បរទេស៖ ប្រធានាធិបតីជាប់ឆ្នោត របស់សហរដ្ឋអាមេរិក លោក Donald Trump រួមទាំង សហគ្រិនមានទ្រព្យមហាសាល លោក Elon Musk បានបង្ហាញវត្តមាន នៅសង្វៀនប្រកួតប្រដាល់ដ៏ល្បី UFC នៅទីក្រុងញូវយ៉ក កាលពីថ្ងៃសៅរ៍។

លោក Donald ត្រូវបានស្វាគមន៍ ដោយការស្រែកយ៉ាងខ្លាំង ពីសំណាក់អ្នកគាំទ្រ ខណៈលោកបានចូលរួមទស្សនា ការប្រកួតទម្ងន់ធ្ងន់ Ultimate Fighting Championship ឬ ហៅកាត់ UFC នៅសង្វៀន Madison Square Garden។

សម្ព័ន្ធមិត្តនយោបាយ ជាច្រើន របស់លោក Trump ក៏បានចូលរួមផងដែរ រួមទាំង លោក Vivek Ramaswamy ដែលត្រូវបានស្នើដោយ លោក Trump ឱ្យដឹកនាំកិច្ចខិតខំប្រឹងប្រែង ដើម្បីកាត់បន្ថយ ភាពគ្មានប្រសិទ្ធភាព របស់រដ្ឋាភិបាល។ លោក Robert F. Kennedy Jr. ដែលត្រូវបានលោក Trump បានតែងតាំង ជារដ្ឋមន្ត្រីសុខាភិបាល ក៏មានវត្តមាន នៅក្នុងការប្រកួតនេះដែរ។ លោកស្រី Tulsi Gabbard អតីតសមាជិកសភា គណបក្សប្រជាធិបតេយ្យ ដែលបានទទួលតួនាទី ជានាយកស៊ើបការណ៍សម្ងាត់ជាតិ ក៏មានវត្តមាន នៅក្នុងហ្វូងមនុស្សដែលជាអ្នកគាំទ្រ ផងដែរ រួមជាមួយ នឹងកូនប្រុសរបស់លោក Trump គឺ Eric និង Don Jr ព្រមទាំង តន្ត្រីករល្បី Kid Rock ដែលតែងតែ​គាំទ្រលោកTrump ។

លោក Trump ត្រូវបានស្វាគមន៍យ៉ាងកក់ក្តៅ ពីសំណាក់អ្នកវិភាគការផ្សាយរបស់ UFC លោក Joe Rogan ដែលជាពិធីករ ផតឃែស្ថ ដ៏ពេញនិយម ដែលបានគាំទ្រលោក Trump បន្ទាប់ពីលោកបានបង្ហាញខ្លួនជាភ្ញៀវ នៅក្នុងកម្មវិធីរបស់លោក។

យ៉ាងណាមិញ ប្រធានាធិបតីជាប់ឆ្នោតរូបនេះ ជាញឹកញាប់ បានចូលរួមព្រឹត្តិការណ៍ UFC ហើយធ្លាប់បានចូលរួមការប្រកួត បីដង ក្នុងអំឡុងពេលយុទ្ធនាការរបស់លោក សម្រាប់ការប្រជែង សេតវិមាន។ ទំនាក់ទំនងរបស់លោក Trump ទៅនឹងពិភពប្រយុទ្ធ កាន់តែស៊ីជម្រៅ ខណៈដែល កីឡាករ UFC ជាច្រើនបានបង្ហាញ ជាសាធារណៈ ចំពោះការគាំទ្ររបស់ពួកគេ លើរូបលោក Trump៕

ប្រភពពី AFP ប្រែសម្រួល៖ សារ៉ាត