កំពង់ផែទេសចរណ៍អន្តរជាតិខេត្តកំពត នឹងបើកដំណើរការសាកល្បងនៅខែធ្នូនេះ
កំពត៖ ប្រតិភូអន្តរក្រសួង និងតំណាងដៃគូវិនិយោគបានបញ្ជាក់ថា កំពង់ផែទេសចរណ៍អន្តរជាតិខេត្តកំពតស្ថិតនៅឃុំជុំក្រៀល ស្រុកទឹកឈូ ដែលបានស្ថាបនារួចរាល់ក្នុងអំឡុងឆ្នាំ២០២២ នឹងបើកដំណើរការសាកល្បងរយ:ពេលបីខែ ចាប់ពីខែធ្នូ ឆ្នាំ២០២៤នេះទៅ។
ប្រតិភូអន្តរក្រសួងរួមមាន ក្រសួងមហាផ្ទៃ ក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានពន្ធដារ ក្រសួងទេសចរណ៍ ថ្នាក់ដឹកនាំខេត្តកំពត និងតំណាងដៃគូវិនិយោគ កាលពីចុងខែវិច្ឆិកា បានអញ្ជើញពិនិត្យ នៅទីតាំងកំពង់ផែទេសចរណ៍អន្តរជាតិ ។សកម្មភាពនេះដើម្បីវាយតម្លៃនិងត្រៀមលក្ខណៈបើកដំណើរសាកល្បងរយៈពេលបីខែចាប់ផ្តើមពីខែធ្នូនេះទៅ។
ឯកឧត្តម ខូយ ដារ៉ា អគ្គនាយកកំពង់ផែទេសចរណ៍អន្តរជាតិខេត្តកំពត និងជាប្រធានប្រតិភូអន្តរក្រសួងបានបញ្ជាក់ថា ការសម្រេចបើកឱ្យដំណើរការសាកល្បងបណ្តោះអាសន្នរយៈពេលបីខែនេះដោយផ្អែកតាមចំណាររបស់សម្តេចតេជោ ហ៊ុន សែន អតីតនាយករដ្ឋមន្ត្រីអាណត្តិទី៦ ,ក្រសួងសេដ្ឋកិច្ច និងហិរញ្ញវត្ថុ រួមជាមួយក្រសួងសាធារណការ និងដឹកជញ្ជូន បានចុះកិច្ចព្រមព្រៀងក្នុងការទទួលយកក្រុមហ៊ុន KITP DEVELOPMENT-CO,LTDជាដៃគូវិនិយោគសម្រាប់កំពង់ផែទេសចរណ៍អន្តរជាតិខេត្តកំពតនិងផ្អែកតាមស្មារតីអង្គប្រជុំកាលពីថ្ងៃទី២០ ខែវិច្ឆិកា ឆ្នាំ២០២៤ រវាងក្រសួងសាធារណការ និងដឹកជញ្ជូន តំណាងអគ្គ នាយកដ្ឋានភាពជាដៃគូរវាងរដ្ឋ និងឯកជននៃក្រសួងសេដ្ឋកិច្ច និងហិរញ្ញវត្ថុ និងតំណាងក្រុមហ៊ុន KITP DEVELOPMENT CO.,LTD ទើបគ្រប់ផ្នែកពាក់ព័ន្ធចុះមកពិនិត្យទីតាំង និងស្ថានភាពជាក់ស្តែងនៅពេលនេះ ។ស្របតាមសំណើរបស់ក្រុមហ៊ុន កំពង់ ផែទេសចរណ៍អន្តរជាតិខេត្តកំពត(KITP DEVELOPMENT-CO,LTD) ដែលទទួលសិទ្ធិលើការងារនេះ ដើម្បីចាប់ផ្តើមបើកដំណើរ ការសាកល្បង។
សូមរំលឹកថា កំពង់ផែទេសចរណ៍អន្តរជាតិខេត្តកំពតមានបណ្តោយប្រវែង៣០០ម៉ែត្រ។សាងសង់លើផ្ទៃដី៤ហិកតា ស្ថិតក្នុងភូមិជុំក្រៀល ឃុំជុំក្រៀល ស្រុកទឹកឈូ ខេត្តកំពត ។កំពង់ផែនេះបានចាប់ផ្តើមសាងសង់កាលពីថ្ងៃទី៨ ខែសីហាឆ្នាំ២០១៨ និងរួចរាល់នាចុងឆ្នាំ២០២២ដោយប្រើប្រាស់ថវិកាជាង១១លានដុល្លារក្រោមគម្រោងហិរញ្ញប្បទានរបស់ធនាគារអភិវឌ្ឍន៍អាស៊ី៕
ដោយ៖ សិលា សារិន
