(ភ្នំពេញ)៖ អត្តពលិកកីឡាតេក្វាន់ដូ WT ក្រសួងមហាផ្ទៃ ដែលដណ្តើមបានមេដាយសរុប៧គ្រឿង ក្នុងព្រឹត្តិការណ៍ THE VIETNAM 2024 ASIAN OPEN POLICE TAEKWONDO CHAMPIONSHIPS នៅ ប្រទេសវៀតណាម បានធ្វើដំណើរមាតុភូមិនិវត្តមកដល់កម្ពុជាវិញហើយ នារសៀលថ្ងៃទី១១ ខែ ធ្នូ ឆ្នាំ២០២៤។

មេដាយសរុប ៧គ្រឿងដែលអត្តពលិកតេក្វាន់ដូ WTក្រសួងមហាផ្ទៃដណ្តើមបានពីព្រឹត្តិការណ៍អន្តរជាតិនៅវៀតណាមនេះ មានមេដាយ មាស០៤ ប្រាក់០២ និងសំរឹទ្ធ០១គ្រឿង ដោយការប្រកួតបានដំណើរចាប់ពីថ្ងៃទី៤ដល់ថ្ងៃទី៩ ខែ ធ្នូ ឆ្នាំ២០២៤នៅខេត្ត Quang Ninh ប្រទេសវៀតណាម។

លោក វរសេនីត្រី ឆូយ ពុទ្ធ ប្រតិភូដឹកនាំ បានគូបញ្ជាក់ថា សមិទ្ធផលដែលទទួលបានពីព្រឹត្តិការណ៍នេះ មិនមែនជាសមិទ្ធផលថ្មីសម្រាប់អត្តពលតេក្វាន់ដូក្រសួងមហាផ្ទៃឡើយ ។ ពោល គឺការដណ្តើមបានមុនៗគឺចំនួនប្រហាក់ប្រហែលដូចគ្នានេះដែរ។

លោក វរសេនីត្រី ឆូយ ពុទ្ធាប្រតិភូដឹកនាំ បានអះអាងទៀតថា សម្រាប់ការចូលរួមក្រោយៗទៀតក្នុងព្រឹត្តិការណ៍ប្រកួតអន្តរជាតិដែលថ្នាក់ដឹកបញ្ជូនទៅចូលរួមក្រុមតេក្វាន់ដូWTក្រសួងមហាផ្ទៃប្តេជ្ញាចិត្តនឹងដណ្តើមឱ្យបានលទ្ធផលល្អជាងនេះបន្ថែមទៀត ដើម្បីលើកមុខមាត់អង្គភាពលើឆាកអន្តរជាតិ។ជាមួយគ្នានេះ លោក តំណាងឱ្យក្រុមទាំងមូលសូមថ្លែងអំណរគុណជូនចំពោះឯកឧត្តម សរ សិទ្ធិ ឯកឧត្តម យិត ភិរៈ និង ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តីរដ្ឋមន្រ្តីក្រសួងមាហាផ្ទៃ ដែល បានយកចិត្តទុកដាក់តាមដាន គាំទ្រឧបត្ថម្ភចំពោះសុខទុកអត្តពលិកកីឡាតេក្វាន់ដូក្រសួងមហាផ្ទៃទាំងការហ្វឹកហាត់និងពេលប្រកួត។

សូមបញ្ជាក់ថា ព្រឹត្តិការណ៍ THE VIETNAM 2024 ASIAN OPEN POLICE TAEKWONDO CHAMPIONSHIPSនៅប្រទេសវៀតណាមនេះ បានដំណើរចាប់ពីថ្ងៃទី៤ដល់ថ្ងៃទី៩ ខែ ធ្នូ ឆ្នាំ២០២៤ មានប្រទេសចូលរួមចំនួន២៩ប្រទេសចូលរួមសរុបមន្ត្រី ប្រតិភូ គ្រូបង្វឹក និងអត្តពលិកជាង ២,៥០០នាក់។ សម្រាប់សមាគមកីឡាតេក្វាន់ដូ WT ក្រសួងមហាផ្ទៃ បានបញ្ជូនប្រតិភូដឹកនាំ គ្រូបង្វឹក គ្រូជំនួយ កីឡាករ កីឡាការិនី សរុបចំនួន១៤រូប (ប្រតិភូ គ្រូបង្វឹក គ្រូជំនួយ កីឡាករ និងកីឡាការិនី ជានគរបាលជាតិមានចំនួន១១រូប។ជាលទ្ធផលអត្តពលិកក្រសួងមាផ្ទៃដណ្តើមបានមេដាយជូនកម្ពុជា៧គ្រឿង មាស៤ ប្រាក់២ និងសំរិទ្ធ១គ្រឿង ក្នុងនោះ ១. កីឡាការិនី ណាង វណ្ណៈ មេដាយមាស០១គ្រឿង វិញ្ញាសាមេគុន ឯកត្តជននារី ២.កីឡាករ ផល សុវណ្ណាត់ មេដាយមាស ០១គ្រឿង វិញ្ញាសាមេគុន ឯកកត្តជនបុរស ៣.កីឡាករសុវណ្ណាត់ និងកីឡាការិនី ណាង វណ្ណៈ មេដាយមាស ០១គ្រឿង វិញ្ញាសាមេគុនគូ បុរស-នារី ៤.កីឡាករ វ៉ា មិថុនា មេដាយមាស០១គ្រឿង វិញ្ញាសាប្រយុទ្ធ ទម្ងន់ក្រោម ៨០គីឡូក្រាម ៥.កីឡាការិនី ឈឿង អាលីហ្សា មេដាយប្រាក់០១គ្រឿង វិញ្ញាសាប្រយុទ្ធ ទម្ងន់ក្រោម ៥៧គីឡូក្រាម ៦.កីឡាករ វ៉ាន់ រិទ្ធី មេដាយប្រាក់០១គ្រឿង វិញ្ញាសាប្រយុទ្ធ ៧.កីឡាករសំ យូដេត មេដាយសំរឹទ្ធ០១គ្រឿង វិញ្ញាសាប្រយុទ្ធ ទម្ងន់ក្រោម ៥៨គីឡូក្រាម៕

ថតដោយ ៖ ងីម ឆៃហួ
អត្ថបទ ៖ ជាវ ចន្ធូ