ក្រសួងបរិស្ថាន-ក្រសួងកសិកម្ម៖ កិច្ចសហប្រតិបត្តិល្អជាមួយអង្គការ WCS បាននាំមកនូវកិច្ចអភិរក្សធនធានធម្មជាតិ និងជលផល
ភ្នំពេញ៖តាមរយៈភាពជាដៃគូសហការរវាងក្រសួងបរិស្ថាន និង ក្រសួងកសិកម្ម រុក្ខាប្រមាញ់ និងនេសាទជាមួយអង្គការ សមាគមអភិរក្សសត្វព្រៃកម្ពុជា(WCS)បានសម្រេចលើទិសដៅអភិវឌ្ឍន៍សំខាន់ៗជាច្រើនពិសេសការអភិរក្សធនធានធម្មជាតិ ការការពារសត្វព្រៃ ការអភិរក្សជលផលជាដើម។
កាលពីចុងសប្ដាហ៍កន្លងទៅអង្គការ WCS ប្រចាំកម្ពុជាប្រារព្ធខួប២៥ឆ្នាំនៃការងារអភិរក្សសត្វព្រៃ ព្រៃឈើនិងធនធានធម្មជាតិ នៅក្នុងប្រទេសកម្ពុជា។លោក រ៉ូបឺត មេនហ្សី (Robert Menzi)ប្រធានស្តីទីនិងជាអគ្គនាយកអង្គការសមាគមអភិរក្សសត្វព្រៃ (WCS) បានថ្លែងក្នុងពិធីនេះថា រយៈពេល២៥ឆ្នាំនេះWCS បានចូលរួមជាដៃគូអភិវឌ្ឍន៍សហការជាមួយក្រសួង បរិស្ថាន ក្រសួងស្ថាប័នពាក់ព័ន្ធ អាជ្ញាធរមូលដ្ឋាន ។អង្គការបានសម្រេចលើទិសដៅអភិវឌ្ឍន៍សំខាន់ៗ ជាពិសេសកិច្ចសហប្រតិបត្តិការ ដែលគាំទ្រគោលនយោបាយរបស់រាជរដ្ឋាភិបាល ក្នុងការលើកកម្ពស់ជីវភាពសហគមន៍ ការងារគ្រប់គ្រងធនធានធម្មជាតិ និងការអភិរក្សជីវៈចម្រុះដើម្បីចូលរួមចំណែកការពារប្រព័ន្ធអេកូឡូស៊ីតំបន់កាត់បន្ថយឧស្ម័នផ្ទះកញ្ចក់និងការប្រែប្រួលអាកាសធាតុ។
ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថានបានកត់សម្គាល់លើភាពជាដៃគូរវាងក្រសួងបរិស្ថានជាមួយអង្គការ សមាគមអភិរក្សសត្វព្រៃសម្រេចបានជោគជ័យក្នុងប្រតិបត្តិការនៅកម្ពុជារយៈពេល២៥ឆ្នាំកន្លងមកនេះ។ភាពជាដៃគូនេះ បានឆ្លុះបញ្ចាំងពីភាពជោគជ័យនៃកិច្ចសហប្រតិបត្តិការជាមួយគ្នា ក្នុងការពារ និងអភិរក្សធនធានធម្មជាតិ និងបរិស្ថាននៅកម្ពុជា។
លោកជំទាវ អ៊ឹម រចនា អនុរដ្ឋលេខាធិការ និងជាមន្ដ្រីនាំពាក្យក្រសួង កសិកម្មរុក្ខាប្រមាញ់ និងនេសាទបានថ្លែងថាក្រសួង កសិកម្មបានសហការជាមួយអង្គការ WCS ចាប់តាំងពីឆ្នាំ២០០០មកនៅក្នុងអនុវិស័យសំខាន់ចំនួន២គឺអនុវិស័យព្រៃឈើ និងជលផល។ក្នុងនេះអនុផលព្រៃឈើចាប់ពីឆ្នាំ២០០០ដល់២០១៦ ។
ក្រសួងកសិកម្មបានចាប់ផ្តើមសហការជាមួយ អង្គការ WCSដោយចាប់ផ្តើមពីការសិក្សាស្រាវជ្រាវព្រៃឈើ និងសត្វព្រៃដើម្បី បង្កើតតំបន់ព្រៃការពារ ដែលជាលទ្ធផលតំបន់ព្រៃឈើ ១៥កន្លែង ក្នុងប្រទេសកម្ពុជាត្រូវបានបង្កើតឡើង ដើម្បីការពារនិង អភិរក្ស ក្នុងនេះដូចជាព្រៃការពារជីវចម្រុះកែវសីមា ព្រៃការពារព្រះវិហារ ព្រៃការពារជួរភ្នំក្រវាញ គម្រោងអភិរក្សអណ្តើកហ្លួង ខេត្តកោះកុងនិងគម្រោងអភិរក្សសត្វខ្សឹបខេត្តកំពង់ធំជាដើម។តាមរយៈកិច្ចការពារតំបន់ការពារទាំងនេះបានលើកស្ទួយជីវភាពប្រជាសហគមន៍មូលដ្ឋាន តាមរយៈរួមចំណែកការពារធនធានធម្មជាតិដោយផ្ទាល់ ។ក្នុងនេះដូចជាការពារសំបុកការពាសត្វ ស្លាបមានដូចជា សត្វក្រៀល ត្រដក់ ខ្សឹប និងសត្វផ្សេងៗទៀត។ក្រៅពីនេះកម្មវិធី ស្រូវមិត្តភាពសង្រ្គោះសត្វព្រៃដែលបាន បង្កើតឡើងក្នុងឆ្នាំ២០០៩រហូតមកដល់ពេលបច្ចុប្បន្នគឺជាកម្មវិធីមួយដ៏ល្អដែលជួយលើកស្ទួយជីវភាពប្រជាសហគមន៍មូលដ្ឋានផងផ្សារភ្ជាប់អភិរក្សផង និងការកសាងសមត្ថភាព របស់ភាគីពាក់ព័ន្ធក្នុងការអភិរក្ស ការពង្រឹងការអនុវត្ត ច្បាប់ ការគ្រប់គ្រងការអភិរក្សសត្វព្រៃតំបន់សំខាន់ៗជាដើម។
មន្រ្តីអ្នកនាំពាក្យរូបនេះបានបន្តថា ក្នុងនេះការអភិរក្សអនុវិស័យជលផលវិញ រវាងក្រសួងកសិកម្ម និង អង្គការ WCSនិងរដ្ឋបាលជលផល បានស្រាវជ្រាវ និងរកឃើញ អណ្តើកហ្លួងជាលើកដំបូងនៅឆ្នាំ ២០០០និងក្រពើត្រីក្នុងប្រព័ន្ធ ព្រែកស្រៃអំបិលនៃខេត្តកោះកុង និងខេត្តព្រះសហនុជាដើម។ចំណែកសកម្មភាពនៅតាមដងទន្លេមេគង្គវិញ ក្រសួងកសិកម្ម រុក្ខាប្រមាញ់ និងនេសាទកំពុងបន្តសហការជាមួយអង្គការ WCSដើម្បីអភិរក្សធនធានជលផលសំខាន់ៗជាពិសេ សត្វកន្ធាយក្បាលកង្កែប ត្រីបបែលទឹកសាប ដែលបច្ចុប្បន្នយើងបានការពារសំបុកភ្ញាស់ និងលែងកូនកន្ធាយក្បាលកង្កែប ជាង៦ពាន់ក្បាល ចូលទៅជម្រកតាមដងទន្លេមេគង្គង នៅខេត្តក្រចេះ និងខត្តស្ទឹងត្រែង។
គួរបញ្ជាក់ថាក្នុងរយៈពេល២៥ឆ្នាំនៃសតវត្សចុងក្រោយនេះ អង្គការ WCS បានការពារតំបន់ព្រៃឈើ តំបន់ដីសើម និងវាលស្មៅលើទំហំដីជាងមួយលានហិកតា។តំបន់ទាំងនេះជាទីជម្រកធម្មជាតិសម្រាប់សត្វដែលជានិមិត្តសញ្ញាជាតិដូចជាសត្វត្រយ៉ងយក្សសត្វអណ្តើកហ្លួងនិងសត្វត្រយងចង្កំកសដែលត្រូវបានរកឃើញឡើងវិញតាមរយៈកិច្ចខិតខំប្រឹងប្រែងដែល ដឹកនាំដោយអង្គការWCSនិងត្រូវបានជំរុញឱ្យមានការការពារសារជាថ្មីនូវប្រព័ន្ធអេកូឡូស៊ីសំខាន់ៗនៅខេត្តកោះកុងនិងខេត្តព្រះវិហារ៕
ដោយ៖ម៉ាដេប៉ូ,រូបភាព៖ សែមបូរិន
