សៀមរាប៖ផ្លូវឫស្សី ឬ” Bamboo Street” ស្ថិតនៅខាង​ក្រោយ​វត្តដំណាក់នៃក្រុងសៀមរាបប្រវែង ២៨០ ម៉ែត្រគ្រោង​នឹង ដាក់​ឱ្យដំណើរនៅថ្ងៃទី១៥ ខែធ្នូ ឆ្នាំ២០២៤ខាងមុខ ។ក្រោយ​បើក​ដំណើរការ​ ទីនេះនឹងក្លាយជា​វិថីទេសចរណ៍រាត្រីថ្មី​មួយទៀត​ បន្ទាប់ពីតំបន់​ផាប់ស្រ្ទីតដែលមានប្រជាប្រិយភាពជាយូរមកហើយ ។សមិទ្ធិថ្មីដែលចូលរួមដោយអង្គការដៃគូ និងវិស័យឯកជនផងនោះ គឺជាការត្រៀមលក្ខណៈសម្រាប់ពិធីបុណ្យឆ្លងឆ្នាំសកលឆ្នាំ២០២៤ ផងដែរ។

“ផ្លូវឫស្សី”ឬ Bamboo Street ​តំបន់នេះនឹង​ផ្តល់​ជូននូវភាពលេច​ធ្លោ​តាម​រចនាបទធម្មជាតិ និងវប្បធម៌ ដោយមាន​ស្ទីល​ជីវិត ប្រើ​សម្ភារៈផលិតពីឬស្សី ក៏ដូចជា ម្ហូប​អាហារ ភេសជ្ជៈ នំចំណី បែបដើម ។ទីនេះក៏មិនប្រើប្រាស់ប្លាស្ទិកទៀតផង ។តំបន់នេះត្រូវបានស្ថាបនា​ឡើង ដើម្បីលើក​កម្ពស់វិស័យទេសចរណ៍ និងបង្កើតបទពិសោធន៍​ថ្មីសម្រាប់ភ្ញៀវជាតិ និង​អន្តរជាតិ ។

លោកស្រី នាយិការ ម៉ៅ សុផានី អង្គការSPOON បានឱ្យដឹងថា នៅថ្ងៃ​សម្ពោធ ផ្លូវឫស្សី ឬ Bamboo Street នឹងមានការ​សម្តែងតន្រ្តីផ្ទាល់ ការសម្ដែងសិល្បៈកុមារ និងចូលរួមពីក្រុមហ៊ុនតំបន់​សៀមរាប រួមទាំង​សណ្ឋាគារ ភោជនីយដ្ឋាន និងសហ​គ្រាសឯកជន ។សមិទ្ធិនេះ ជាគំនិត​ផ្តួចផ្តើមរបស់គម្រោង “ភូមិវត្តបូព៌” ដែលផ្តោត​សំខាន់លើការរួម​ចំណែក​សហគមន៍ និងការអភិវឌ្ឍ បរិស្ថានបៃតង។ ការលុបបំបាត់​ការប្រើប្លាស្ទិក និង មានការគាំទ្រ ឯកភាពពីអាជ្ញាធរខេត្ត និងអាជ្ញាធរ​មូលដ្ឋាន និងមន្ទីរអង្គភាព ស្ថាប័នពាក់ព័ន្ធ ។

លោក យុន លីនណេ អភិបាលរងខេត្តសៀមរាបក្នុងកិច្ចប្រជុំពិភាក្សា​កាលពីដើមសប្ដាហ៍នេះ បានគាំទ្រយ៉ាងពេញទំហឹង នូវគំនិតផ្តួចផ្តើម បង្កើតឱ្មានទីតាំងផ្លូវទេសចរណ៍រាត្រី Bamboo Street ដើម្បីបង្កើន​នូវវិស័យទេសចរណ៍ សម្បូរបែប ។ជា​ពិសេសការចូលរួមកែលម្អ​សោភណភាព បរិស្ថាន និងវប្បធម៌ ។លោក បានលើកទឹកចិត្ត​សហគមន៍​ក្នុងការ​ចូលរួមលុប​បំបាត់ការប្រើប្លាស្ទិក ។លោកក៏សង្ឃឹមថា ផ្លូវប្ញស្សី Bamboo Street នឹងក្លាយជាតំបន់ទេសចរណ៍​ច្នៃប្រឌិត​លេចធ្លោ​មួយ​ទៀតបន្ទាប់ពីផាប់ស្រ្ទីត( Pub Street) ៕
អត្ថបទ និងរូបភាព៖ ប៊ុន រដ្ឋា