ខ្សែភាពយន្តចល័តកម្ពុជា-ចិន បានបន្តបេសកកម្មផ្លាស់ប្តូរវប្បធម៌ នៃការចាក់បញ្ចាំងខ្សែភាពយន្ត នៅខេត្តកំពង់ឆ្នាំង
(កំពង់ឆ្នាំង)៖ ក្រុមការងារចាក់បញ្ចាំងភាពយន្តចល័តកម្ពុជា-ចិន លើកទី៨ បានមកចាក់ បញ្ចាំងលើទឹកដី នៃខេត្តកំពង់ឆ្នាំង ក្រោមការសម្របសម្រួលពីមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង និងកិច្ចសហការពីរដ្ឋបាលសាលាខេត្ត និងអាជ្ញាធរពាក់ព័ន្ធក្នុងខេត្ត ដោយក្រុមការងារបានរៀបចំសម្ភារៈ ដំឡើង ប៊ែនន័រ ស្លាយ ដើម្បីបានចាក់បញ្ចាំង ជូនពុក ម៉ែ បងប្អូនប្រជាពលរដ្ឋបានទស្សនាកំសាន្ត។
លោក ប៊ុនថន សុខាណារិទ្ធ ដែលជាប្រធានស្តីទី នៃមន្ទីរវប្បធម៌ខេត្តកំពង់ឆ្នាំង ព្រមទាំងមន្ត្រីរាជការ អាជ្ញាធរខេត្ត បានជួយសម្របសម្រួល លើទីតាំងចំនួន៥ គឺ ១-សួនច្បារសម្តេចចៅហ្វាវាំង,២-តារាងបាល់ទាល់ មុខសាលាខេត្ត ,៣-សួនច្បារវិមានឯករាជ្យ,៤-ទីតាំងភូមិអណ្តូងឬស្សី និង៥-វិទ្យាល័យ កំពង់ត្រឡាច ដោយមានការអញ្ជើញចូលរួម ពីឯកឧត្តម ទិត្យ ថាវរិទ្ធ រដ្ឋលេខាធិការក្រសួងវប្បធម៌និងវិចត្រសិល្បៈ និងលោកជំទាវ ព្រមទាំងបងប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្សបានចូលរួមទស្សនា ប្រមាណជា ១៤០០នាក់ ដែលធ្វើអោយកម្មវិធីចាក់បញ្ចាំងភាពយន្តចល័តមួយនេះ ប្រកបដោយស្នាមញញឹម ក្រោមបរិយាកាសសប្បាយរីករាយ និងកក់ក្តៅ ពីសំណាក់បងប្អូនប្រជាពលរដ្ឋ គ្រប់ស្រទាប់វណ្ណៈ មិនថាយុវជន យុវតី កុមារា កុមារី លោកយាយ លោកតា អ៊ុ ពូ មីងផងដែរ។
វិស័យភាពយន្តបានដើរតួរយ៉ាងសំខាន់ក្នុងការផ្សព្វផ្សាយ វប្បធម៌ ប្រពៃណី និងចំណងមិត្តភាពរវាងប្រទេសទាំងពីរ តាមរយៈខ្សែរភាពយន្ត។ទោះបីសព្វថ្ងៃនេះ បច្ចេកវិទ្យាទំនើប ជឿនលឿន យ៉ាងក៏ដោយ ការផ្សព្វផ្សាយ ការអប់រំ វប្បធម៌ ប្រពៃណី តាមរយៈខ្សែភាពយន្តមិនទាន់រីកចម្រើននោះទេ។ដូច្នេះក្រុមការងារបានដើរចាក់បញ្ចាំងតាមនិគមជនបទ ក្រុង ស្រុក ខណ្ឌ ក្នុងគោលបំណងចំណងមិត្តដែកថែបរវាងប្រទេសកម្ពុជា និងចិន។
លោកស៊ុន រតន: អនុប្រធានការិយាល័យផលិត នៃមន្ទីរក្រសួងវប្បធម៌ និងវិចិត្រសិល្បៈ បានអោយដឹងថា ខ្សែភាពយន្តបានដើរតួនាទីយ៉ាងសំខាន់ ក្នុងការផ្តល់ចំណេះដឹងអប់រំបន្ថែម ពីវប្បធម៌ទំនៀមទម្លាប់ ប្រពៃណី និងជីវភាពរស់នៅរបស់ប្រជាជន និងការរីកចម្រើន នៃប្រទេសទាំង២ កម្ពុជា និងចិន ដែលជាមហាមិត្តដែកថែប។
លោកអនុប្រធានការិយាល័យ បន្តថា ការបញ្ចាំងភាពយន្តនេះ បានធ្វើឡើងស្របពេលដែលរាជរដ្ឋាភិបាលកម្ពុជា-ចិន ចាត់ទុកជាឆ្នាំផ្លាស់ប្តូរវប្បធម៌ និងទេសរចណ៍រវាងប្រទេសទាំង២ ក៏ដូចជាការពង្រឹងនូវកិច្ចសហប្រតិបត្តិការលើវិស័យវប្បធម៌សិល្បៈភាពយន្តរវាងកម្ពុជា-ចិន អោយកាន់តែស៊ីជម្រៅ និងរឹងមាំស្ថិតស្ថេរបន្ថែមទៀតចាប់ពីទីក្រុងរហូតដល់ជនបទ។ តាមរយៈការចុះចាក់បញ្ចាំងជាច្រើនខេត្តកន្លងមកនេះ សង្កេតឃើញថា ប្រជាពលរដ្ឋដែលចូលរួមទស្សនាបានបង្ហាញទឹកមុខរីករាយ និងគាំទ្រសកម្មភាពការចាក់បញ្ចាំងនេះ ហើយបានសូមណូមពរឲ្យក្រុមការងារក្រសួងវប្បធម៌ និងវិចិត្រសិល្បៈ បន្តចុះចាក់ញ្ចាំងភាពយន្ត នៅឆ្នាំក្រោយៗទៀត ។
គួររំលឹកថា ខ្សែភាពយន្តចល័តកម្ពុជា-ចិន បានបង្កើតរយៈពេល៦ឆ្នាំហើយ ដោយក្រសួងវប្បធម៌ និងវិចិត្រសិល្បៈ បានសហការជាមួយស្ថានទូតចិនប្រចាំកម្ពុជា ក្នុងន័យផ្សព្វផ្សាយពីចំណងមិត្តភាពដ៏រឹងមាំកម្ពុជា-ចិន ដែលជាមហាមិត្តដែកថែម៕
អត្ថបទ-រូបភាព ៖ លោក ចាន់ វិចត្រ
