ស្ទឹងត្រែង៖លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទ​ខេត្តស្ទឹងត្រែង បានរៀបចំពិធីចុះហត្ថលេខាផ្គត់ផ្គង់ដំឡូង​មីស្រស់​រវាងប្រជាសហគមន៍វាលពោធិ៍ និងដេប៉ូ លាង ប៊ុនហ៊ាង ដែលទទួល​ទិញផលកសិកម្មពីប្រជាកសិករក្នុងខេត្តស្ទឹងត្រែង។ ព្រឹត្តិការណ៍​នេះ​បានប្រព្រឹត្តទៅកាលពីថ្ងៃទី២៩ ខែវិច្ឆិកា ឆ្នាំ២០២៤នៅមន្ទីរកសិកម្ម​ខេត្ត ក្រោមអធិបតីភាពឯកឧត្តម សរ សុពុត្រា អភិបាលខេត្តស្ទឹង​ត្រែង។

ទាក់ទងនឹងការចុះហត្ថលេខាផ្គត់ផ្គង់ដំឡូង​មីស្រស់រវាងប្រជា​សហគមន៍​វាលពោធិ៍ និងដេប៉ូ លាង ប៊ុនហ៊ាង ,លោក ទុំ នីរ៉ូ ប្រធានមន្ទីរកសិកម្មខេត្តបានឱ្យដឹងថា សហគមន៍កសិកម្មខេត្តស្ទឹង​ត្រែង​បានបង្កើតឡើងដំបូងក្នុងឆ្នាំ២០០៦ ។បច្ចុប្បន្នមានចំនួន ៣៩សហគមន៍។ រីឯសហគមន៍ដែលបានចុះកិច្ចព្រមព្រៀងផ្គត់​ផ្គង់ដំឡូងមីស្រស់ ប្រកបដោយទំនុកចិត្តទៅឱ្យដេប៉ូ លាង ប៊ុនហ៊ាង នៅពេលនេះ គឺសហគមន៍កសិកម្ម វាលពោធិ៍សាមគ្គី ដែលមាន​មូលដ្ឋាននៅក្នុងភូមិវាលពោធិ៍ ឃុំអន្លង់ភេ ស្រុកថាឡាបរិវ៉ាត់ ។
លោក​ប្រធានមន្ទីរបានហៅការចុះកិច្ចព្រមព្រៀងរវាងសហគមន៍កសិកម្ម និងម្ចាស់ដេប៉ូក្នុងពេលនេះ ដើម្បីឱ្យសហគមន៍ និងអ្នកទិញ​មាន​ភាពស្មោះត្រង់ជាមួយគ្នា។

ចំណែកឯកឧត្តម សរ សុពុត្រា អភិបាលខេត្តស្ទឹងត្រែងបានហៅការចុះ​ហត្ថលេខារវាងសហគមន៍និងដេប៉ូទទួលទិញ​នាពេលនេះ ជាការជួយ​ស្វែងរកទីផ្សារ និងជួយកំណត់តម្លៃកសិផល របស់ប្រជាសហគមន៍​ឱ្យមានស្ថេរភាព និងបង្កើនប្រាក់ចំណូលដល់​ប្រជាកសិករក្នុង​សហគមន៍។ លោកសង្ឃឹមថា ភាគីទាំងពីរនឹងស្មោះត្រង់នឹងគ្នា។ត្រូវគោរពនូវកិច្ចសន្យាដែលបានព្រមព្រៀង ហើយបើមាន​វិវាទកើតឡើង សូមភាគីទាំងពីរដោះស្រាយ ក្រៅប្រព័ន្ធតុលាការ​ជាមុនសិន៕
អត្ថបទនិងរូបភាព៖ឡុង សំបូរ