អភិបាលខេត្តបន្ទាយមានជ័យ ប្រាប់មន្រ្តីមូលដ្ឋានឱ្យជួយផ្សព្វផ្សាយដល់កសិករក្នុងការជ្រើសរើសពូជស្រូវដែលមានទីផ្សារល្អ
បន្ទាយមានជ័យ៖ក្នុងពិធីប្រកាសតែងតាំងអភិបាលរង និងប្រធានរដ្ឋបាល ស្រុកអូរជ្រៅ និងក្រុង សិរីសោភ័ណកាលពីថ្ងៃទី ៣ ខែធ្នូ ឆ្នាំ២០២៤ ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានដាស់តឿនដល់ អាជ្ញាធរស្រុក ក្រុង ត្រូវបន្តជួយ ផ្សព្វផ្សាយ ដល់ប្រជាកសិករឱ្យចេះជ្រើសរើសពូជស្រូវដែលមានទីផ្សារល្អក្នុងការនាំចេញ ។
ឯកឧត្តម អ៊ុំ រាត្រី មានប្រសាសន៍ថា កម្ពុជាមានពូជស្រូវជាច្រើនប្រភេទ តែមានប្រភេទខ្លះទីផ្សារចង្អៀត គឺលក់បានតែក្នុងស្រុក និងមានតម្លៃទាប ។ប៉ុន្តែប្រភេទស្រូវមួយចំនួនមានតម្លៃខ្ពស់ ហើយមានទីផ្សារទាំងក្នុងប្រទេស និងនាំចេញទៅទីផ្សារក្រៅប្រទេស។ឯកឧត្តមបន្តថា ប្រមុខរាជរដ្ឋាភិបាល តាមរយៈ ក្រសួងកសិកម្មបានយកចិត្តទុកដាក់បង្កើនការបន្សុទ្ធពូជស្រូវល្អដែលឆ្លើយតបទីផ្សារនាំចេញស្រូវឬអង្ករ។ការងារនេះមានការចូលរួមពីមន្ត្រីកសិកម្ម រួមជាមួយសហគមន៍ និងសមាគមស្រូវអង្ករកម្ពុជា ។
ជាមួយនឹងការជំរុញឱ្យចិត្តទុកដាក់លើការជ្រើសរើសពូជមានតម្លៃនិងផលិតដោយក្រសួងកសិកម្ម ឯកឧត្តមអភិបាលខេត្តក៏បាន រំលឹកដល់អាជ្ញាធរមូលដ្ឋានលើការគ្រប់គ្រងទឹកផងដែរ មានស្ទឹង និងអាងទឹករួមទាំងប្រព័ន្ធធធារាសាស្ត្រជាដើម។
លោក កែវ តារា រស្មី អភិបាលស្រុកអូរជ្រៅ និងលោក ស្រេង សុផល អភិបាលក្រុងសិរីសោភ័ណបានលើកឡើងស្រដៀងៗគ្នាថា កសិករនៅមូលដ្ឋានរបស់លោក ភាគច្រើនធ្វើស្រូវប្រាំងពូជស្រូវមិនប្រកាន់រដូវ ព្រោះស្រូវវស្សាប្រឈមនឹងទឹកភ្លៀងមិនគ្រប់គ្រាន់។ផ្ទុយពីស្រូវប្រាំង កសិករមានប្រភពទឹកប្រើប្រាស់ធ្វើស្រែលើសផែនការ ។
សូមជម្រាបថា ខេត្តបន្ទាយមានជ័យ គឺជាខេត្តដែលមានភាពល្បីល្បាញលើវិស័យកសិកម្ម និងជាប់ឈ្មោះជាខេត្តជង្រុកស្រូវរបស់កម្ពុជា ខេត្តមានផ្ទៃដីដាំដុះស្រូវសរុបចំនួនជាង៣០ម៉ឺនហិកតា៕
គួររំលឹកថា ក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី២៨ ខែមីនា ឆ្នាំ២០២៣នេះ ស្ដីពី «ភាពជោគជ័យរយៈពេល៥ឆ្នាំ របស់រដ្ឋបាលខេត្តបន្ទាយមានជ័យ» ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានឱ្យដឹងថា ក្នុងមួយឆ្នាំខេត្តទទួលបានទិន្នផលស្រូវចន្លោះពី៩សែនតោន ទៅ១លានតោន ក្នុងនោះ ស្រូវវស្សា៧៦៨,៧៩៥តោនក្នុង១ឆ្នាំ ស្រូវប្រាំង២៥១,៣៦៨តោនក្នុង១ឆ្នាំ។ក្នុងរយៈពេល៥ឆ្នាំនេះ បរិមាណស្រូវសរុបចំនួន ៤,៨១៥,៤៦៣តោន, ពោតក្រហម ចំនួន៣៩១,៦៣០តោន, ដំឡូងមី ១០,២៨២,២១៨តោន អំពៅ៧៤,៨៨១តោន។
ដោយឡែក សម្រាប់ប្រព័ន្ធធារាសាស្រ្តវិញ ដែលបានចុះបញ្ជីសារពើភណ្ឌ (CISIS) សរុបចំនួន៨៧ប្រព័ន្ធ (ខ្នាតតូច ៦ប្រព័ន្ធ ខ្នាតមធ្យម ៧៥ប្រព័ន្ធ និងខ្នាតធំ៦ប្រព័ន្ធ) ស្ថិតនៅរាយប៉ាយតាមបណ្តា ក្រុង ស្រុកទូទាំងខេត្ត ដែលអាចធ្វើការស្រោចស្រពបានលើផ្ទៃដីចំនួន៦៣,២០២ហិកតា ផ្ទៃដីស្រូវវស្សាដែលទទួលបានពីប្រព័ន្ធស្រោចស្រពចំនួន២៧,៩៨៤ហិកតា ផ្ទៃដីស្រូវប្រាំងចំនួន៣៥,២១៨ហិកតា។
ឯកឧត្តមអភិបាលខេត្តបានបន្ដថា សម្រាប់ផ្ទៃដីដំណាំឧស្សាហកម្មសរុបមានចំនួន១២២,៧៩២ហិកតា ក្នុងនោះដំឡូងមី១០២,៩៥៥ហិកតា ស្វាយចន្ទី៣,៥៨៩ហិកតា ពោតក្រហម១៣,៧៦១ហិកតា អំពៅ៥០១ហិកតា សណ្ដែកបាយ៥១ហិកតា ដំណាំបន្លែមានចំនួន៣,៥៣៨ហិកតា ដំណាំរួមផ្សំ មានចំនួន៥,៧៣៥ហិកតា។
ការងារគ្រឿងយន្តកសិកម្ម មានត្រាក់ទ័រចំនួន៣,៩១៣គ្រឿង, គោយន្តចំនួន៤៥,៩៦៥គ្រឿង, ម៉ាស៊ីនច្រូតចំនួន៨០២គ្រឿង, រោងម៉ាស៊ីនកិនស្រូវ និងកែច្នៃមានចំនួន៣៥៨កន្លែង, ម៉ាស៊ីនសម្ងួតមានចំនួន១៥កន្លែង ដែលមានសមត្ថភាពសម្ងួត ចំនួន២៣៥,៨០០តោនក្នុងមួយឆ្នាំ។
ការជំរុញការចិញ្ចឹមសត្វ ជារួមមានគោក្របីចំនួន១៣២,៤៦០ក្បាល, ជ្រូកសរុបចំនួន៤៦,៨៦៩ក្បាល និងបក្សីសរុបចំនួន១,៦៦៧,៣៩៩ក្បាល។ ក្នុងនោះមានកសិដ្ឋានចិញ្ចឹមលក្ខណៈពាណិជ្ជកម្ម ចំនួន៨៣កសិដ្ឋាន ដែលមានសត្វ ចំនួន៥៨៥,៥៨៧ក្បាល ក្នុងនោះគោចំនួន១៤កសិដ្ឋាន ស្មើ២,០១៣ក្បាល, ជ្រូកមានចំនួន ២០កសិដ្ឋាន ស្មើនឹង២៥,០៧៤ក្បាល និងបក្សី (មាន់ ទា) ចំនួន៤៩កសិដ្ឋាន ស្មើនឹង៥៥៨,៥០០ក្បាល។
ការអភិវឌ្ឍវារីវប្បកម្ម ក្នុងរយៈពេល៥ឆ្នាំនេះ ផលនេសាទសរុបទទួលបានចំនួន ១៣០,៣០៨តោន ដែលក្នុងនោះ បានកែច្នៃផលនេសាទសម្រាប់ធ្វើការនាំចេញចំនួន ២,១៨៥តោន។
សហគមន៍កសិកម្មមាន ចំនួន៤៩សហគមន៍ សមាជិកសរុបចំនួន៤,៨០៥នាក់ និងមានទុនសរុបចំនួន១,៨១៤,៤០៦,៣០០រៀល។ សហគមន៍នេសាទចំនួន១៩សហគមន៍ ដែលមានសមាជិកសរុបចំនួន ១២,០៩៣នាក់។ សហគមន៍ព្រៃឈើមានចំនួន៩សហគមន៍ មានលើផ្ទៃដីចំនួន៣,៥៤៤ហិកតា គ្រួសារចំនួន១,៨០៣គ្រួសារ មនុស្សរាយចំនួន៤,៨៣៩នាក់៕
ដោយ៖គៀន ច័ន្ទហ៊ីន
