(ភ្នំពេញ)៖ ព្រឹត្តិការណ៍ប្រណាំងរថយន្ត off-Road អន្តរជាតិ នៅខេត្តព្រះសីហនុ ឆ្នាំ២០២៤ ដែលសម្បូរដោយកីឡាករជើងខ្លាំងទាំងជាតិ និងអន្តរជាតិ បានធ្វើការប្រណាំងយ៉ាងស្វិតស្វាញ។ ជាមួយគ្នានេះគេឃើញមានកីឡាការិនីជើងខ្លាំងចំនួន២រូប គឺកីឡាការិនី ធី សុវណ្ណថា និងកីឡាការនី ណារី រិទ្ធីយ៉ា ក៏បានចូលរួមប្រណាំង ក្នុង Class C ឬ Overland ។

កីឡាការិនី ធី សុវណ្ណថា បានចែករំលែកបទពិសោធន៍ក្រោយធ្លាប់ចូលរួមប្រណាំងម្តងរួចហើយ ថែមទទួលបានចំណាត់ថ្នាក់លេខ១ ក្នុង Class C ដូច្នេះសម្រាប់អារម្មណ៍ផ្តោតលើផ្លូវ និងចង្កោតឡាន ទើបធ្វើអោយលែងភ័យ បើប្រៀបធៀបស្ថានភាពផ្លូវ ឆ្នាំនេះពិបាកជាង មានឧបសគ្គច្រើនជាង ដូចជា ស្ពាន មានរបាដែកឆ្លងកាត់តូច ។

ជាមួយគ្នានេះកីឡាការិនី ធី សុវណ្ណថា ក៏បានលើកទឹកចិត្តអោយស្រ្តីចូលរួមប្រណាំងរថយន្ត Off-Road អោយបានច្រើន វាមិនមានគ្រោះថ្នាក់ទេ ដោយសារមានប្រព័ន្ធសុវត្តិភាព ដូចជា មួកការពារខ្សែក្រវ៉ាត់ និងគោរពលក្ខន្តិកៈ ជាពិសេសគឺពង្រឹងទឹកចិត្តតាមរយៈចូលរួមមើល ហើយសាកល្បងអោយបានច្រើនដងទៅមានបទពិសោធន៍ យើងអាចនឹងក្លាហាន។ ដើម្បីជួយលើកស្ទួយវិស័យកីឡាយានយន្តនៅកម្ពុជា នឹងបង្ហាញថាស្រ្តីក៏អាចធ្វើបាន។
ដោយលែកកីឡាការិនី ណារី រិទ្ធីយ៉ា ក៏បានបង្ហាញអារម្មណ៍ការចូលរួមប្រកួតនេះ គឺចង់សាក ចង់ដឹងផ្លូវប្រណាំងក្នុង(Track)យ៉ាងម៉េចដែរ តែក្នុងផ្លូវទាំងអស់ខ្ញុំអត់មានភាពភ័យខ្លាចទេ ដោយ សារទឹកចិត្តយើងស្រឡាញ់។

ខ្ញុំអត់ធ្លាប់ចូលរួមប្រណាងយានយន្តទេ តែវិស័យម៉ូតូត្រៃខ្ញុំធ្លាប់ប្រណាំង ។

សូមបញ្ជាក់ថា ព្រឹត្តិការណ៍ប្រណាំងរថយន្ត off-Road អន្តរជាតិ នៅខេត្តព្រះសីហនុ ឆ្នាំ២០២៤ ដែលរៀបចំដោយក្លឹបមហាគ្រួសាររថយន្ត Off-Road កម្ពុជា សហការជាមួយសហព័ន្ធកីឡាយានយន្តកម្ពុជា ទទួលបានការគាំទ្រពីរដ្ឋបាលខេត្តព្រះសីហនុ មានកីឡាករជើងខ្លាំងជាតិ និងអន្តរជាតិចូលរួម ក្នុងនោះមានស្រ្តី២នាក់ គឺកីឡាការិនី ធី សុវណ្ណថា និងកីឡាការិនី ណារី រិទ្ធីយ៉ា ប្រណាំងនៅ Class C ។

គួរជម្រាបថា ព្រឹត្តិការណ៍ប្រណាំងរថយន្ត off-Road អន្តរជាតិ ខេត្តព្រះសីហនុ ឆ្នាំ២០២៤ មានរយៈពេល៣ថ្ងៃ ចាប់ពីថ្ងៃទី២៩ ទី៣០ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២៤ ដែលមានការចូលរួមប្រកួតពីសំណាក់ក្រុមកីឡាករកម្ពុជា ចិន ថៃ វៀតណាម រុស្ស៉ី ជាដើម ខណៈមកដល់ពេលនេះមានរថយន្តចូលរួមប្រមាណ ៥១គ្រឿងហើយ ៕

អត្ថបទ-រូបភាព ៖ លោក ចាន់ វិចិត្រ និងសែម បូរិន