វេទិកាបញ្ចេញទស្សនៈលើកទី១៨ ស្តីពី «យុវជន ប្តេជ្ញារួមគ្នាបញ្ចប់បញ្ហាអេដស៍នៅកម្ពុជា» ដើម្បីចូលរួមទិវាពិភពលោកប្រយុទ្ធនឹងជំងឺអេដស៍ ១ធ្នូ ឆ្នាំ២០២៤ ក្រោមប្រធានបទ៖ «សិទ្ធិ ជាមាគ៌ាឆ្ពោះទៅបញ្ចប់អេដស៍»
(ព្រះសីហនុ)៖ វេទិកាបញ្ចេញទស្សនៈ ស្ដីពី «យុវជន ប្តេជ្ញារួមគ្នាបញ្ចប់បញ្ហាអេដស៍នៅកម្ពុជា» ដោយមានការបកស្រាយពីវាគ្មិនជាយុវជនកាកបាទក្រហមកម្ពុជា ចំនួន ៨រូប ក្នុងនោះយុវជនមកពីសាខាកាកបាទក្រហមកម្ពុជា ខេត្តសៀមរាប ៤រូប និងមកពីសាខាខេត្តព្រះសីហនុ ៤រូប ព្រមទាំងមានវាគ្មិនជំនួយទាំងសងខាងចំនួន ៨រូប នៅថ្ងៃទី២៣ ខែវិច្ឆិកា ឆ្នាំ២០២៤ ។
កិច្ចពិភាក្សានេះ បានប្រារព្ធធ្វើឡើងដោយមានសាខាកាកបាទក្រហមកម្ពុជា ខេត្តព្រះសីហនុ ធ្វើជាម្ចាស់ផ្ទះ មានការអញ្ជើញជាអធិបតីពីសំណាក់ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងជាអនុប្រធានក្រុមការងារឥស្សរជនឆ្នើមថ្នាក់ជាតិ តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា ។
លោកជំទាវ ម៉ែន នារីសោភ័គ បាននាំយកប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះអង្គវេទិកាទាំងមូល និងបានគូសបញ្ជាក់ពីគោលបំណងសំខាន់នៃវេទិកានេះគឺ៖
១. ផ្តល់ការយល់ដឹងដល់សាធារណជនបានយល់ដឹងពីសារៈសំខាន់នៃការចូលរួមទប់ស្កាត់ជំងឺអេដស៍។
២. ផ្តល់ភាពអង់អាចដល់យុវជនក្នុងការបញ្ចេញទស្សនៈរបស់ខ្លួន ចូលរួមចំណែកដោះស្រាយបញ្ហាដែលជាការគំរាមកំហែងដល់សុខភាពសាធារណៈ។
៣. បណ្តុះឆន្ទៈយុវជន ក្នុងការប្តេជ្ញាយ៉ាងខ្លាំងក្លាក្នុងយុទ្ធនាការរួមកម្លាំងគ្នាជាចរន្តជាតិតែមួយជាមួយរាជរដ្ឋាភិបាល កាកបាទក្រហមកម្ពុជា សង្គមស៊ីវិល ឈានឆ្ពោះការបញ្ចប់អេដស៍នៅកម្ពុជា។
៤. ជំរុញលេីកទឹកចិត្តយុវជនកម្ពុជា ឱ្យក្លាយជាកត្តាលីករនៃការផ្លាស់ប្តូរឥរិយាបថជាវិជ្ជមាន បំពេញភារកិច្ចមិត្ត-អប់រំ-មិត្ត មិត្ត-ជួយ-មិត្ត , ឱ្យយុវជននិយាយថាទេចំពោះគ្រឿងញៀន បារីអេឡិចត្រូនិច គ្រឿងស្រវឹង ល្បែងពាលាជាដេីម។
៥. លេីកកម្ពស់មនសិការយុវជនក្នុងការខិតខំរៀនសូត្រ ដេីម្បីចំណេះដឹង សមត្ថភាព មានគុណធម៌ មានសុខភាពល្អ ក្នុងការចូលរួមអភិវឌ្ឍប្រទេសក្នុងសុខសន្តិភាព។
សូមបញ្ជាក់ថា ខ្លឹមសារនៃវេទិកាបញ្ចេញទស្សនៈដែលបកស្រាយដោយវាគ្មិនជាយុវជនទាំង ៨រូបខាងលើនេះ បានផ្តោតលើ៖ ១. ស្នាដៃ និងគំរូវីរភាពរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលអង្គការសហប្រជាជាតិ បានសម្រេចប្រគល់ពានរង្វាន់វេទិកាភាពជាអ្នកដឹកនាំតំបន់អាស៊ីប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា ជូនសម្តេចកិត្តិព្រឹទ្ធបណ្ឌិត កាលពីថ្ងៃទី១៧ ខែវិច្ឆិកា ឆ្នាំ២០០៩ (៣ឆ្នាំ បន្ទាប់ពីទទួលបានគោរមងារ ថ្ងៃទី១៧ ខែវិច្ឆិកា ឆ្នាំ២០០៦)។ ២. ការយល់ឃើញរបស់យុវជនចំពោះគំរូវីរភាពការងារ និងស្នាដៃរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។ ៣. ការយល់ឃើញរបស់យុវជនពីកត្តាដែលនាំឱ្យយុវជនប្រឈមនឹងការឆ្លងមេរោគអេដស៍។ ៤. ការប្រកាន់ខ្ជាប់នូវឥរិយាបថ ដើម្បីជៀសវាងនូវការចម្លងមេរោគអេដស៍ក្នុងចំណោមយុវជន។ ៥. ឥរិយាបថរបស់យុវជនចំពោះអ្នកផ្ទុកមេរោគអេដស៍ និងអ្នកជំងឺអេដស៍។ ៦. ផលអវិជ្ជមានចំពោះសង្គមជាតិ ប្រសិនបើមានការរើសអើងចំពោះអ្នកផ្ទុកមេរោគអេដស៍ ឬមានការផាត់ចេញពីសង្គម នូវក្រុមប្រជាជនគន្លឹះមួយចំនួនដូចជា៖ ក្រុមបុរសស្រឡាញ់បុរស និងក្រុមបំប្លែងភេទ -ល-។ និងទី៧. តួនាទី និងភារកិច្ច រួមជាមួយការអំពាវនាវរបស់យុវជន ក្នុងការចូលរួមបញ្ចប់ជំងឺអេដស៍នៅកម្ពុជា ៕
ដោយ / គ្រី សម្បត្តិ
