(ភ្នំពេញ)៖ លោក Miguel Angel Lopez Alvardo គ្រូបង្វឹកហែលទឹក​ជនជាតិ​អេស្ប៉ាយ ដែលសហព័ន្ធកីឡាហែលទឹកអន្តរជាតិ បញ្ជូនមកជួយ​បង្ហាត់ដល់សិក្ខាកាមដែលជាគ្រូបង្វឹកកីឡាហែលទឹកកម្ពុជា បានថ្លែងថា វគ្គសាមគ្គីអូឡាំពិក ស្តីអំពី គ្រូបង្វឹកកីឡាហែលទឹកកម្រិត១ ដែលដំណើរ​រយៈពេល ១សប្តាហ៍នេះ គឺមានសារៈខ្លាំងណាស់សម្រាប់គ្រូបង្វឹក​កីឡាទឹក​កម្ពុជា ក្នុងការបង្ហាត់ដល់កីឡាករកីឡាការិនី តាមបណ្តាក្លឹបប្រកបដោយ​គុណភាព ដែលរួមចំណែកជួយជំរុញឱ្យកីឡាករកីឡាការិនី​ហែលទឹកកម្ពុជា​កាន់តែមានសក្កានុពលក្នុងការប្រជែងមេដាយជូនកម្ពុជាពីលើឆាកអន្តរជាតិ។

លោកថា ជាការពិតណាស់ ការសិក្សារៀនសូត្រមិនមែន​បញ្ចប់ត្រឹមតែ​កម្រិត១​នោះទេ ពោលគឺការសិក្សានូវមានកម្រិតទី២និងទី៣ជាច្រើនទៀត ប៉ុន្តែវគ្គកម្រិតទី១នេះ មានមូលដ្ឋានគន្លឹះមេរៀនជាច្រើន ពាក់ព័ន្ធនៃផែន​ការជាគ្រូបង្វឹក ដើម្បីបង្ហាត់ដល់កីឡាករកីឡាការិនីឱ្យមានគុណភាព និងសក្តានុពល។

លោក Miguel Angel Lopez Alvardo បានគូសបញ្ជាក់ទៀតថា សិក្ខាកាមជាគ្រូបង្វឹកដែលនាំយកចំណេះជំនាញ វគ្គគ្រូបង្វឹកកីឡាដែល​ទឹកកម្រិតទី១ ចែករំលែក ដោយលោកនាពេលនេះ ទៅបង្ហាត់ដល់សិស្ស​តាមបណ្តាលក្លឹបនឹងពង្រីកបានធនធានគ្រូបង្វឹកកាន់តែច្រើន ពិសេស​ក៏ផលិត​បានធន់ធានកីឡាករកីឡាការិនីឆ្នើមៗពោពេញ​ដោយ​សក្តា​នុពល។ គ្រូបង្វឹកខាងលើ មើលឃើញថា តាមរយៈការរីកចំរើននៃវិស័យ​កីឡាហែលទឹករបស់កម្ពុជាបច្ចុប្បន្ន លោក ជឿជាក់ថា ឆ្នាំ២០២៧ កម្ពុជា​នឹងមានលទ្ធភាពដណ្តើមមេដាយមាសពីស៊ីហ្គេមយ៉ាងណាស់១គ្រឿង និងឆ្នាំ២០២៩ កីឡាយុវជនអាស៊ីកម្ពុជាទទួលធ្វើម្ចាស់ផ្ទះ ក៏កម្ពុជារំពឹងខ្ពស់ឈ្នះមេដាយផងដែរ។

លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹកបាន​លើក​ឡើង​ថា វគ្គបណ្តុះបណ្តាលគ្រូបង្វឹកកីឡាហែលទឹកនេះ យើងផ្តោត​លើកម្រិត១ ដែលពួកគាត់ធ្លាប់ទទួលបានការបណ្តុះបណ្តាលកម្រិតបឋមរួចហើយៗគោលដៅសហព័ន្ធចង់ឱ្យគ្រូបង្វឹកទាំងនោះយកចំណេះដឹងទៅហ្វឹកហាត់បន្តដល់កីឡាករ កីឡាការិនីវ័យក្មេងៗ។

លោក ហែម គីរី បានបង្ហាញក្តីសង្ឃឹមថា ក្រោយពីបញ្ចប់វគ្គបណ្តុះបណ្តាល​នេះទៅ សិក្ខាកាម​ ដែលជាគ្រូបង្វឹកកម្រិត១ទាំង២៥នាក់នឹងយកចំណេះ​ដឹងទាំងអស់ទៅបង្ហាត់បង្រៀនដល់កីឡាករ កីឡាការិនី នៅតាមអង្គភាព ក្លឹបនានាឱ្យមានការរីកចម្រើនទាំងបរិមាណ និងគុណភាព នាថ្ងៃអនាគត។ លោកបន្ថែមថា គ្រូបង្វឹកទាំងអស់មានវ័យក្មេងៗ ដែលសហព័ន្ធខ្មែរកីឡា​ហែល​ទឹកបានផ្តល់ឱកាសជូនដល់ពួកគាត់ ដើម្បីអភិវឌ្ឍសមត្ថភាពពួកគាត់ ក្នុងគោលដៅពង្រីកធនធានថ្នាលយុវជនហែលទឹកឱ្យកាន់តែសម្បូរបែប និងប្រកបដោយគុណភាពនាថ្ងៃអនាគតផងដែរ។

វគ្គនេះមានរយៈពេល១សប្តាហ៍ ដោយគ្រូឧទ្ទេសនឹងចែករំលែកចំណេះដឹង​ក្នុងថ្នាក់ និងអនុវត្តផ្ទាល់ដោយនឹងយកកីឡាករ កីឡាការិនីក្មេងៗមកចូល​រួម​ហ្វឹក​ហាត់ជាមួយ។ នៅពេលដែលមានកំហុសឆ្គងក្នុង​អំឡុងវគ្គសិក្សា​នេះ គ្រូឧទ្ទេសនឹងជួយកែតម្រូវនូវរាល់កំហុសឆ្គងមួយចំនួនដល់កីឡាករ កីឡាការិនី និងគ្រូបង្វឹកផងដែរ។

វគ្គសាមគ្គីអូឡាំពិកស្តីពី គ្រូបង្វឹកកីឡាហែលទឹក កម្រិត១នេះ បង្រៀន​ដោយ​គ្រូឧទ្ទេស លោក Lopez Akvarado Miguel Angel ជាជន​ជាតិអេស្ប៉ាញមកពីសហព័ន្ធកីឡាហែលទឹកអន្តរជាតិ ក្រោមការសម្រប​សម្រួលពីគណៈកម្មាធិការជាតិអូឡាំពិកកម្ពុជា (NOCC)។ មានសិក្ខាកាម​ចូលរួមចំនួន ២៥នាក់មកពីមន្ទីអប់រំ យុវជន និងកីឡារាជធានីភ្នំពេញ មន្ទីអប់រំ យុវជន និងកីឡាខេត្តបាត់ដំបង ក្លឹបកីឡាហែលទឹកនាគរាជ​កំពង់ចាម ក្លឹបហែលទឹកកោះធំខេត្តកណ្តាល ក្លឹបហែលទឹកកោះធំ​ខេត្តកណ្តាល សមាគមកីឡាហែលទឹកកងយោធពលខេមរភូមិន្ទ ក្លឹបក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការ និងដឹកជញ្ជូន និងសហព័ន្ធខ្មែរកីឡាហែលទឹកផងដែរ៕

ថតដោយ ៖ ជីម ភារ៉ា
អត្ថបទ ៖ ជាវ ចន្ធូ