ដំបង និងខេត្តបន្ទាយមានជ័យ ជាតំណាងឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.)បានបញ្ជាក់ថា ការប្រកួតកីឡាពានរង្វាន់សម្ដេចក្រឡាហោម ស ខេង ឆ្នាំ២០២៤គឺជាការប្រកួតលើកទី២ ហើយនឹងបន្តធ្វើជារៀងរាល់ឆ្នាំក្នុងក្របខ័ណ្ឌកម្រិតខេត្ត ដែលអនុញ្ញាតឱ្យប្រជាពលរដ្ឋ ជាពិសេសប្អូនៗជាយុវជនបានចូលរួមប្រកួតប្រជែង។ឯកឧត្តមបន្តថា ការបង្កើតព្រឹត្តិការណ៍នេះឡើង ក្នុងគោលបំណងដើម្បីបង្កើន និងលើកកម្ពស់នូវសុខុមាលភាពប្រជាពលរដ្ឋដែលជាសរសរទ្រូងនៃប្រទេសជាតិ,ដើម្បីរឹតចំណងសាមគ្គីភាព មិត្តភាព រវាងស.ស.យ.កតាមបណ្តាក្រុង ស្រុក ។
ឯកឧត្តម ស សុខា បានគូសបញ្ជាក់ថា រាជរដ្ឋាភិបាលកម្ពុជាអាណត្តិទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត ក៏ដូចជារាជរដ្ឋាភិបាលនាអាណត្តិមុនៗ បានយកចិត្តទុកដាក់លើវិស័យអប់រំកាយ និងកីឡា ។ឯកឧត្តមក៏បានណែនាំដល់អ្នករៀបចំ ឱ្យរៀបចំប្រកបដោយការទទួលខុសត្រូវខ្ពស់,ឱ្យមានស្ដង់ដារតែមួយដូចការប្រកួតលក្ខណៈជាតិដែរ ដើម្បីឱ្យកីឡាករ កីឡាការិនី អាច
រៀនសូត្រ ដកស្រង់បទពិសោធន៍បាន ។
ឯកឧត្តម ស រដ្ឋា ប្រធាន ស.ស.យ.ក. ខេត្តបាត់ដំបង បានបញ្ជាក់ថា ការប្រកួតកីឡាពានរង្វាន់សម្តេចក្រឡាហោម ស ខេងឆ្នាំនេះ ក្រោមប្រធានបទ៖ “យុវជនម្នាក់លេងកីឡាមួយប្រភេទប្រចាំជីវិត និងចៀសឆ្ងាយពីគ្រឿងញៀន” ។ប្រធានបទនេះក្នុងគោលបំណងដើម្បីឱ្យប្រជាពលរដ្ឋ ជាពិសេស យុវជនមានសុខភាពល្អ បង្កើននូវសាមគ្គីភាព មិត្តភាព ចៀសឆ្ងាយពីគ្រឿងញៀន និងកាត់បន្ថយភាពអសកម្មផ្សេងៗក្នុងសង្គម និងរួមចំណែកក្នុងការលើកកម្ពស់វិស័យកីឡា ឱ្យកាន់តែរីកចម្រើនឈានដល់ការសម្រេចបានគោលនយោបាយជាតិ ស្តីពីការអភិវឌ្ឍន៍វិស័យអប់រំនិងកីឡា។ការប្រកួតបានចាប់ផ្ដើមពីថ្ងៃទី១០ ខែវិច្ឆិការហូតដល់ពាក់កណ្ដាលខែធ្នូនិងមាន៤វិញ្ញាសាសម្រាប់ការប្រកួត គឺ បាល់ទាត់ បាល់ទះ វាយសី និងប៉េតង់(ប៊ូល)។
ចំណែកឯកឧត្តម សុខ លូ អភិបាលខេត្តបាត់ដំបង បានពណ៌នាលើការរៀបចំព្រឹត្តិការណ៍ប្រកួតកីឡាពានរង្វាន់ សម្ដេចក្រឡាហោម ស ខេង របស់ស.ស.យ.ក ខេត្តបាត់ដំបង ជាការបង្ហាញពីសុខសន្តិភាព ការទំនាក់ទំនងល្អក្នុងស្មារតីសាមគ្គីភាព ភាតរភាព ពោលគឺក្រោមពាក្យស្លោក «កីឡារស់ក្នុងសន្តិភាព»៕
អត្ថបទនិងរូបភាព៖ អ៊ុក សំអាន ប.ប
