សម្តេចតេជោ ហ៊ុន សែន ស្នើក្រសួងធម្មការ ធ្វើការជាមួយព្រះសង្ឃ និងអាជ្ញាធរ ពិចារណារកទីតាំងរួម ខណៈទីអារាម ពោរពេញទៅដោយចេតិយ
(ភ្នំពេញ៖ សម្តេចតេជោ ហ៊ុន សែន បានស្នើក្រសួងធម្មការ និងសាសនា ធ្វើការជាមួយព្រះសង្ឃ និងអាជ្ញាធរ ពិចារណារកទីតាំងរួម ខណៈទីអារាមបច្ចុប្បន្ន ចង្អៀនណែនទៅដោយចេតិយ របស់ប្រជាពុទ្ធបរិស័ទ ។
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានថ្លែងដូច្នេះ ក្នុងឱកាសអញ្ជើញជាព្រះរាជតំណាងដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងបរទេស លើកទី៣២ នៅវិទ្យាស្ថានគរុកោសល្យ និងវិក្រឹត្យការ រាជធានីភ្នំពេញ នាព្រឹកថ្ងៃទី២១ ខែវិច្ឆិកា ឆ្នាំ២០២៤ នៅវិទ្យាស្ថានជាតិអប់រំ ។
សម្ដេចតេជោ ហ៊ុន សែន មានប្រសាសន៍ថា សំណាងល្អ បច្ចុប្បន្ននៅទីវត្តអារាម មានកន្លែងសម្រាប់ធ្វើចេតិយបាន ប៉ុន្តែនៅពេលខាងមុខ គ្មានកន្លែងធ្វើចេតិយទេ ។ ដូច្នេះ អាចជាវដីទុកនៅទីកន្លែងណាមួយ កុំនៅឆ្ងាយពេក ដើម្បីពុទ្ធបរិស័ទអាចមានទីកន្លែងសម្រាប់ការធ្វើចេតិយ បើធ្វើតែក្នុងវត្តរបៀបនេះ ពេលខ្លះ រើកុដលោក ធ្វើចេតិយក៏មានដែរ ។
សម្ដេចតេជោប្រធានព្រឹទ្ធសភា បានមើលឃើញថា បច្ចុប្បន្ន នៅតាមទីធ្លាវត្តអារាម ហាក់មានសភាពចង្អៀតណែន និងមានចេតិយគ្របដណ្ដប់លើទីធ្លាវត្តអារាមស្ទើរ ៥០ភាគរយ ទៅហើយ ដូច្នេះគួរគិតគូរទុកជាមុន ដើម្បីសម្រួលទៅដល់ប្រជាពលរដ្ឋអាចជាវដី ទៅធ្វើចេតិយ ។
សម្ដេចតេជោ បានបញ្ជាក់ថា ចិន មានកន្លែងសម្រាប់ធ្វើមុង ហើយកម្ពុជា ក៏អាចមានកន្លែងសម្រាប់បញ្ចុះ ការធ្វើចេតិយផងដែរ ចំពោះរឿងមច្ឆាវិញ មិនពិបាកនោះទេ ។ ក្នុងន័យនេះ សម្ដេច ថា ការរៀបចំបែបនេះ មិនមែនជាផ្នូរខ្មោចរួមដូចសម័យ ប៉ុល ពត ទេ ប៉ុន្តែជាទីកន្លែងសម្រាប់ជួបជុំគ្រួសារ ដែលមានអាទិភាព យកទៅដាក់រួមផងដែរ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
