រដ្ឋមន្ត្រីក្រសួងទេសចរណ៍ ជំរុញឲ្យក្រុមហ៊ុន ជីប ម៉ុង បន្តការរៀបចំព្រឹត្តិការណ៍ដ៏អស្ចារ្យបន្ថែមទៀត ដើម្បីអភិវឌ្ឍផលិតផលទេសចរណ៍ច្នៃប្រឌិតថ្មីៗ
(ភ្នំពេញ)៖ នាព្រឹកថ្ងៃទី២៧ ខែវិច្ឆិកា ឆ្នាំ២០២៤ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ជាមួយលោកអ្នកឧកញ៉ា លាង ឃុន សហស្ថាបនិក ក្រុមហ៊ុនជីបម៉ុង និងជាប្រធានក្រុមប្រឹក្សាភិបាលក្រុមហ៊ុន និងអ្នកឧកញ៉ា លាង ម៉េង សហស្ថាបនិកក្រុមហ៊ុនជីបម៉ុង និងជាប្រធានក្រុមអគ្គនាយក ជីប ម៉ុង ព្រមទាំងសហការី ចូលជួបសម្តែងការគួរសម និងពិភាក្សាការងារ ដើម្បីផ្តល់កិច្ចសហការគាំទ្រតាមគ្រប់រូបភាពដល់វិស័យទេសចរណ៍ តាមរយៈធុរកិច្ចរបស់ ជីប ម៉ុង គ្រុប ដែលមានបុត្រសម្ព័ន្ធក្រុមហ៊ុនចំនួន ១៣ ដូចជានៅក្នុងវិស័យបដិសណ្ឋាកិច្ចសណ្ឋាគារ ដែលមានសណ្ឋាគារលំដាប់អន្តរជាតិ ធនាគារនិងពាណិជ្ជកម្ម ភេសជ្ជៈ អចនលទ្រព្យ សំណង់ និងកីឡាជាដើម។
ក្នុងកិច្ចជំនួបដ៏មានសារៈសំខាន់នេះ អ្នកឧកញ៉ា លាង ឃុន បានថ្លែង «អរគុណសន្តិភាព» ក្រោមការដឹកនាំដ៏ឈ្លាសវៃ និងគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជា ប្រធានព្រឹទ្ធសភា កម្ពុជា និងបានបន្តរក្សាសន្តិភាពនេះ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជា ដោយសារកត្តាសុខសន្តិភាព ស្ថិរភាពនយោបាយ និងសុខសុវត្ថិភាពពេញលេញ ទើបផ្តល់ឱកាសឱ្យអាណាចក្រក្រុមហ៊ុននេះ មានអាជីវកម្មចំនួន ១៣ ធំៗ ក្នុងគោលបំណងកសាងផ្នត់គំនិតរួមគ្នាកាន់តែខ្លាំង។
ទន្ទឹមនឹងនេះ ក្រុមហ៊ុនត្រូវការធនធានមនុស្សខ្លាំងៗពីក្រៅប្រទេស ដែលគេធ្លាប់ដើរមុនប្រជាជនយើងមួយជំហាន ដើម្បីឱ្យគេនាំយកបទពិសោធ ចំណេះ ជំនាញផ្សេងៗ មកបង្រៀនដល់បុគ្គលិកជាជនជាតិខ្មែរ ដែលនឹងក្លាយជាអ្នកស្នងតំណែង ជ្រោមជ្រែងកសាងជំនួញនេះឱ្យមាននិរន្តរភាពលើសពី ១០០ឆ្នាំបាន ។
ឯកឧត្តមរដ្ឋមន្ត្រី កោតសរសើរ និងវាយតម្លៃខ្ពស់ចំពោះក្រុមហ៊ុន ជីប ម៉ុង គ្រុប ដែលកន្លងមកបានចូលរួមសហការដ៏ធំធេងជាមួយក្រសួងទេសចរណ៍ រៀបចំព្រឹត្តិការណ៍ដ៏ធំ GUMBALL 3000 ក្នុងការបំបែកកំណត់ត្រាពិភពលោក GUINNESS WORLD RECORDS ចំពោះការដាក់បង្ហាញរថយន្តប្រណិតៗ និងច្រើនជាងគេ នៅរាជធានីភ្នំពេញ និងខេត្តសៀមរាប ដែលវិញ្ញាបនបត្រ យើងបានទទួលកាលពីថ្ងៃទី២៣ ខែវិច្ឆិកា កន្លងទៅ នៅខេត្តសៀមរាប ហើយកាលានុវត្តភាពនៃកិច្ចសហការរវាងក្រសួងទេសចរណ៍ និង ជីប ម៉ុង គ្រុប នៅក្នុងវិស័យបដិសណ្ឋាកិច្ច សណ្ឋាគារ និងភោជនីយដ្ឋាន ស្នើសុំឱ្យជួយប្រើប្រាស់ផលិតផលគ្រឿងផ្សំ និងវត្ថុដែលផលិតដោយខ្មែរ (Khmer hand made) បន្តការរៀបចំព្រឹត្តិការណ៍ដ៏អស្ចារ្យរួមគ្នាបន្ថែមទៀត ការអភិវឌ្ឍផលិតផលទេសចរណ៍ច្នៃប្រឌិតថ្មីៗ បន្តសកម្មភាពសប្បុរសធម៌ និងមនុស្សធម៌។
ជាមួយគ្នានេះ ឯកឧត្តមរដ្ឋមន្ត្រី បានស្នើឱ្យដំណើរទស្សនកិច្ចប្រចាំឆ្នាំរបស់ក្រុមហ៊ុន ជីប ម៉ុង គ្រុប សូមជ្រើសរើសគោលដៅទេសចរណ៍ក្នុងស្រុក ជាពិសេស តំបន់អេកូទេសចរណ៍, សហគមន៍ទេសចរណ៍ធម្មជាតិ និងជួយគាំទ្រឱ្យកាន់តែសកម្មចំពោះកម្មវិធីនានារបស់ក្រសួងទេសចរណ៍ផងដែរ ៕
ដោយ ៖ ហេង សម្បត្តិ +ថេត វិចិត្រ
