សម្តេចបវរធិបតី ហ៊ុន ម៉ាណែត អញ្ជើញសម្ពោធសមិទ្ធផលនានា នៅតំបន់អភិវឌ្ឍន៍បឹងជង្រុកតេជោឈ្នះឈ្នះ
(បន្ទាយមានជ័យ)៖ សម្ដេចមហាបវរធបិតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញសម្ពោធសមិទ្ធផលនានា នៅតំបន់អភិវឌ្ឍន៍បឹងជង្រុកតេជោឈ្នះឈ្នះ ស្ថិតនៅភូមិបឹងជង្រុកតេជោឈ្នះឈ្នះ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ នៅព្រឹកថ្ងៃទី២៩ ខែវិច្ឆិកា ឆ្នាំ២០២៤ ។
ឯកឧត្តម ប៉ាន់ខែម ប៊ុនថន នាយករងខុទ្ទកាល័យសម្ដេចមហាបវរធិបតីនាយករដ្ឋមន្ត្រី រដ្ឋលេខាធិការទីស្ដីការគណៈរដ្ឋមន្ត្រី និងជាប្រធានក្រុមការងារដោះស្រាយនិងអភិវឌ្ឍន៍តំបន់អភិវឌ្ឍន៍បឹងជង្រុកតេជោឈ្នះឈ្នះ បានឱ្យដឹងថា ភូមិបឹងជង្រុកតេជោឈ្នះឈ្នះ ជាតំបន់ដ៏ស្មុគស្មាញ មានទាំងជម្លោះដីធ្លី និងការចិញ្ចឹមកម្លាំងខុសច្បាប់ពីក្រុមប្រឆាំង ដើម្បីផ្តួលរំលំរាជរដ្ឋាភិបាលថែមទៀតផង ។ តំបន់បឹងជង្រុក និង៦៧១ ស្ថិតក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ គឺជាចំណែកនៃទីតាំង ដែលសម្តេចតេជោ ហ៊ុន សែន បានធ្វើប្រទានកម្មជូនគ្រួសារយោធាសមាហរណកម្ម សម្រាប់អាស្រ័យផលតាមខ្លឹមសារ ៣យ៉ាង នៃការអនុវត្តនយោបាយ ឈ្នះ ឈ្នះ រួមមាន៖ ១៖ ការធានាអាយុជីវិត និងរូបកាយ, ២៖ ការធានាអាជីព និងមុខរបរ និង ៣៖ ការធានាកម្មសិទ្ធិ ទ្រព្យសម្បត្តិទាំងចលនទ្រព្យ និងអចលនទ្រព្យ ។
ប្រវត្តិនៃឈ្មោះបឹងជង្រុកនេះ ត្រូវបានគេហៅតៗគ្នា ក្នុងសម័យរំដោះប្រទេសពីរបបប្រល័យពូជសាសន៍នាឆ្នាំ១៩៧៩ ខណៈពេល ដែលកងទ័ពភាគីរដ្ឋកម្ពុជា និងកងទ័ពវៀតណាមលើកគ្នាវាយកងទ័ពខ្មែរក្រហម ដោយទីតាំងនេះជាកន្លែងជង្រុកស្រូវដ៏ធំមួយ ដែលគេដឹកយកស្រូវពីតំបន់កូនដំរីមកផ្ទុកនៅទីនេះ ដើម្បីផ្គត់ផ្គង់ដល់កងទ័ពខ្មែរក្រហមនៅសមរភូមិមុខ។ ចំណែកតំបន់៦៧១ កើតឡើងក្រោយពេលសមាហរណកម្ម ដែលជាឈ្មោះវរសេនាតូច៦៧១ ចំណុះឱ្យវរសេនាធំ E៦៧ ស្ថិតនៅក្រោមកងពល២១ ដឹកនាំដោយឧត្តមសេនីយ៍ ផឹង ផុន ក្នុងពេល ដែលឧត្តមសេនីយ៍ សុខ ភាព ត្រូវបានតែងតាំងជាមេបញ្ជាការរងយោធភូមិភាគ៥ ។ ក្រោយពេលសមាហរណកម្ម ដីធ្លីជាច្រើនកន្លែងនៅក្នុងស្រុកម៉ាឡៃ ត្រូវបានផ្តល់ជូនគ្រួសារយោធាដើម្បីរស់នៅ និងអាស្រ័យផល ។
ឯកឧត្តម ប៉ាន់ ខែមប៊ុនថន បានឱ្យដឹងថា ពីដំបូងវិវាទដីធ្លីនៅចំណុច៦៧១ និងចំណុចបឹងជង្រុក មានតំណាងដឹកនាំចំនួន ២ក្រុមតែប៉ុណ្ណោះ ប៉ុន្តែក្រោយមកក្រុមតំណាងទាំងអស់នេះ បានបំបែកទៅជាច្រើនក្រុម និងបានប្រែក្លាយរូបភាពវិវាទដីធ្លីនៅទីនេះ ធ្លាក់ក្នុងចរិកលក្ខណៈជានយោបាយ ។ កត្តា ដែលនាំឱ្យជម្លោះនៅបឹងជង្រុក ដោះស្រាយមិនចេះចប់គឺមាន២ ទី១) ការចិញ្ចឹមចលនាពីជនខិលខូច, ទី២) កត្តានយោបាយ។ រូបភាពពីខាងក្រៅ មើលឃើញថា ជាទំនាស់ដីធ្លី តែពីខាងក្នុង គឺជាការពង្វក់ ដើម្បីបង្កើតកម្លាំងខុសច្បាប់ផ្ដួលរលំរដ្ឋាភិបាលស្របច្បាប់ ។ ករណីវិវាទនេះ មានសន្ទុះខ្លាំងក្នុងចន្លោះឆ្នាំ២០១៨ ដល់ឆ្នាំ២០២០ ។
ឯកឧត្តម ប៉ាន់ ខែមប៊ុនថន បានបន្តថា ដោយមានសេចក្តីយកចិត្តទុកដាក់ដ៏ខ្ពង់ខ្ពស់ពីសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មកលើបងប្អូនប្រជាពលរដ្ឋរស់នៅក្នុងខេត្តបន្ទាយមានជ័យទាំងមូល ក៏ដូចជាប្រជាពលរដ្ឋនៅទូទាំងប្រទេស និងដោយពិនិត្យឃើញថា ករណីវិវាទដីនេះ មានទ្រង់ទ្រាយធំ និងមានចរិកលក្ខណៈគួបផ្សំរឿងនយោបាយ សម្តេចតេជោ បានចាត់តាំងតំណាង ដឹកនាំក្រុមការងារមួយក្រុមក្នុងខុទ្ទកាល័យ ចុះសហការដោះស្រាយបន្ទាន់ ជាមួយក្រុមការងាររដ្ឋបាលខេត្តបន្ទាយមានជ័យ ក្នុងជម្លោះដីធ្លីដ៏រាំរ៉ៃ និងស្មុគស្មាញ អស់រយៈពេលជាង ២០ឆ្នាំកន្លងមកនេះ ។ តាមរយៈយុទ្ធសាស្ត្រដ៏ថ្លៃថ្លារបស់សម្តេចតេជោ នាពេលនោះ ក្រុមការងារ បានប្រើប្រាស់រយៈពេល ១២ថ្ងៃគត់ ដើម្បីបញ្ចប់ទំនាស់ទាំងស្រុង ហើយគូភាគីជម្លោះប្រែក្លាយជាមិត្ត ជាបងប្អូន ជាគ្រួសារនឹងគ្នាឡើងវិញ។ ក្រោយដីតំបន់នោះ ត្រូវបានដោះស្រាយបញ្ចប់ គូភាគីដែលជាម្ចាស់ដីទាំងអស់បានទទួលដីរបស់ខ្លួនវិញ និងបានចូលគ្រប់គ្រង កាន់កាប់ អាស្រ័យផល ហើយបានចុះបញ្ជីទទួលបានកម្មសិទ្ធិស្របច្បាប់រៀងៗខ្លួនរួចរាល់ ។
យោងប្រកាសលេខ ៣១៨៧ប្រក ចុះថ្ងៃទី៧ ខែធ្នូ ឆ្នាំ២០២១ ភូមិបឹងជង្រុកតេជោឈ្នះឈ្នះ ត្រូវបានបង្កើតឡើងដោយបំបែកចេញពីភូមិទួលប្រាសាទ នៃឃុំទួលពង្រ ស្រុកម៉ាឡៃ ខេត្តបន្ទាយមានជ័យ។ ដោយមានព្រំប្រទល់៖ ខាងជើង និងខាងលិច ជាប់នឹងភូមិទួលប្រាសាទ ឃុំទួលពង្រ, ខាងត្បូងជាប់នឹងភូមិស្រឡៅជ្រុំ និងភូមិអូរកេស ឃុំទួលពង្រ, ខាងកើត ជាប់នឹងភូមិបឹងឈូក និងភូមិរស្មីមានជ័យ ឃុំទួលពង្រ និងភូមិបឹងជង្រុកតេជោឈ្នះឈ្នះបច្ចុប្បន្នមានប្រជាជន សរុបចំនួន ៤,២៦៨នាក់ ស្រី ២,១៦៦នាក់ ស្មើនឹង ១,២១៧គ្រួសារ។
បន្ទាប់ពីភូមិនេះបានបង្កើតឡើង ដីឡូតិ៍ លំនៅដ្ឋាន ប្លង់កម្មសិទ្ធិនានា ត្រូវបានរៀបចំជូនបងប្រជាពលរដ្ឋទាំងអស់ អមជាមួយដំណើរការកសាងហេដ្ឋារចនាសម្ព័ន្ធដែលមានផ្លូវខ្វាត់ខ្វែង ប្រព័ន្ធធារាសាស្រ្តគ្រប់ច្រកល្ហក ។ ក្នុងនោះ សមិទ្ធផលសំខាន់ៗជាច្រើន បានស្ថាបនារួចរាល់ និងកំពុងកើតឡើងជាបន្តបន្ទាប់ រួមមាន៖ សាលារៀន ០២ខ្នង, មណ្ឌលសុខភាព, ទីស្នាក់ការកាកបាទក្រហមកម្ពុជា, ទីស្នាក់ការប៉ុស្តិ៍នគរបាលរដ្ឋបាល, ទីស្នាក់ការកងរាជអាវុធហត្ថ, ទីស្នាក់ការភូមិបឹងជង្រុកតេជោឈ្នះ ឈ្នះ, ទីស្នាក់ការគណបក្សប្រជាជនកម្ពុជា, ទីស្នាក់ការសម្ពន្ធយុវជនស្រលាញ់សន្តិភាព, អាស្រមអាយុវែង លោកតាគង់ លោកយាយសម, ស្រះទឹកទំហំជាង ៦ហិកតា, ខ្លោងទ្វារភូមិបឹងជង្រុកតេជោឈ្នះ ឈ្នះ ផ្លូវខ្វាត់ខ្វែងក្នុងភូមិ, ប្រព័ន្ធលូ, សួនច្បារបំពាក់ដោយឧបករណ៍ហាត់ប្រាណ និងសួនកុមារសាធារណៈ, ទីតាំងចុះចតឧទ្ធម្ភាគចក្រ, ស្លាកគណបក្សប្រជាជនកម្ពុជាតាំងលម្អបង្ហាញគ្រប់តាមដងផ្លូវ, ដាំដើមក្ងោកលម្អគ្រប់តាមដងផ្លូវ, លំនៅដ្ឋានតេជោឈ្នះឈ្នះ ជូនជនពិការដែលជាមេក្រុមចំនួន ៩នាក់ ម្នាក់១ខ្នង ថវិកាចំណាយសរុបក្នុងតំបន់អភិវឌ្ឍន៍បឹងជង្រុកតេជោឈ្នះឈ្នះ មិនតិចជាង ១៥លានដុល្លារនោះទេ និងការបន្តអភិវឌ្ឍន៍ជាបន្តបន្ទាប់តាមជាក់ស្តែងតាមពេលវេលាវិវត្តន៍ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
