កំពត៖ឯកឧត្តមបណ្ឌិតប៉ែន ស៊ីម៉ន បានផ្ដល់អាហារូបករណ៍​ចំនួន​២០០​កន្លែងដល់និស្សិតខេត្តកំពត ។ថ្លែងក្នុងពិធីជួបសំ​ណេះ​សំណាល និងផ្ដល់រង្វាន់ សិស្សជ័យលាភីប្រឡងជាប់សញ្ញាបត្រមធ្យម​សិក្សា​ទុតិយភូមិឆ្នាំសិក្សា២០២៣-២០២៤ ទូទាំង​ខេត្ត​កំពតនៅបរិវេណ​ពហុកីឡដ្ឋានខេត្តកាលព្រឹកថ្ងៃទី៣០ ខែវិច្ឆិកា ឆ្នាំ២០២៤ ឯកឧត្តម​បណ្ឌិត ប៉ែន ស៊ីម៉ន តំណាងរាស្ត្រ​មណ្ឌល​កំពត សមាជិកគណៈ​អចិន្ត្រៃយ៍ និងជាប្រធានគណៈកម្មការទី១០នៃរដ្ឋសភាជាតិ បានផ្តល់ដំបូន្មាន​តម្រង់ទិសដល់ចៅៗ​ជាសិស្សា​នុសិស្សទាំងអស់​ដែលត្រូវបន្តការសិក្សានៅថ្នាក់មហាវិទ្យាល័យ ត្រូវធ្វើយ៉ាងណាខិតខំ​ប្រឹងប្រែង​ក្នុងការក្រេប​ជញ្ជក់​យកចំណេះដឹង ឱ្យបានខ្ពង់ខ្ពស់ ប្រកបដោយគុណធម៌ ធ្វើខ្លួនឱ្យបានល្អ ទាំងផ្លូវចិត្តនិងផ្លូវកាយ។

នៅក្នុងឱកាសនោះឯកឧត្តមបណ្ឌិតបានផ្តល់ពានរង្វាន់ និងថវិកា​មួយចំនួនដល់សិស្សានុសិស្ស ជ័យលាភីប្រឡង​ជាប់សញ្ញាបត្រ​ទុតិយភូមិឆ្នាំសិក្សា២០២៣-២០២៤ ចំនួន៤៤៤០នាក់ ។ក្នុងនោះជូនសិស្សនិទ្ទេស A ចំនួន ៧៩នាក់ ក្នុងម្នាក់ទទួលបានម៉ូតូ ហុងដា ប៊ឺត (Honda Beat ២០២៥) មួយគ្រឿង ពានរង្វាន់មួយគ្រឿង និងថវិកាបួនសែនរៀល។ សិស្សនិទ្ទេសB ចំនួន៤៦៩នាក់ ម្នាក់ៗ២០ម៉ឺនរៀល។ និទ្ទេសC ចំនួន១ ០៥៥នាក់ ម្នាក់ៗ១៥ ម៉ឺនរៀល។ និទ្ទេសD ចំនួន១ ៥៩៥នាក់ក្នុងម្នាក់ៗ ១០ម៉ឺនរៀល និងសិស្សនិទ្ទេសEចំនួន ១ ២៤២ នាក់ ម្នាក់ៗ ៥ ម៉ឺនរៀល ។ចំណែកលោកគ្រូ អ្នកគ្រូ ចំនួន៤៧០ នាក់ ម្នាក់ៗ១០ ម៉ឺនរៀ,ល គណៈគ្រប់គ្រងសាលាចំនួន៨៣នាក់ ម្នាក់ៗ ១០ម៉ឺនរៀល។ ជាពិសេសបានប្រកាសផ្ដល់ជូនអាហារូបករណ៍ដល់និស្សិតចំនួន ២០០ កន្លែងសម្រាប់សិស្សខេត្តកំពត។

លោក សូ ភារិទ្ធ ប្រធានមន្ទីរអប់រំយុវជន និងកីឡាខេត្ត បានឱ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា​២០២៣-២០២៤​ ខេត្តកំពត លទ្ធផលប្រឡងជាប់សរុបចំនួន៤ ៤៤០នាក់ ស្មើនឹងជាង៨៥ភាគរយ៕
ដោយ៖ សិលា សារិន