(ភ្នំពេញ)៖ ព្រឹត្តិការណ៍ប្រកួតបាល់ទាត់ដណ្តើមពានរង្វាន់ អ ធី អិន ខេ ដែលមានរយៈពេល៦ថ្ងៃ ចាប់ផ្ដើមលេងហើយ នារសៀលថ្ងៃទី៣០ ខែវិច្ឆិកា ឆ្នាំ២០២៤ នៅក្លឹបកីឡាផ្លាទីនឹមជ្រោយចង្វារ បន្ទាប់ពីរៀបចំពិធីក្រុងពាលី ក្នុងនោះលោកឧកញ៉ា ឈាង សុវណ្ណរតនៈ បានអញ្ជើញធ្វើពិធីក្រុងពាលី និងប្រារព្ធពិធីបើកជាផ្លូវការនូវព្រឹត្តិការណ៍ប្រកួតបាល់ទាត់នេះដែរ។

លោកឧកញ៉ា ឈាង សុវណ្ណរតនៈ ដែលជាស្ថាបនិក និងអគ្គនាយកនៃក្រុមហ៊ុន RTNK Group នោះ បានឱ្យដឹងថា ការរៀបចំឱ្យមានការប្រកួតបាល់ទាត់ដណ្តើមពានរង្វាន់នេះ នឹងអាចចូលរួមចំណែកជាមួយរាជរដ្ឋាភិបាលកម្ពុជាក្នុងការបំផុសស្មារតី ជំរុញការគាំទ្រឱ្យកាន់តែមានសន្ទុះទៅមុខ និងមានភាពរីកចម្រើនធៀបទៅនឹងស្តង់ដាក្នុងតំបន់ និងអន្តរជាតិ។

លោកបានបន្តថា ក្រុមហ៊ុន RTNK Group ជឿជាក់យ៉ាងមុតមាំថា សកម្មភាពរបស់យុវជនក្នុងការលេងកីឡានេះ នឹងរួមចំណែកបន្ថែមទៀតក្នុងការគាំទ្រ និងអភិវឌ្ឍនវិស័យកីឡាបាល់ទាត់នៅក្នុងប្រទេសកម្ពុជា ដោយឈរលើស្មារតី «កីឡារស់ក្នុងសន្តិភាព» និង «ប្រជាជនម្នាក់លេងកីឡាមួយប្រភេទ» ដោយធ្វើយ៉ាងណាជំរុញវិស័យកីឡាឱ្យក្លាយជាចលនាជាតិដ៏រស់រវើកមួយសម្រាប់យុវជន និងប្រជាជនកម្ពុជា។

សូមជម្រាបថា ព្រឹត្តិការណ៍ប្រកួតបាល់ទាត់ដណ្តើមពានរង្វាន់នេះ នឹងចាប់ផ្តើមការប្រកួតពីថ្ងៃទី៣០ ខែវិច្ឆិកា ឆ្នាំ២០២៤ រហូតដល់ថ្ងៃទី៥ ខែមករា ឆ្នាំ២០២៥ ដោយមានការចូលរួមពីកីឡាករសរុបចំនួន ១៦ក្រុម ដែលក្រុមនីមួយៗមានកីឡាករចំនួន៩នាក់ ផ្អែកតាមរូបមន្តនៃការប្រកួត កីឡាករលេង៦នាក់ និងកីឡាករបម្រុង៣នាក់។ រាល់ការប្រកួតនឹងប្រព្រឹត្តទៅនៅថ្ងៃសៅរ និងថ្ងៃអាទិត្យ ចាប់ពីម៉ោង៤រសៀល ដល់ម៉ោង៦ល្ងាច នៅក្លឹបកីឡាផ្លាទីនឹមជ្រោយចង្វារ។

គួររម្លឹកថា ព្រឹត្តិការណ៍ប្រកួតបាល់ទាត់ដណ្តើមពានរង្វាន់ អ ធី អិន ខេ ឆ្នាំ២០២៥ ត្រូវបានរៀបចំឡើងក្រោមការផ្តួចផ្តើម និងដឹកនាំដោយផ្ទាល់ពីលោកឧកញ៉ា ក្នុងគោលបំណងដើម្បីផ្តល់ឱកាសដល់យុវជនកម្ពុជាក្នុងការជួបជុំ រឹតចំណងមិត្តភាព សាមគ្គីភាព និងបង្កើនកិច្ចសហប្រតិបត្តិការរវាងគ្នានឹងគ្នាតាមរយៈវិស័យកីឡា។ ក្នុងនោះដែរ ក្រុមហ៊ុនដែលបានចូលរួមឧបត្ថម្ភសម្រាប់ព្រឹត្តិការណ៍នេះ រួមមាន៖ Platinum Sports Club, Brew Coffee and Lounge, Brew Coffee, Brew Catering Service, Brew Park Restaurant, Brew Meatball, ស្ថានីយភីធីធី កាហ្វេ Amazon និងម៉ាត 7-Eleven សាខាព្រែកហូ៥០ម៉ែត្រ ហាងសម្លៀកបំពាក់កីឡា Cartenz Tactical Cambodia និងចូលរួមសហការឧបត្ថម្ភដោយក្រុមហ៊ុនទឹកពិសាវីតាល់ ទឹកពិសាគុណភាពខ្ពស់ ៕

អត្ថបទ-រូបភាព ៖ លោក ចាន់ វិចិត្រ