ម៉ានីល ៖ អនុប្រធានាធិបតីហ្វីលីពីន លោកស្រី Sara Duterte បានថ្លែងគំរាមធ្វើឃាតប្រធានាធិបតីហ្វីលីពីន លោក Ferdinand Marcos Jr ប្រសិនបើលោកស្រីត្រូវបានគេសម្លាប់។

លោកស្រី Sara បានប្រាប់សន្និសីទកាសែតមួយនាពេលថ្មីៗនេះថា លោកស្រីបាននិយាយទៅកាន់ឃាតករម្នាក់ និង បានណែនាំឱ្យសម្លាប់លោកប្រធានាធិបតី, លោកជំទាវទី១របស់គាត់ និង ប្រធានសភាតំណាងរាស្រ្តដែលជាសាច់ញាតិរបស់ប្រធានាធិបតី។

លោកស្រីបន្ថែមថា រឿងនេះនឹងកើតឡើង ក្នុងករណីលោកស្រីខ្លួនឯងត្រូវគេធ្វើឃាត។ ទោះបីជាយ៉ាងណា អនុប្រធានាធិបតីហ្វីលីពីនរូបនេះ មិនបានបញ្ជាក់លំអិត អំពីការប៉ុនប៉ងធ្វើឃាតលោកស្រីទេ។

ឆ្លើយតបនឹងសារគំរាមរបស់លោកស្រី Sara ក្រុមសន្តិសុខប្រធានាធិបតីហ្វីលីពីននិយាយថា ខ្លួនបានពង្រឹងសន្តិសុខ ហើយកំពុងសម្របសម្រួលយ៉ាងជិតស្និទ្ធជាមួយភ្នាក់ងារអនុវត្តច្បាប់នានា ដើម្បីរារាំង និងការពារប្រឆាំងការគំរាមកំហែងណាមួយ ចំពោះអាយុជីវិតប្រធានាធិបតី និងគ្រួសាររបស់គាត់។
 
សូមបញ្ជាក់ថា លោកស្រី Sara បានលាលែងពីគណៈរដ្ឋមន្ត្រីក្នុងខែមិថុនា ដែលនេះបង្ហាញពីការដួលរលំសម្ព័ន្ធភាពនយោបាយក្នុងប្រទេសហ្វីលីពីន។

លោកស្រី Sara និងលោក Marcos Jr មេដឹកនាំផ្តាច់ការហ្វីលីពីន ទទួលបានជ័យជម្នះការបោះឆ្នោតឆ្នាំ ២០២២។ ប៉ុន្តែគ្រួសារទាំងពីរមានជម្លោះលើគោលនយោបាយការបរទេស និងសង្រ្គាមប្រឆាំងគ្រឿងញៀន៕

ប្រភព ៖ AFP ប្រែសម្រួល ៖ ឈឹម ទីណា